ကျောက်တံခါး၊ အရာတော်နှင့် ရေစကြိုမြို့နယ်တို့၌ အကြမ်းဖက်တိုက်ခိုက်မှုများ ပြုလုပ်ရာတွင် အသုံးပြုသည့် လက်လုပ်မိုင်းနှင့် ဆက်စပ်ပစ္စည်းများအား တွေ့ရှိသိမ်းဆည်းရမိ

ကျောက်တံခါး၊ အရာတော်နှင့် ရေစကြိုမြို့နယ်တို့၌ အကြမ်းဖက်တိုက်ခိုက်မှုများ ပြုလုပ်ရာတွင် အသုံးပြုသည့် လက်လုပ်မိုင်းနှင့် ဆက်စပ်ပစ္စည်းများအား တွေ့ရှိသိမ်းဆည်းရမိ

     တိုင်းဒေသကြီးနှင့် ပြည်နယ်အသီးသီး၌ အကြမ်းဖက်တိုက်ခိုက်မှုများ မဖြစ်ပေါ်စေရေး၊ နယ်မြေဒေသတည်ငြိမ်အေးချမ်းရေး၊ တရားဥပဒေစိုးမိုးရေးနှင့် ပြည်သူများလုံခြုံအေးချမ်းစွာ နေထိုင်နိုင်ရေးတို့အတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းများအား နေ့ညမပြတ် ဆောင်ရွက်လျက်ရှိပါသည်။

     ထိုသို့ ဆောင်ရွက်လျက်ရှိရာ မေလ ၁၂ ရက်နေ့ နံနက် ၆ နာရီခွဲတွင် ပဲခူးတိုင်းဒေသကြီး၊ ကျောက်တံခါးမြို့နယ်၊ မြို့ချောင်းကျေးရွာအနီး တောမီးများလောင်ကျွမ်းနေကြောင်းသတင်းအရ လုံခြုံရေးတပ်ဖွဲ့ဝင်များက မီးလောင်နေသည့် ပတ်ဝန်းကျင်သို့ သွားရောက်စစ်ဆေးခဲ့ရာ အဆိုပါနေရာရှိ တောင်ကုန်းတစ်ခုပေါ်မှ PDF အမည်ခံအကြမ်းဖက်အဖွဲ့က သိုဝှက်သိမ်းဆည်းထားသည့် LUGER ပစ္စတို ၁ လက်၊ M 22 ၂ လက်၊ AR 15 ကျည်အိမ်တပ်လျက် ၁ လက်၊ M4 ကာဘိုင် ကျည်အိမ်တပ်လျက် ၁ လက်၊ M 16 သေနတ် ၂ လက်၊ လက်လုပ် ၄၀ မမ ဗုံးပစ်လောင်ချာ ၂ လက်၊ ကျည်အိမ်အရှည် ၆ ခု၊ ကျည်အိမ်အတို ၁ ခု၊ M 22 ကျည် ၇ တောင့်တို့အား မီးလောင်ပျက်စီးလျက် တွေ့ရှိသိမ်းဆည်းရမိခဲ့ကြောင်း သိရသည်။

     အလားတူ နံနက် ၈ နာရီခွဲတွင် စစ်ကိုင်းတိုင်းဒေသကြီး၊ အရာတော်မြို့နယ်၊ ဆင်တလဲကျေးရွာ၏ မြောက်ပိုင်းရှိ လူနေထိုင်ခြင်းမရှိသည့် နေအိမ်အတွင်းမှ PDF အမည်ခံ အကြမ်းဖက်အဖွဲ့က သိုဝှက်သိမ်းဆည်းထားသည့် လက်လုပ်သေနတ် ၃ လက်၊ လက်လုပ်မိုင်းမျိုးစုံ ၈ လုံး၊ ဝိုင်ယာကြိုး ၁ ခွေတို့အား တွေ့ရှိသိမ်းဆည်းရမိခဲ့ကြောင်း သိရသည်။

    အလားတူ မွန်းလွဲ ၁ နာရီတွင် မကွေးတိုင်းဒေသကြီး၊ ရေစကြိုမြို့နယ်၊ အမှတ်(၁) ရပ်ကွက်၊ ထင်းတန်းရပ်ရှိ လူနေထိုင်ခြင်းမရှိသည့် နေအိမ်အတွင်းမှ PDF အမည်ခံ အကြမ်းဖက်အဖွဲ့က သိုဝှက်သိမ်းဆည်းထားသည့် သံစလစ်အိုးဖြင့်ပြုလုပ်ထားသည့် လက်လုပ်မိုင်း ၅ လုံးနှင့် ကမ်းနားလမ်းဘေးရှိ သစ်ပင်အောက်မှ PVC ပိုက်ဖြင့် ပြုလုပ်ထားသည့် လက်လုပ်မိုင်း ၂ လုံးတို့အား အသီးသီးတွေ့ရှိ သိမ်းဆည်းရမိခဲ့ကြောင်း သိရသည်။

    အထက်ပါ သိမ်းဆည်းရမိသည့် လက်လုပ်မိုင်းနှင့် ဆက်စပ်ပစ္စည်းများအား စနစ်တကျသိမ်းဆည်းရှင်းလင်းခဲ့ပြီး နယ်မြေဒေသတည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိသည်။