ရန်ကုန်တိုင်းဒေသကြီး၊ တွံတေးမြို့နယ်နှင့် ရှမ်းပြည်နယ်၊ ရပ်စောက်မြို့နယ်တို့၌ လိုင်စင်မဲ့ မော်တော်ယာဉ်များ ဖမ်းဆီးရမိ

ရန်ကုန်တိုင်းဒေသကြီး၊ တွံတေးမြို့နယ်နှင့် ရှမ်းပြည်နယ်၊ ရပ်စောက်မြို့နယ်တို့၌ လိုင်စင်မဲ့ မော်တော်ယာဉ်များ ဖမ်းဆီးရမိ

    ၂၀၂၅ ခုနှစ်၊ ဇွန် ၁၁ ရက်က ရန်ကုန်တိုင်းဒေသကြီး၊ တွံတေးမြို့နယ်နှင့် ရှမ်းပြည်နယ်၊ ရပ်စောက်မြို့နယ်တို့၌ လိုင်စင်မဲ့ မော်တော်ယာဉ်များ ဖမ်းဆီးရမိခဲ့ကြောင်း သိရသည်။
    ဖြစ်စဉ်မှာ ဇွန် ၁၁ ရက် နံနက် ၉ နာရီ ၂၀ မိနစ်တွင် ရန်ကုန်တိုင်းဒေသကြီး၊ တွံတေးမြို့နယ်၊ တွံတေး-ဒလကားလမ်း ဘုရားငုတ္တိုလမ်းဆုံ၌ တွံတေးမြို့မရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့က ယာဉ်စစ်ဆေးခြင်းများ ဆောင်ရွက်နေစဉ် တွံတေးမြို့မှ ဒလမြို့သို့ ရန်ကုန်တိုင်းဒေသကြီး၊ ကော့မှူးမြို့နယ်၊ အဖျောက်ကျေးရွာနေ မြင့်ထွေး(၅၂)နှစ် မောင်းနှင်လာသည့် YGN-10/3L-XXXX HONDA FIT ခဲရောင်မော်တော်ယာဉ်နှင့် နံနက် ၁၁ နာရီတွင် တွံတေး-လှိုင်သာယာကားလမ်းအတိုင်း လှိုင်သာယာမြို့မှ တွံတေးမြို့သို့ ရန်ကုန်တိုင်းဒေသကြီး၊ တွံတေးမြို့နယ်၊ တမံကြီးကျေးရွာနေ ဇော်မြင့်နိုင်(၅၁)နှစ် မောင်းနှင်လာသည့် YGN-13/6H-XXXX  HONDA FIT အမဲရောင်မော်တော်ယာဉ်အားလည်းကောင်း။
    အလားတူ ဇွန် ၁၁ ရက် ညနေ ၄ နာရီ ၃၀ မိနစ်တွင် ရှမ်းပြည်နယ်(တောင်ပိုင်း)၊ ရပ်စောက် မြို့နယ်၊ ပစောက်ကွေ့ရဲကင်းစခန်းရှေ့၌ ရပ်စောက်မြို့နယ်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့က ယာဉ်စစ်ဆေးခြင်းများ ဆောင်ရွက်နေစဉ် ရပ်စောက်မြို့မှ ရွှေညောင်မြို့သို့ ရှမ်းပြည်နယ်၊ တောင်ကြီးမြို့နေ ရန်နိုင်ဦး(၃၅)နှစ် မောင်းနှင်လာသည့် MDY-13/5H-XXXX HONDA FIT အဖြူရောင်မော်တော်ယာဉ်အားလည်းကောင်း ရပ်တန့်စစ်ဆေးခဲ့ရာ အဆိုပါယာဉ်များနှင့်ပတ်သက်သည့် အထောက်အထားတစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့မော်တော်ယာဉ်များဖြစ်ကြောင်း စစ်ဆေးတွေ့ရှိရသဖြင့် မြင့်ထွေး၊ ဇော်မြင့်နိုင်နှင့် ရန်နိုင်ဦးတို့ သုံးဦးအား သက်ဆိုင်ရာရဲစခန်းများ၌ ပို့ကုန်သွင်းကုန်ဥပဒေပုဒ်မ ၈ ဖြင့် အမှုဖွင့်အရေးယူထားကြောင်း သတင်းရရှိပါသည်။