ပြည်ထောင်စုစာရင်းစစ်ချုပ် ဒေါက်တာခင်နိုင်ဦး ပြည်ထောင်စုစာရင်းစစ်ချူပ်ရုံးကိုယ်စားပြု အားကစားသမားများထံ အောင်နိုင်ရေးအလံပေးအပ်ခြင်းအခမ်းအနားကျင်းပခြင်း

နောက်ဆုံးရသတင်းများ
သတင်းစာများ

ပြည်ထောင်စုစာရင်းစစ်ချုပ် ဒေါက်တာခင်နိုင်ဦး ပြည်ထောင်စုစာရင်းစစ်ချူပ်ရုံးကိုယ်စားပြု အားကစားသမားများထံ အောင်နိုင်ရေးအလံပေးအပ်ခြင်းအခမ်းအနားကျင်းပခြင်း

ပြည်ထောင်စုစာရင်းစစ်ချုပ်ရုံး/ npt / December 09, 2024

ပဉ္စမအကြိမ်အမျိုးသားအားကစားပွဲတော်တွင် ပါဝင်ယှဉ်ပြိုင်ကြမည့် ပြည်ထောင်စု စာရင်းစစ်ချူပ်ရုံး ကိုယ်စားပြုအားကစားသမားများအား အောင်နိုင်ရေးအလံပေးအပ်ပွဲကို ၂၀၂၄ ခုနှစ်၊ ဒီဇင်ဘာလ ၄ ရက်နေ့၊ နေ့လယ် ၁:၃၀ နာရီတွင် နေပြည်တော်ရှိ ပြည်ထောင်စုစာရင်းစစ်ချုပ်ရုံး၊ နဝရတ်ခန်းမ၌ ကျင်းပခဲ့သည်။

အခမ်းအနားသို့ ဒုတိယစာရင်းစစ်ချုပ်၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များနှင့် တာဝန်ရှိသူများ၊ အားကစားအသင်းအုပ်ချုပ်သူ၊ နည်းပြများနှင့် အားကစားသမားများ တက်ရောက်ကြပြီး၊ ရန်ကုန်တိုင်း၊ ရှမ်းပြည်နယ်၊ ဧရာဝတီတိုင်းဒေသကြီးစာရင်းစစ်ချုပ်ရုံး ညွှန်ကြားရေးမှူးများနှင့်တာဝန်ရှိသူများမှ Online ဖြင့် တက်‌ရောက်ခဲ့ကြသည်။

ဦးစွာ ပြည်ထောင်စုစာရင်းစစ်ချုပ် ဒေါက်တာ ခင်နိုင်ဦးက ၂၀၂၄ ခုနှစ် ပဉ္စမအကြိမ် အမျိုးသားအားကစားပွဲတော်၌ ပါဝင်ယှဉ်ပြိုင်ရာတွင် အနိုင်အရှုံးကိုအဓိကမထားပဲ အားကစားနည်းအလိုက် အားကစားစိတ်ဓာတ်အပြည့်အဝထားရှိ၍ ဝိုင်းဝန်းပူးပေါင်းဆောင်ရွက်ကြစေလိုကြောင်း၊ အားကစားသမားအချင်းချင်း စည်းလုံးညီညွတ်စွာဖြင့် သတ်မှတ်ထားသည့် အားကစားနည်းဆိုင်ရာ စည်းမျဉ်းစည်းကမ်းများကို လိုက်နာ၍ နိုင်ငံဂုဏ်ဆောင်အားကစား သမားများဖြစ်စေရေး အကောင်းဆုံးကြိုးစားသွားကြစေလိုကြောင်း ပြောကြားခဲ့သည်။

ထို့နောက်ပြည်ထောင်စုစာရင်းစစ်ချုပ်က အားကစားအသင်းများ၏အဖွဲ့ခေါင်းဆောင်အား အောင်နိုင်ရေးအလံ ပေးအပ်ပြီး အားကစားပစ္စည်း၊ ဆေးဝါးနှင့် အားဖြည့်အစားအစာများကို ဆက်လက်ပေးအပ်ရာ အားကစားနည်းအလိုက် အသင်းခေါင်းဆောင်များက လက်ခံရယူခဲ့ကြသည်။

ပဉ္စမအကြိမ် အမျိုးသားအားကစားပွဲတော်တွင် ပြည်ထောင်စုစာရင်းစစ်ချုပ်ရုံးက ပြေးခုန်ပစ် (အမျိုးသား/အမျိုးသမီး) ၊ ဖူဆယ် (အမျိုးသား) ၊ တန်းကျော်ပြေး (မီတာ ၂၀၀၊ မီတာ ၄၀၀)၊ သံလုံးသံပြားဝိုင်းပစ်နှင့် အပြေး (မီတာ ၂၀၀) စသည့် အားကစားနည်းများတွင် အားကစားအဖွဲ့ဝင် (၂၂) ဦးဖြင့် ပါဝင်ယှဉ်ပြိုင်သွားမည်ဖြစ်သည်။