မန္တလေးငလျင်ကြီးဒဏ်သင့် စွမ်းအင်ဝန်ကြီးဌာနမှ ဝန်ထမ်းများနှင့် မိသားစုဝင်များနေထိုင်သည့် ယာယီအဆောက်အအုံများသို့ ပြည်ထောင်စုဝန်ကြီး ဦးကိုကိုလွင် သွားရောက်ကြည့်ရှုစစ်ဆေး

မန္တလေးငလျင်ကြီးဒဏ်သင့် စွမ်းအင်ဝန်ကြီးဌာနမှ ဝန်ထမ်းများနှင့် မိသားစုဝင်များနေထိုင်သည့် ယာယီအဆောက်အအုံများသို့ ပြည်ထောင်စုဝန်ကြီး ဦးကိုကိုလွင် သွားရောက်ကြည့်ရှုစစ်ဆေး

နေပြည်တော် ဩဂုတ် ၂၈

စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်သည် ဒုတိယဝန်ကြီး၊ ပြည်ထောင်စုဝန်ကြီးရုံး ညွှန်ကြားရေးမှူးချုပ်၊ ဝန်ကြီးဌာနကြီးကြပ်မှုအောက်ရှိ ဦးစီးဌာန/လုပ်ငန်းများမှ တာဝန်ရှိသူများနှင့်အတူ ယနေ့ညနေပိုင်းတွင် နေပြည်တော်ကောင်စီနယ်မြေ ဒက္ခိဏသီရိမြို့နယ်ရှိ မန္တလေးငလျင်ကြီးဒဏ်ခံစားခဲ့ရသော စွမ်းအင်ဝန်ကြီးဌာနမှ ဝန်ထမ်းများ နေထိုင်သည့် ယာယီအဆောက်အအုံများသို့ သွားရောက်ကြည့်ရှုစစ်ဆေးသည်။

ဦးစွာ ပြည်ထောင်စုဝန်ကြီးနှင့် အဖွဲ့အား ယာယီအဆောက်အအုံများရှိ ကွပ်ကဲရေးရုံးတွင် တာဝန်ရှိသူများက Modular House နှင့် Container များတွင် ဝန်ထမ်းများနှင့် မိသားစုများအတွက် စီစဉ်ဆောင်ရွက်ထားရှိမှုများကို ရှင်းလင်းတင်ပြရာ ဒုတိယဝန်ကြီးက ဖြည့်စွက်ရှင်းလင်းတင်ပြပြီး ပြည်ထောင်စုဝန်ကြီးက ဝန်ထမ်းများနှင့် မိသားစုဝင်များ နေထိုင်ရာတွင် အဆင်ပြေမှုရှိစေရေးအတွက် လိုအပ်ချက်များကို ဖွဲ့စည်းထားရှိသည့် သက်ဆိုင်ရာ ကော်မတီအသီးသီးမှ အမြဲမပြတ်ဖြည့်ဆည်းဆောင်ရွက်ပေးရန် လိုအပ်ကြောင်းနှင့် ဝန်ထမ်းများ နေထိုင်မှုအဆင်ပြေမှသာ လုပ်ငန်းခွင်အတွင်း စိတ်အေးချမ်းသာစွာဖြင့် လုပ်ငန်းများဆောင်ရွက်နိုင်မည်ဖြစ်ပါကြောင်း၊ ပတ်ဝန်းကျင်သန့်ရှင်းသာယာလှပစေရေး ဝိုင်းဝန်းဆောင်ရွက်သွားကြရန်နှင့် စွန့်ပစ်ပစ္စည်းများကို သတ်မှတ်ထားသော အမှိုက်ကန်များတွင် စနစ်တကျစွန့်ပစ်ကြစေရေးတာဝန်ရှိသူများက ကြပ်မတ်ဆောင်ရွက်ကြရန်၊ ဝန်ထမ်းများအချင်းချင်း စည်းလုံးညီညွတ်စွာဖြင့် လက်ရှိအခြေအနေမှ အမြန်ဆုံးပြန်လည်ရုန်းထနိုင်ရေး စိတ်ဓာတ်ကြံ့ခိုင်စွာ အားထုတ်ကြိုးပမ်းဆောင်ရွက်ကြစေလိုကြောင်း၊ Container House အတွင်း နေထိုင်ကြသည့် ဝန်ထမ်းများအနေဖြင့် အဆောက်အအုံနှင့် ဆက်စပ်ပစ္စည်းများ ပျက်စီးပျောက်ဆုံးမှုမရှိစေရေး ဝိုင်းဝန်းထိန်းသိမ်းဆောင်ရွက်ကြရန် မှာကြားသည်။

ထို့နောက် ပြည်ထောင်စုဝန်ကြီးသည် ယာယီအဆောက်အအုံများတွင် ဝန်ထမ်းများနေထိုင်မှု အခြေအနေ၊ ဝန်ထမ်းများ အပန်းဖြေအနားယူနိုင်ရန် Camp Theater ဆောင်ရွက်ပေးထားမှုအခြေအနေ၊ အမှိုက်များစနစ်တကျစွန့်ပစ်နိုင်ရန် အမှိုက်ပုံးများ စနစ်တကျထားရှိမှု၊ ရေချိုးဆောင်နှင့် အများသုံးသန့်စင်ခန်းများ ကောင်းမွန်စေရေးစီမံဆောင်ရွက်ထားရှိမှု၊ ဝန်ထမ်းများ အဆင်ပြေချောမွေ့စေရေး စားသောက်ဆိုင်နှင့် ကုန်ခြောက်ဆိုင်များ ဖွင့်လှစ်ဆောင်ရွက်ပေးထားမှုအခြေအနေများကို လှည့်လည်ကြည့်ရှုစစ်ဆေးပြီး ဝန်ထမ်းများနှင့် ရင်းရင်းနှီးနှီးတွေ့ဆုံ၍ လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။

သတင်းစဉ်