သထုံမြို့နယ်တွင် ရေကြီးနစ်မြုပ်ပျက်စီးခဲ့သည့် မိုးစပါးစိုက်ဧကများကို စက်မှုလယ်ယာဦးစီးဌာနက ကောက်စိုက်စက်ဖြင့် အခမဲ့ကူညီစိုက်ပျိုးပေး

သထုံမြို့နယ်တွင် ရေကြီးနစ်မြုပ်ပျက်စီးခဲ့သည့် မိုးစပါးစိုက်ဧကများကို စက်မှုလယ်ယာဦးစီးဌာနက ကောက်စိုက်စက်ဖြင့် အခမဲ့ကူညီစိုက်ပျိုးပေး

သထုံ စက်တင်ဘာ ၂၅

မွန်ပြည်နယ်သထုံမြို့နယ် သုဝဏ္ဏဝတီမြို့ သိမ်ဆိပ်ကွင်းတွင် ရေကြီးနစ်မြုပ်ပျက်စီးခဲ့သည့် မိုးစပါးစိုက်ဧကများ အမြန်ဆုံးပြန်လည်အစားထိုး စိုက်ပျိုးပြီးစီးရေးအတွက် မြို့နယ်စက်မှုလယ်ယာဦးစီးဌာနက အဆိုပါကျေးရွာရှိ တောင်သူတစ်ဦး၏ လယ်ယာမြေ၌ ယနေ့နံနက်ပိုင်းတွင် ကောက်စိုက်စက်ဖြင့် အခမဲ့ကူညီစိုက်ပျိုးပေးခဲ့ကြောင်း သိရသည်။

ကူညီစိုက်ပျိုးပေးရာတွင် မြို့နယ်စီမံအုပ်ချုပ်ရေးအဖွဲ့၏ ကြီးကြပ်မှုဖြင့် မြို့နယ်စက်မှုလယ်ယာဦးစီးဌာနမှ ဝန်ထမ်းများက တောင်သူတစ်ဦး၏ လယ်ယာမြေ ခုနစ်ဧက၌ ၁၈ ရက်သား ရွှေသွယ်ရင်မျိုးစပါးလေးတင်းခွဲရှိ ပျိုးဗန်းအချပ်ရေ ၇၀၀ ကို ကောက်စိုက်စက်ဖြင့် အခမဲ့ကူညီစိုက်ပျိုးပေးခဲ့ကြသည်။

သထုံမြို့နယ်အတွင်း မိုးစပါးစိုက်ဧကပေါင်း ၁၃၃၁၁၁ ဧက ရှိသည့်အနက်ပြီးခဲ့သည့် ဇူလိုင်လ စတုတ္ထပတ်မှစတင်ကာ မိုးအဆက်မပြတ် သည်းထန်စွာရွာသွန်းမှုကြောင့် ကျေးရွာအုပ်စု ၂၀ ၌ မိုးစပါးစိုက်ဧက စုစုပေါင်းလေးသောင်းကျော်ခန့် ရေနစ်မြုပ်မှုဖြစ်ပွားခဲ့ကြောင်း၊ ယင်းတို့အနက် ၁၈၈၄၆ ဧက ပျက်စီးခဲ့ရပြီး အဆိုပါပျက်စီးဧကများကို မြို့နယ်စီမံ အုပ်ချုပ်ရေးအဖွဲ့၏ကြီးကြပ်မှုဖြင့် အမြန်ဆုံးပြန်လည် စိုက်ပျိုးလျက်ရှိကြောင်း သိရသည်။

ခရိုင်(ပြန်/ဆက်)