ASEAN Economic Ministers hold the Meetings with U.S., Hong Kong (China), India, EU, Russia Economic Ministers

ASEAN Economic Ministers hold the Meetings with U.S., Hong Kong (China), India, EU, Russia Economic Ministers


ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန/ location / September 14, 2021


နေပြည်တော်၊ စက်တင်ဘာ ၁၄

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦးအောင်နိုင်ဦး သည် ယနေ့ နံနက် ၇:၀၀ နာရီမှ စတင်၍ ဗီဒီယိုကွန်ဖရင့်ဖြင့် ကျင်းပသည့် အာဆီယံ စီးပွားရေးဝန်ကြီးများနှင့် အမေရိကန် ကုန်သွယ်ရေးကိုယ်စားလှယ်တို့ အစည်း အဝေး၊ (၅) ကြိမ်မြောက် အာဆီယံ-ဟောင်ကောင် (တရုတ်) စီးပွားရေးဝန်ကြီးများ အစည်းအဝေး၊ (၁၈) ကြိမ်မြောက် အာဆီယံ-အိန္ဒိယ စီးပွားရေးဝန်ကြီးများ အစည်းအဝေး၊ (၁၇) ကြိမ်မြောက် အာဆီယံ စီးပွားရေးဝန်ကြီးများနှင့် အီးယူ ကုန်သွယ်ရေးကော်မရှင်နာတို့ အစည်းအဝေးနှင့် (၁၀) ကြိမ်မြောက် အာဆီယံ-ရုရှား စီးပွားရေးဝန်ကြီးများ အစည်းအဝေး တို့ကို နေပြည်တော်ရှိ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီးရုံးမှ ပါဝင်တက်ရောက်သည်။

အဆိုပါအစည်းအဝေးများတွင် အာဆီယံစီးပွားရေးဝန်ကြီးများ၊ အမေရိကန်ကုန်သွယ်ရေး ကိုယ်စားလှယ်(ဝန်ကြီး)၊ ဟောင်ကောင် (တရုတ်)၊ အိန္ဒိယ၊ ရုရှားနိုင်ငံတို့မှ စီးပွားရေး ဝန်ကြီးများ၊ အီးယူ ကုန်သွယ်ရေးကော်မရှင်နာ၊ အာဆီယံအတွင်းရေးမှူးချုပ်နှင့် တာဝန်ရှိသူ များ တက်ရောက်ခဲ့ကြသည်။ အစည်းအဝေးများတွင် ဘရူနိုင်းနိုင်ငံ ဝန်ကြီးချုပ်ရုံး ဝန်ကြီးနှင့် ဘဏ္ဍာရေးနှင့် စီးပွားရေးဝန်ကြီး H.E. Dato Dr. Amin Liew Abdullah နှင့် သက်ဆိုင်ရာ ဆွေးနွေးဖက် နိုင်ငံများက ကုန်သွယ်ရေးနှင့် စီးပွားရေးဝန်ကြီးများက ပူးတွဲသဘာပတိများ အဖြစ် ဆောင်ရွက်ခဲ့ကြသည်။

အာဆီယံစီးပွားရေးဝန်ကြီးများနှင့် အမေရိကန် ကုန်သွယ်ရေး ကော်မရှင်နာ တို့ အစည်းအဝေး တွင် အမေရိကန်နိုင်ငံ ကုန်သွယ်ရေး ကိုယ်စားလှယ် H.E. Katherine Tai နှင့် အာဆီယံ စီးပွားရေးဝန်ကြီးများက အာဆီယံနှင့် အမေရိကန်နိုင်ငံတို့အကြား ကိုဗစ်-၁၉ ကပ်ရောဂါကြောင့် စီးပွားရေးလုပ်ငန်းများအတွက် သက်ရောက်မှုများအပေါ် တုံ့ပြန်နိုင်မည့် အစီအစဉ်များ၊ အာဆီယံ-အမေရိကန် ကုန်သွယ်မှုနှင့် ရင်းနှီးမြှုပ်နှံမှု မူဘောင်နှင့် စီးပွားရေးပူးပေါင်း ဆောင်ရွက်မှုအောက်ရှိ ၂၀၂၀-၂၀၂၁ ခုနှစ် လုပ်ငန်းအစီအစဉ် အကောင်အထည်ဖော်ဆောင်ရွက်မှု အပေါ် တိုးတက်မှုအခြေအနေများနှင့် အမေရိကန်နိုင်ငံက အာဆီယံအဖွဲ့ဝင်နိုင်ငံ များအတွက် ပံ့ပိုးပေးလျက်ရှိသည့် နည်းပညာဆိုင်ရာ အကူအညီများအပေါ် အမြင်ချင်းဖလှယ်ဆွေးနွေးခဲ့ သည်။ အစည်းအဝေးတွင် အာဆီယံ-  အမေရိကန် စီးပွားရေးဝန်ကြီးများက အာဆီယံ-အမေရိကန် ကုန်သွယ်မှုနှင့် ရင်းနှီးမြှုပ်နှံမှု မူဘောင် ၂၀၂၁-၂၀၂၂ ခုနှစ် လုပ်ငန်းအစီအစဉ်ကို အတည်ပြုခဲ့ကြသည်။

အစည်းအဝေးတွင် ပြည်ထောင်စုဝန်ကြီးက မြန်မာနိုင်ငံ၏ ကိုဗစ်-၁၉ ကပ်ရောဂါ ကာကွယ်၊ ထိန်းချုပ်မှုနှင့် ကာကွယ်ဆေး ထိုးနှံခြင်းလုပ်ငန်းအခြေအနေများနှင့် ကိုဗစ်-၁၉ ကာလအလွန် စီးပွားရေးလုပ်ငန်းများ ပြန်လည်ထူထောင်ရာတွင် ဒစ်ဂျစ်တယ်ကုန်သွယ်မှုကို ဦးတည် ဆောင်ရွက်သွားရန် လိုအပ်မှုကြောင့် အသေးစား၊ အငယ်စားနှင့် အလတ်စား လုပ်ငန်းများ အတွက် ဒီဂျစ်တယ်ကျွမ်းကျင်မှုဆိုင်ရာ အကူအညီများပံ့ပိုးပေးသွားရန် အလေးပေး ဆွေးနွေးခဲ့ သည်။

ဆက်လက်၍ (၅) ကြိမ်မြောက် အာဆီယံ−ဟောင်ကောင် (တရုတ်) စီးပွားရေးဝန်ကြီးများ အစည်းအဝေးကို ကျင်းပခဲ့ရာ ဟောင်ကောင် (တရုတ်)၊ ကူးသန်းရောင်းဝယ်ရေးနှင့် စီးပွားရေး ဖွံ့ဖြိုးတိုးတက်မှုဝန်ကြီး H.E Mr. Edward Yau Tang-wah နှင့် အာဆီယံစီးပွားရေးဝန်ကြီးများက ကိုဗစ်-၁၉ ကာလအလွန် စီးပွားရေးလုပ်ငန်းများ ပြန်လည်ထူထောင်ရေးအတွက် တုံ့ပြန်မှုဆိုင်ရာ အစီအစဉ်များအပေါ် အမြင်ချင်းဖလှယ်ဆွေးနွေးခဲ့ပြီး အာဆီယံ-ဟောင်ကောင် လွတ်လပ်သောကုန်သွယ်မှု သဘောတူစာချုပ်နှင့် အာဆီယံ-ဟောင်ကောင် ရင်းနှီးမြှုပ်နှံမှု သဘောတူစာချုပ်ကို အဖွဲ့ဝင်နိုင်ငံများအားလုံး အသက်ဝင်မှုအပေါ် ကြိုဆိုခဲ့ကြသည်။ ထို့နောက်ဝန်ကြီးများက အာဆီယံ-ဟောင်ကောင် စီးပွားရေးပူးပေါင်းဆောင်ရွက်မှု အစီအစဉ်တွင် အသစ်ထပ်မံတိုးချဲ့ထည့်သွင်းသည့် နယ်ပယ် (၅) ခုဖြစ်သည့် လူ၊ အပင်နှင့် တိရစ္ဆာန်များ ပိုးမွှားရောဂါကင်းစင်စေရေး (SPS)၊ စံချိန်စံညွှန်းများ၊ နည်းပညာဆိုင်ရာ စည်းမျဉ်းများနှင့် အရည်အသွေးကိုက်ညီမှု စစ်ဆေးသည့် လုပ်ထုံးလုပ်နည်းများ (STRACAP)၊ မူပိုင်ခွင့် (IP)၊ ကုန်သွယ်မှု လွယ်ကူချောမွေ့စေရေးအတွက်ဒစ်ဂျစ်တယ်နည်းပညာနှင့် ရင်းနှီးမြှုပ်နှံမှုမြှင့်တင်ရေးတို့အပေါ် အတည်ပြုခဲ့ပြီး အာဆီယံ- ဟောင်ကောင် စီးပွားရေး ပူးပေါင်းဆောင်ရွက်မှု အစီအစဉ် (၂၀၂၀-၂၀၂၁) အောက်မှ စီမံကိန်းများအကောင်အထည်ဖော် ဆောင်ရွက်မှု တိုးတက်မှုအခြေအနေများကို မှတ်တမ်းတင်ခဲ့သည်။

အစည်းအဝေးတွင် ပြည်ထောင်စုဝန်ကြီးက အာဆီယံ-ဟောင်ကောင် လွတ်လပ်သော ကုန်သွယ်မှု သဘောတူစာချုပ်နှင့် အာဆီယံ-ဟောင်ကောင် ရင်းနှီးမြှုပ်နှံမှုသဘောတူစာချုပ် တို့ အပေါ် ကမ္ဘောဒီးယားနိုင်ငံ၏ စာချုပ်အသက်ဝင်ခြင်းလုပ်ငန်းစဉ် ပြီးမြောက်ခဲ့မှုနှင့် စာချုပ် (၂) ခု အား အဖွဲ့ဝင်နိုင်ငံများအားလုံးက အသက်ဝင်ခဲ့ခြင်းအပေါ်ကြိုဆိုခဲ့သည်။ ထို့နောက် ဟောင်ကောင် (တရုတ်) က ဒေသတွင်းဘက်စုံစီးပွားရေး ပူးပေါင်းဆောင်ရွက်မှု သဘောတူ စာချုပ်သို့ ဝင်ရောက်ရန် စိတ်ဝင်စားမှုအပေါ် ဝန်ကြီးများက ကြိုဆိုခဲ့ကြသည်။

မွန်းလွဲပိုင်းတွင် (၁၈) ကြိမ်မြောက် အာဆီယံ-အိန္ဒိယ စီးပွားရေးဝန်ကြီးများ အစည်းအဝေးကို ကျင်းပခဲ့ရာ အိန္ဒိယနိုင်ငံ၊ ကူးသန်းရောင်းဝယ်ရေးနှင့် စက်မှုဝန်ကြီးဌာနဝန်ကြီး H.E. Anupriya Patel နှင့် အာဆီယံစီးပွားရေး ဝန်ကြီးများက ကိုဗစ်-၁၉ ကပ်ရောဂါကြောင့်ဖြစ်ပေါ်ခဲ့ သည့် စီးပွားရေး သက်ရောက်မှုများကို ကုစားနိုင်ရန်အတွက် ဒေသတွင်း ပူးပေါင်းဆောင်ရွက် မည့်အစီအစဉ်၊ အာဆီယံ-အိန္ဒိယ စီးပွားရေးကောင်စီမှ တင်ပြချက်များနှင့် အာဆီယံ-အိန္ဒိယ ကုန်စည်ကုန်သွယ်ရေး သဘောတူစာချုပ် အကောင်အထည်ဖော်ဆောင်ရွက်မှုတိုးတက်မှုတို့ အပေါ် ဆွေးနွေးခဲ့ကြသည်။

အစည်းအဝေးတွင် ပြည်ထောင်စုဝန်ကြီးက မြန်မာနိုင်ငံ၏ ကိုဗစ်-၁၉ ကပ်ရောဂါ ဖြစ်ပွားမှု အခြေအနေများ၊ ထိန်းချုပ်မှုလုပ်ငန်းစဉ်များ၊ ကာကွယ်ဆေးထိုးနှံရေးလုပ်ငန်းစဉ်များ ဆောင်ရွက်နေမှု အခြေအနေကို မျှဝေခဲ့ပြီး ကိုဗစ်-၁၉ ကပ်ရောဂါအလွန် ပြန်လည် ထူထောင်ရေး လုပ်ငန်းစဉ်များဆောင်ရွက်ရာ၌ ကုလသမဂ္ဂ၏ စဉ်ဆက်မပြတ်ဖွံ့ဖြိုးမှုပန်းတိုင်များ၊ အာဆီယံ ဘက်စုံပြန်လည် ထူထောင်ရေးမူဘောင်နှင့် ဂျီအမ်အက်စ် လုပ်ငန်းအစီအစဉ်များနှင့်အညီ မြန်မာနိုင်ငံ စီးပွားရေးပြန်လည်ဦးမော့စေရေး စီမံချက်ကို ရေးဆွဲဆောင်ရွက်လျက်ရှိကြောင်း ပြောကြားခဲ့သည်။ ထို့ပြင် ပြည်ထောင်စုဝန်ကြီးက ကိုဗစ်-၁၉ ကာကွယ်ဆေးနှင့် အခြား ဆေးပစ္စည်းများ အကူအညီပေးသည့်အတွက် အိန္ဒိယနိုင်ငံကို ကျေးဇူးတင်ကြောင်း ပြောကြား ခဲ့သည်။ အစည်းအဝေးတွင် ပြည်ထောင်စုဝန်ကြီးက မြန်မာ-အိန္ဒိယ နယ်စပ်ကုန်သွယ်ရေးကို ပြန်လည်ဖွင့်လှစ်ပေးရန်နှင့် မြန်မာနှင့်အိန္ဒိယအကြား နယ်စပ် ကုန်သွယ်မှု လွယ်ကူချောမွေ့စေရေးအတွက် အထူးသဖြင့် ကိုဗစ်-၁၉ ကပ်ရောဂါ အလွန် စီးပွားရေး ပြန်လည်ထူထောင်ရန် ကုန်သွယ်ရေးအရာရှိများနှင့် ပုဂ္ဂလိကကဏ္ဍပါဝင်သည့် ပူးတွဲ လုပ်ငန်းကော်မတီတစ်ခု တည်ထောင်ရန် အဆိုပြုခဲ့ပါသည်။ ပြည်ထောင်စုဝန်ကြီး၏ အဆိုပြုချက်ကို အိန္ဒိယနိုင်ငံ စီးပွားရေးဝန်ကြီးက အသိအမှတ်ပြုကြောင်းနှင့် သက်ဆိုင်ရာဌာနများနှင့် ဆွေးနွေးသွားမည်ဖြစ် ကြောင်း ပြန်လည်ဆွေးနွေးခဲ့သည်။

ဆက်လက်၍ (၁၇) ကြိမ်မြောက် အာဆီယံ-အီးယူ စီးပွားရေးဝန်ကြီးများ အစည်းအဝေး ကို ကျင်းပခဲ့ရာ အီးယူ ကုန်သွယ်ရေးကော်မရှင်နာ H.E. Valdis Dombrovskis နှင့် အာဆီယံ စီးပွားရေးဝန်ကြီးများက ကိုဗစ်-၁၉ ကပ်ရောဂါအလွန် စီးပွားရေးလုပ်ငန်းများ ပြန်လည် ထူထောင်ရေးအတွက် တုံ့ပြန်မှုဆိုင်ရာ အစီအစဉ်များကိုလည်းကောင်း၊ ကမ္ဘာ့ကုန်သွယ်ရေး အဖွဲ့၏ အခန်းကဏ္ဍနှင့် အာဆီယံနှင့် အီးယူတို့အကြား လွတ်လပ်သော ကုန်သွယ်မှုဒေသ ထူထောင်ရန်အတွက် ညှိနှိုင်းလျက်ရှိသည့် မူဘောင်ရေးဆွဲခြင်းနှင့် စပ်လျဉ်း၍ ဖြစ်ပေါ် တိုးတက်မှုအခြေအနေများအပေါ်တွင်လည်းကောင်း အမြင်ချင်းဖလှယ် ဆွေးနွေးခဲ့သည်။ ထို့နောက် အာဆီယံ-အီးယူ ကုန်သွယ်မှုနှင့် ရင်းနှီးမြှုပ်နှံမှုလုပ်ငန်းအစီအစဉ် ၂၀၂၀-၂၀၂၁ ကို ဝန်ကြီးများက အတည်ပြုခဲ့သည်။

အစည်းအဝေး၌ ပြည်ထောင်စုဝန်ကြီးက ဆွေးနွေးရာတွင် ကိုဗစ်-၁၉ ကပ်ရောဂါအလွန် စီးပွားရေးလုပ်ငန်းများ ပြန်လည်ထူထောင်ရေးနှင့်စပ်လျဉ်း၍ ကမ္ဘာ့ကုန်သွယ်ရေးအဖွဲ့၏ အခန်းကဏ္ဍမှာ များစွာအရေးပါကြောင်း၊ ကမ္ဘာ့နိုင်ငံများအနေဖြင့် ကုန်စည်နှင့် ဝန်ဆောင်မှုများ အထူးသဖြင့် ဆေးဝါးနှင့် ဆေးပစ္စည်းများ လွယ်ကူစွာ သယ်ယူပို့ဆောင်နိုင်ရေးအတွက် ပူးပေါင်း ဆောင်ရွက်ရန် လိုအပ်ကြောင်း တိုက်တွန်း ဆွေးနွေးခဲ့သည်။

ဆက်လက်၍ (၁၀) ကြိမ်မြောက် အာဆီယံ-ရုရှား စီးပွားရေးဝန်ကြီးများ အစည်းအဝေး ကို ကျင်းပခဲ့ရာ ရုရှားနိုင်ငံ စီးပွားရေးဖွံ့ဖြိုးတိုးတက်မှု ဒုတိယဝန်ကြီး H.E. Vladimir llyichev နှင့် အာဆီယံစီးပွားရေးဝန်ကြီးများက ကိုဗစ်-၁၉ ကပ်ရောဂါအလွန် စီးပွားရေးလုပ်ငန်းများ ပြန်လည်ထူထောင်ရေးအတွက် တုံ့ပြန်မှုဆိုင်ရာ အစီအစဉ်များအပေါ် အမြင်ချင်းဖလှယ် ဆွေးနွေးခဲ့ပြီး ၂၀၁၇ ခုနှစ် အာဆီယံ-ရုရှား ကုန်သွယ်မှုနှင့် ရင်းနှီးမြှုပ်နှံမှု ပူးပေါင်းဆောင်ရွက် ရေးလုပ်ငန်းအစီအစဉ်နှင့် အာဆီယံနှင့်ယူရေရှားစီးပွားရေး ကော်မရှင်တို့အကြား ပူးပေါင်း ဆောင်ရွက်မှုဆိုင်ရာ အစီအစဉ် ၂၀၂၀-၂၀၂၅ ၏ဖြစ်ပေါ်တိုးတက်မှု အခြေအနေတို့ကို မှတ်တမ်းတင်ခဲ့သည်။ ထို့နောက် အသစ်ပြန်လည်ရေးဆွဲသည့် အာဆီယံ-ရုရှား ကုန်သွယ်မှုနှင့် ရင်းနှီးမြှုပ်နှံမှု ပူးပေါင်းဆောင်ရွက်ရေး လမ်းပြမြေပုံနှင့် ၂၀၂၁-၂၀၂၅ လုပ်ငန်းအစီအစဉ်တို့ကို ဝန်ကြီးများက အတည်ပြုခဲ့ကြသည်။

အစည်းအဝေးတွင် ပြည်ထောင်စုဝန်ကြီးက ကိုဗစ်-၁၉ ကပ်ရောဂါအလွန် ဒီဂျစ်တယ် စီးပွားရေးစနစ်နှင့် စဉ်ဆက်မပြတ်ဖွံ့ဖြိုး တိုးတက်မှုဆီသို့ ဦးတည်ဆောင်ရွက်ရာ၌ အာဆီယံ-ရုရှား ကုန်သွယ်မှုနှင့် ရင်းနှီးမြှုပ်နှံမှု ပူးပေါင်းဆောင်ရွက်ရေး လမ်းပြမြေပုံနှင့် ၂၀၂၁-၂၀၂၅ လုပ်ငန်းအစီအစဉ်အောက်ရှိ ပူးပေါင်းဆောင်ရွက်မှုအစီအစဉ်များသည် ကောင်းမွန်သည့် အထောက်အပံ့ကောင်းများဖြစ်ကြောင်း ဆွေးနွေးခဲ့သည်။

အစည်းအဝေးအသီးသီးက ထုတ်ပြန်မည့် ပူးတွဲကြေညာချက်များကို ဝန်ကြီးများက အတည်ပြု ခဲ့ကြသည်။

အဆိုပါ အစည်းအဝေးများသို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ဒုတိယဝန်ကြီးနှင့် အဆင့်မြင့်အရာရှိများလည်း တက်ရောက်ခဲ့သည်။ 

HOT NEWS
January 4,