ဒုတိယဝန်ကြီး ဒေါက်တာအောင်ဇေယျ လျိုကျိုးမြို့ရှိ ဉာဏ်ရည်တုနည်းပညာသုံးဝူလင်း EV စက်ရုံနှင့် ဟူကွေ့ခရုခေါက်ဆွဲစက်ရုံတို့ကို သွားရောက်လေ့လာ

ဒုတိယဝန်ကြီး ဒေါက်တာအောင်ဇေယျ လျိုကျိုးမြို့ရှိ ဉာဏ်ရည်တုနည်းပညာသုံးဝူလင်း EV စက်ရုံနှင့် ဟူကွေ့ခရုခေါက်ဆွဲစက်ရုံတို့ကို သွားရောက်လေ့လာ

နေပြည်တော် ဒီဇင်ဘာ ၆

လျှပ်စစ်သုံးယာဉ်နှင့် ဆက်စပ်ပစ္စည်းများ သုတေသနဖွံ့ဖြိုးရေးနှင့် နည်းပညာပြန့်ပွားရေးလုပ်ငန်းကော်မတီနှင့် ဆန်းသစ်တီထွင်မှုနှင့် ဒစ်ဂျစ်တယ်အတတ်ပညာ မြှင့်တင်ရေး လုပ်ငန်းကော်မတီတို့၏ဥက္ကဋ္ဌ သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာအောင်ဇေယျ ဦးဆောင်သော မြန်မာကိုယ်စားလှယ်အဖွဲ့သည် ဉာဏ်ရည်တုနည်းပညာ နှီးနှောဖလှယ်ပွဲ စတုတ္ထနေ့လေ့လာရေးအစီအစဉ်အရ ဒီဇင် ဘာ ၄ ရက် နံနက်ပိုင်းက လျိုကျိုးမြို့တွင် ဆက်လက်ကွင်းဆင်းလေ့လာကြသည်။

ဦးစွာ ဒုတိယဝန်ကြီးနှင့်အဖွဲ့သည် နံနက် ၉ နာရီ၌ SAIC-GM- Wuling ကုမ္ပဏီသို့ရောက်ရှိရာ တာဝန်ရှိသူများက EV မော်တော်ယာဉ်ထုတ်လုပ်ရေး စက်ရုံအတွင်း ၌ ဆန်းသစ်တီထွင်ထားသည့် ဉာဏ်ရည်တု နည်းပညာသုံး ကျွန်းပုံစံလမ်းကြောင်းတွင် ရွေ့လျားသွားလာနေသည့် အဆင့်မြင့်စက်ရုပ်များဖြင့် ထုတ်လုပ်သည့်စနစ် (Intelligent Island Manufacturing System) ဖြင့် EV များကို ၁၀ မိနစ် တစ်စီးနှုန်းဖြင့် အလိုအလျောက်ထုတ်လုပ်နေပုံများကို လိုက်လံရှင်းလင်းပြသရာ ဒုတိယဝန်ကြီးက သိရှိလိုသည်များကို ပြန်လည် မေးမြန်းပြီး သုတေသနဖွံ့ဖြိုးရေးနှင့်နည်းပညာ ပြန့်ပွားရေးလုပ်ငန်းများ၊ ပညာရှင်များ ပျိုးထောင်ရေးလုပ်ငန်းများတွင် ပူးပေါင်းဆောင်ရွက်သွားရန်ဆွေးနွေးသည်။

ယင်းနောက် ဒုတိယဝန်ကြီးနှင့်အဖွဲ့သည် ဉာဏ်ရည်တုနည်းပညာသုံး ခရုခေါက်ဆွဲထုတ်လုပ်သော ဟူကွေ့(Hu-Gui) အစားအသောက် ကုမ္ပဏီသို့ရောက်ရှိရာ မန်နေဂျာ Ms Wei Qiuling နှင့် တာဝန်ရှိသူများက စက်ရုံအတွင်း၌ သုတေသနဓာတ်ခွဲ ခန်းများ တည်ထောင်ထားရှိပြီး ကွမ်ရှီးသိပ္ပံနှင့် နည်းပညာတက္ကသိုလ်အပါအဝင် သုတေသနအဖွဲ့အစည်းများနှင့်ပူးပေါင်း၍ ထုတ်ကုန်များ၏ စံအရည်အသွေးကို စဉ်ဆက်မပြတ် ထိန်းသိမ်းဆောင်ရွက်လျက်ရှိကြောင်း၊ ဒေသတွင်းအလုပ်အကိုင်အခွင့်အလမ်းများ ဖော်ဆောင်နိုင်ပြီး တစ်နိုင်ငံလုံးသို့ ပြည်တွင်းစားသောက်ရေးဖူလုံမှုကို အဓိက ထားဖြန့်ဖြူးပေးပြီး e-comm-erce အဖြစ်လည်း ကြိုတင်မှာယူ ရောင်းချရခြင်းများလည်းရှိကြောင်း ရှင်းလင်းတင်ပြရာ ဒုတိယ ဝန်ကြီးက မိမိတို့နိုင်ငံ၌ နိုင်ငံတော်မှ ချမှတ်ထားသော အမျိုးသားရေး ဦးတည်ချက်အတိုင်း အလေးထားဆောင်ရွက်လျက်ရှိသည့် စိုက်ပျိုးမွေးမြူရေးကို အခြေခံသည့် စက်မှုကဏ္ဍ ဖွံ့ဖြိုးတိုးတက်ရေး၊ စားရေရိက္ခာဖူလုံရေးလုပ်ငန်းစဉ်များနှင့်လည်း တူညီပါကြောင်းပြောကြားပြီး ဉာဏ်ရည်တု နည်းပညာအသုံးပြုမှုနှင့် စံအရည်အသွေးနှင့်အညီ ထုတ်လုပ်ရေး လုပ်ငန်းဆိုင်ရာ သိရှိလိုသည်များကို ပြန်လည်မေးမြန်းဆွေးနွေးခဲ့ကြောင်း သိရသည်။

သတင်းစဉ်