ရှမ်းပြည်နယ်၊ ပင်လောင်းမြို့နယ်၊ ဆီဆိုင်မြို့နယ်နှင့် ဟိုပုံးမြို့နယ်တို့၌ ဘိန်းခင်းများ ဖျက်ဆီး

ရှမ်းပြည်နယ်၊ ပင်လောင်းမြို့နယ်၊ ဆီဆိုင်မြို့နယ်နှင့် ဟိုပုံးမြို့နယ်တို့၌ ဘိန်းခင်းများ ဖျက်ဆီး

   ၂၀၂၅ ခုနှစ်၊ ဒီဇင်ဘာ ၆ ရက်က ရှမ်းပြည်နယ်၊ ပင်လောင်းမြို့နယ်၊ ဆီဆိုင်မြို့နယ်နှင့် ဟိုပုံးမြို့နယ်တို့၌ ဘိန်းခင်း စုစုပေါင်း ၆၃ ဧကခန့်အား ဖျက်ဆီးခဲ့ကြောင်း သိရသည်။

   ဖြစ်စဉ်မှာ ဒီဇင်ဘာ ၆ ရက်နေ့ နံနက် ၈ နာရီ ၅၅ မိနစ်မှ ညနေ ၃ နာရီ ၄၀ မိနစ်ထိ ပင်လောင်းမြို့နယ်ရဲတပ်ဖွဲ့မှ တပ်ဖွဲ့ဝင်များနှင့် ဌာနဆိုင်ရာဝန်ထမ်းများပါဝင်သော ပူးပေါင်းအဖွဲ့က ပင်လောင်းမြို့နယ်၊ လိန့်ညားကျေးရွာအုပ်စု၊ ဟန်အင်ကျေးရွာ၏ အနောက်တောင်ဘက် သုံးမိုင်ခန့် အကွာတွင် စိုက်ပျိုးထားသည့် အမြင့် ၂ ပေခွဲခန့်ရှိ ဘိန်းခင်း ၃၈ ဧကခန့်အား လည်းကောင်း။

   အလားတူ နံနက် ၉ နာရီ ၁၀ မိနစ်မှ ညနေ ၃ နာရီထိ ဆီဆိုင်မြို့နယ်ရဲတပ်ဖွဲ့မှ တပ်ဖွဲ့ဝင်များနှင့် ဌာနဆိုင်ရာဝန်ထမ်းများပါဝင်သော ပူးပေါင်းအဖွဲ့က ဆီဆိုင်မြို့နယ်၊ နားခိုက်ကျေးရွာအုပ်စု၊ ထီတန်းကျေးရွာ၏ အရှေ့တောင်ဘက် တစ်မိုင်ခန့်အကွာတွင် စိုက်ပျိုးထားသည့် အမြင့် ၃ ပေခန့်ရှိ ဘိန်းခင်း ၁၄ ဧကခန့်အားလည်းကောင်း။

   ထို့အတူ နံနက် ၈ နာရီ ၅ မိနစ်မှ ညနေ ၄ နာရီ ၁၅ မိနစ်ထိ ဟိုပုံးမြို့နယ်ရဲတပ်ဖွဲ့မှ တပ်ဖွဲ့ဝင်များနှင့် ဌာနဆိုင်ရာဝန်ထမ်းများပါဝင်သော ပူးပေါင်းအဖွဲ့က ဟိုပုံးမြို့နယ်၊ နောင်လိုင်မူဖိတ် ကျေးရွာအုပ်စု၊ ပန်ကုလားကျေးရွာ၏ အရှေ့ဘက် ငါးဖာလုံခန့်အကွာတွင် စိုက်ပျိုးထားသည့် အမြင့် ၂ ပေခန့်ရှိ ဘိန်းခင်း ၁၁ ဧကခန့်အား လည်းကောင်း အသီးသီးဖျက်ဆီးခဲ့ကြောင်း သတင်းရရှိပါသည်။