ဒုတိယအကြိမ် ရန်ကုန်တိုင်းဒေသကြီးလွှတ်တော် (၃) နှစ်မြောက် နှစ်ပတ်လည် အခမ်းအနား ကျင်းပ - ဒုတိယအကြိမ် ရန်ကုန်တိုင်းဒေသကြီးလွှတ်တော် (၃) နှစ်မြောက် နှစ်ပတ်လည် အခမ်းအနား ကျင်းပ

ဒုတိယအကြိမ် ရန်ကုန်တိုင်းဒေသကြီးလွှတ်တော် (၃) နှစ်မြောက် နှစ်ပတ်လည် အခမ်းအနား ကျင်းပ

Ministry of Information/ ရန်ကုန် / February 11, 2019
image_latest


ရန်ကုန် ဖေဖော်ဝါရီ ၁ဝ

ဒုတိယအကြိမ် ရန်ကုန်တိုင်းဒေသကြီးလွှတ်တော် (၃)နှစ်မြောက် နှစ်ပတ်လည် အခမ်းအနားကို ယနေ့ ညနေ ၆ နာရီက ရန်ကုန်တိုင်းဒေသကြီး အစိုးရအဖွဲ့ရုံး မင်္ဂလာခန်းမတွင် ကျင်းပရာ လွှတ်တော်ကိုယ်စားလှယ်များက လွှတ်တော်(၃)နှစ် မြောက် သီချင်းကိုသီဆိုပြီး အခမ်းအနားကို စတင်ဖွင့်လှစ်သည်။
အခမ်းအနားသို့ ရန်ကုန် တိုင်းဒေသကြီး ဝန်ကြီးချုပ် ဦးဖြိုးမင်းသိန်း၊ တိုင်းဒေသကြီး လွှတ်တော်ဥက္ကဋ္ဌ ဦးတင်မောင်ထွန်း၊ တိုင်းဒေသကြီးဝန်ကြီးများ၊ တိုင်း ဒေသကြီး လွှတ်တော် ကိုယ်စားလှယ်များနှင့် ဖိတ်ကြား ထားသော ဧည့်သည်တော်များ တက်ရောက်ကြသည်။
ရှေးဦးစွာ ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက လွှတ်တော်(၃)နှစ်မြောက် ဂုဏ်ပြု အမှတ်တရစကား ပြောကြားရာတွင် လွှတ်တော်သည် ဒီမိုကရေစီ၏ အသက်ဖြစ်ပါကြောင်း၊ ဒီမိုကရေစီ၏ ပန်းတိုင်ဖြစ်ပါကြောင်း၊ လွှတ်တော်အရည်အသွေး မြင့်မားလာသည်နှင့်အမျှ နိုင်ငံကိုဦးဆောင်မှုပေးနိုင်သည့် အခန်းကဏ္ဍတစ်ရပ် ပိုမိုမြင့်မား လာမည်ဖြစ်ပါကြောင်း၊ လွှတ်တော်က ချမှတ်လိုက်သည့် ဥပဒေများသည် နိုင်ငံတော် တည်ဆောက်ရန်အတွက် ဌာနဆိုင်ရာ အသီးသီးလိုက်နာကျင့်သုံး ဆောင်ရွက်ရမည့် ဥပဒေ၊ နည်းဥပဒေ၊ လုပ်ထုံးလုပ်နည်းများကို တည့်မတ် ဆောင်ရွက်ပေးနိုင်သည့် အခြေအနေတစ်ခုဖြစ်သကဲ့သို့ လူမှုဘဝကို မြှင့်တင်နိုင်ရန်အတွက်လည်း မူဝါဒချမှတ် ပေးနိုင်မည့် အခြေအနေတစ်ခုဖြစ်ပါကြောင်း၊ သို့ပါ၍ လွှတ်တော်၏ အခန်းကဏ္ဍ မြင့်မားလာရေးသည် ဒီမိုကရေစီစနစ်တွင် အရေးအကြီးဆုံး ကဏ္ဍတွင် ရှိနေသည်ကို အားလုံးသတိချပ်ရန် လိုအပ်ပါကြောင်းပြောကြားသည်။
ထို့နောက် တိုင်းဒေသကြီးလွှတ်တော်ဥက္ကဋ္ဌ ဦးတင်မောင်ထွန်းက လွှတ်တော်(၃)နှစ်မြောက် ဂုဏ်ပြုစကားပြောကြားသည်။
ဆက်လက်၍ တိုင်းဒေသကြီး လွှတ်တော်ဥက္ကဋ္ဌ ဦးတင်မောင်ထွန်း၊ တိုင်းဒေသကြီး လွှတ်တော်ဒုတိယဥက္ကဋ္ဌနှင့် မြို့တော်ဝန် ဦးမောင်မောင်စိုးတို့က လွှတ်တော် ဥက္ကဋ္ဌဖလားဘောလုံးပြိုင်ပွဲတွင် ပထမဆုရ မြောက်ပိုင်းခရိုင်အသင်း၊ ဒုတိယဆုရ တောင်ပိုင်းခရိုင်အသင်း၊ ပူးတွဲတတိယဆုရ အရှေ့ပိုင်းခရိုင်အသင်းနှင့် အနောက်ပိုင်း ခရိုင်အသင်းတို့အား ဆုများ အသီးသီးပေးအပ် ချီးမြှင့်သည်။
ယင်းနောက် အမျိုးသားယဉ်ကျေးမှု အနုပညာ တက္ကသိုလ်မှ ကျောင်းသား ကျောင်းသူများက တိုင်းရင်းသား ရိုးရာအက အလှများ၊ တေးသီချင်းများဖြင့် သီဆိုဖျော်ဖြေ ကြသည်။
သတင်း-မင်းသစ်(MNA)၊ ဓာတ်ပုံ-ရဲထွဋ်
 

အထူးသတင်း
  • ရာသီတုပ်ကွေးရောဂါ (Seasonal Influenza)ဖြစ်ပွားမှုနှင့်ပတ်သက်၍ ရောဂါစောင့်ကြပ်ကြည့်ရှုခြင်း၊ ကြိုတင်ကာ ကွယ်ခြင်းနှင့် တုံ့ပြန်ဆောင် ရွက်ခြင်းလုပ်ငန်းများ အားဖြည့်ဆောင်ရွက်လျက်ရှိကြောင်း ထုတ်ပြန် ချက် (၁/၂၀၁၉)
  •