ရေဘေးသင့်ပြည်သူများအတွက် ကယ်ဆယ်ရေးပစ္စည်းများကို မြန်မာအမျိုးသားလေကြောင်း အခမဲ့သယ်ယူပို့ဆောင်ပေးလျက်ရှိ

ရေဘေးသင့်ပြည်သူများအတွက် ကယ်ဆယ်ရေးပစ္စည်းများကို မြန်မာအမျိုးသားလေကြောင်း အခမဲ့သယ်ယူပို့ဆောင်ပေးလျက်ရှိ

ရန်ကုန် စက်တင်ဘာ ၁၇

မြန်မာအမျိုးသားလေကြောင်း(MNA)အနေဖြင့် ရေဘေးသင့်ပြည်သူများထံသို့ ကူညီထောက်ပံ့လှူဒါန်းထားသော ကယ်ဆယ်ရေးပစ္စည်းနှင့် ဆေးဝါးများကို ပြည်တွင်း၊ ပြည်ပလေယာဉ်ခရီးစဉ်များဖြင့် အခမဲ့သယ်ယူပို့ဆောင်ပေးလျက်ရှိကြောင်း သိရသည်။

ထိုသို့ သယ်ယူပို့ဆောင်ပေးရာတွင် တိုင်ဖွန်းမုန်တိုင်းရာဂီ၏ သက်ရောက်မှုကြောင့် မြန်မာနိုင်ငံရှိ ရေဘေးသင့်ဒေသများအတွက် AHA Centre မှ ပေးပို့သည့် ကယ်ဆယ်ရေးပစ္စည်းအလေးချိန် ၅၅၆၀ ကီလိုဂရမ်ကို ထိုင်းနိုင်ငံ သုဝဏ္ဏဘူမိလေဆိပ်မှ ရန်ကုန်အပြည်ပြည်ဆိုင်ရာလေဆိပ်သို့ ယနေ့နံနက် ၁ နာရီ ၁၂ မိနစ်တွင် Humanitarian Cargo Flight, Boeing 737-800F (9M-WCA) ဘန်ကောက်- ရန်ကုန် (UB-2020) ခရီးစဉ်ဖြင့် သယ်ဆောင်ပေးခဲ့သည်ဟု MNA ၏ ထုတ်ပြန်ချက်အရ သိရသည်။

ထို့အပြင် စက်တင်ဘာ ၁၅ ရက်တွင် စင်ကာပူ- ရန်ကုန်ခရီးစဉ် UB-002 ဖြင့် အဝတ်အထည်များနှင့် အခြားလိုအပ်သည့်ပစ္စည်းများ အလေးချိန် ၄၇၉ ကီလိုဂရမ်ကိုလည်းကောင်း ၊ စက်တင်ဘာ ၁၆ ရက်တွင် ကူညီကယ်ဆယ်ရေးပစ္စည်း အလေးချိန် ၁၉၇ ကီလိုဂရမ်ကိုလည်းကောင်း သယ်ဆောင်ပေးခဲ့ကြောင်း၊ ရေဘေးသင့်ပြည်သူများလက်ဝယ်သို့ ကယ်ဆယ်ရေးပစ္စည်းများ အဆင်ပြေမြန်ဆန်စွာ ကူညီပို့ဆောင်ခြင်းနှင့်ပတ်သက်၍လည်း ဆက်လက်ကူညီအားဖြည့်သွားမည်ဖြစ်ကြောင်း မြန်မာအမျိုးသားလေကြောင်းမှ သိရသည်။

လင်းရာမ