ဒုတိယဝန်ကြီး ဒေါက်တာဇော်မြင့် မော်လမြိုင်တက္ကသိုလ် ကြည့်ရှုစစ်ဆေး

ဒုတိယဝန်ကြီး ဒေါက်တာဇော်မြင့် မော်လမြိုင်တက္ကသိုလ် ကြည့်ရှုစစ်ဆေး

နေပြည်တော် မတ် ၁၉

ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်သည် ယမန်နေ့မွန်းလွဲပိုင်းက မော်လမြိုင် တက္ကသိုလ်သုတေသနစင်တာသို့ သွားရောက်ကြည့်ရှုစစ်ဆေးသည်။

ထိုသို့ ကြည့်ရှုစစ်ဆေးစဉ် ဒုတိယဝန်ကြီးက တာဝန်ရှိသူများအား သုတေသနဓာတ်ခွဲခန်းသုံး ပစ္စည်းများ အမြန်တပ်ဆင်အသုံးပြုရန် မှာကြားသည်။

ထို့နောက် အပန်းဖြေရိပ်သာတည်ဆောက်ရေးလုပ်ငန်းခွင်သို့ ရောက်ရှိပြီး အရည်အသွေးပြည့်မီရေးနှင့် သတ်မှတ်ရက်အတွင်း အချိန်မီပြီးစီးရေးအတွက် ကြီးကြပ်ပေးရန် တာဝန်ရှိသူများအား မှာကြားသည်။

ယင်းနောက် စာကြည့်တိုက်သို့ ရောက်ရှိရာ ဒုတိယဝန်ကြီးက Journal of the Burma Research Society (JBRS) ကို ၁၉၁၁ ခုနှစ်မှ ၁၉၇၈ ခုနှစ်အထိ ထုတ်ဝေခဲ့သည့် သမိုင်းကို ထောက်ရှုလျက် မြန်မာနိုင်ငံတွင် အရည်အသွေးရှိသော သုတေသနဂျာနယ်များ ထုတ်ဝေဖြန့်ချိရန်လိုအပ်ကြောင်း၊ စာအုပ်ကောင်းများ မပျောက်ပျက်အောင် ထိန်းသိမ်းရန်နှင့် လွယ်လင့်တကူ ငှားရမ်းဖတ်ရှုနိုင်ရေး အားပေးရန်လိုအပ်ကြောင်း ပြောကြားသည်။

ဆက်လက်၍ တက္ကသိုလ်ပင်မဆောင်၌ ဘာသာရပ်ဌာန ဆရာ ဆရာမများအား တွေ့ဆုံ၍ နှုတ်ဆက်အားပေးပြီး လက်တွေ့ခန်းများကို စစ်ဆေးကာ ဒုတိယဝန်ကြီးက ကျောင်းသား ကျောင်းသူများ အသုံးပြုသော လက်တွေ့ခန်းသုံးပစ္စည်းများ ခေတ်နှင့်လျော်ညီစေရေးနှင့် ကျောင်းသားတိုင်း ကိုင်တွယ်အသုံးပြုတတ်အောင် လေ့ကျင့်ပေးနိုင်ရန်အတွက် ဖြည့်တင်းပေးရေးတို့နှင့် စပ်လျဉ်း၍ မှာကြားသည်။

ထို့နောက် တက္ကသိုလ်ဝင်းအတွင်း လှည့်လည်ကာ ဥပဓိရုပ်ကောင်းမွန်ရေး၊ သန့်ရှင်းသာယာရေးတို့ကို ကြည့်ရှုစစ်ဆေးခဲ့ကြောင်း သိရသည်။

သတင်းစဉ်