MSME ကဏ္ဍတွင် အလုပ်အကိုင်အခွင့်အလမ်းများရရှိရေး၊ လုပ်ငန်းများဖွံ့ဖြိုးတိုးတက်ရေး၊ စွန့်ဦးတီထွင်မှုများဆောင်ရွက်နိုင်ရေး ဆွေးနွေး

MSME ကဏ္ဍတွင် အလုပ်အကိုင်အခွင့်အလမ်းများရရှိရေး၊ လုပ်ငန်းများဖွံ့ဖြိုးတိုးတက်ရေး၊ စွန့်ဦးတီထွင်မှုများဆောင်ရွက်နိုင်ရေး ဆွေးနွေး

နေပြည်တော် ဩဂုတ် ၂၉

MSME ကဏ္ဍတွင် အလုပ်အကိုင်အခွင့်အလမ်းများရရှိရေး၊ MSME လုပ်ငန်းများဖွံ့ဖြိုးတိုးတက်ရေး၊ စွန့်ဦးတီထွင်မှုများဆောင်ရွက်နိုင်ရေး ဆွေးနွေးပွဲကို ယနေ့နံနက်ပိုင်းတွင် Naypyitaw State Polytechnic University သင်တန်းခန်းမ၌ကျင်းပရာ စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်း၊ သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော်၊ ဌာနဆိုင်ရာတာဝန်ရှိသူများ၊ Naypyitaw State Polytechnic University ပါမောက္ခချုပ်၊ ဆရာဆရာမများ၊ ကျောင်းသား ကျောင်းသူများ၊ MSME လုပ်ငန်းရှင်များနှင့် တာဝန်ရှိ သူများ တက်ရောက်ကြသည်။

ရှင်းလင်းတင်ပြ

ဦးစွာ Naypyitaw State Polytechnic University ပါမောက္ခချုပ်က တက္ကသိုလ်သမိုင်းအကျဉ်း၊ ဘာသာရပ်အလိုက် သင်ခန်းစာများလေ့ကျင့် သင်ကြားပေးနေမှု၊ MSME လုပ်ငန်းများဖွံ့ဖြိုး တိုးတက်ရေးနှင့် စွန့်ဦးတီထွင်မှုများတွင် တက္ကသိုလ်အနေဖြင့် ပူးပေါင်းဆောင်ရွက်နိုင်မည့် အခြေအနေများကို ရှင်းလင်းတင်ပြသည်။

ထို့နောက် ပြည်ထောင်စုဝန်ကြီး ဒေါက်တာချာလီသန်းက မြန်မာနိုင်ငံသည် စိုက်ပျိုးရေးကိုအခြေခံသည့် နိုင်ငံဖြစ်သည့်အတွက် MSME ကို ဖွံ့ဖြိုးတိုးတက်အောင် ဆောင်ရွက်ရာတွင် စိုက်ပျိုးရေးနှင့်ဆက်စပ်သည့်လုပ်ငန်းများကို အဓိကထားစဉ်းစားရန်လိုကြောင်း၊ MSME များအနေဖြင့် မိမိတို့၏ စိုက်ပျိုးရေးဆိုင်ရာ အားသာချက်များကို အခြေခံပြီး တန်ဖိုးမြှင့်ထုတ်ကုန်များ ထုတ်လုပ်နိုင်မည့်လုပ်ငန်းများကို ဆောင်ရွက်ကြမည်ဆိုပါက ကျေးလက်စီးပွားရေးကိုများစွာ တိုးတက်လာစေမည်ဖြစ်ကြောင်း၊ နေ့စဉ်လူသုံးကုန်ပစ္စည်းများကို ပြည်တွင်း၌ထုတ်လုပ်နိုင်ရန် MSME များကို အားပေးခြင်းဖြင့် သွင်းကုန်အစားထိုး ပြည်တွင်းထုတ်ကုန်များကို ဦးစားပေးစေနိုင်ပြီး နိုင်ငံ့ထုတ်လုပ်မှုကိုအားပေးမှုမျိုးဖြစ်လာမည်ဖြစ်ကြောင်း၊ Polytechnic University များ၏ သုတေသနနှင့် ဆန်းသစ်တီထွင်မှုများသည် MSME များအတွက် စီးပွားရေးအခွင့်အလမ်းသစ်များ ဖန်တီးပေးနိုင်ခြင်း၊ ဈေးနှုန်းချိုသာသော နည်းပညာဖြေရှင်းချက်များထောက်ပံ့ပေးခြင်း၊ စီမံခန့်ခွဲမှုနှင့် ဈေးကွက်ရှာဖွေရေးအတွက် အထောက်အကူပြုခြင်းစသည့် အကျိုးကျေးဇူးများရရှိကြောင်း။

Polytechnic University များသည် နိုင်ငံတကာတွင် MSME များနှင့် သုတေသနအဖွဲ့အစည်းများ ချိတ်ဆက်ပေါင်းစည်းရာမှ ဆန်းသစ်တီထွင်နိုင်မှု၊ စွမ်းဆောင်ရည်တိုးတက်မှုနှင့် စီးပွားရေးဖွံ့ဖြိုးမှုကို အထူးအကျိုးရှိစေသကဲ့သို့ မြန်မာနိုင်ငံရှိ Naypyitaw State Polytechnic University သည်လည်း မြန်မာ့ MSME များကို သုတေသန၊ နည်းပညာနှင့် စီးပွားရေး ဈေးကွက်တို့နှင့် ချိတ်ဆက်ပေါင်းစည်းပေးသည့် အဆင့်မြင့်စနစ်တစ်ရပ်ကို ဖော်ဆောင်နိုင်ရေး၊ MSME များနှင့် တက္ကသိုလ်များ၊ သုတေသနဌာနများ၊ စက်မှုဇုန်များ၊ နိုင်ငံတကာမိတ်ဖက်များ ပူးပေါင်းဆောင်ရွက်နိုင်ရေးတို့တွင် ဝိုင်းဝန်းကြိုးစားဆောင်ရွက် ကြစေလိုကြောင်း ဆွေးနွေးပြောကြားသည်။

ထို့နောက် ပြည်ထောင်စုဝန်ကြီး ဒေါက်တာမျိုးသိန်းကျော်က Naypyitaw State Polytechnic University တွင် ကျောင်းသားကျောင်းသူများအနေဖြင့် ဝန်ကြီးဌာနများနှင့် MSME လုပ်ငန်းများတွင် စာတွေ့သာမက လက်တွေ့လေ့လာသင်ယူမည့် အခွင့်အလမ်းများ၊ ရရှိလာမည့် အသိပညာ၊ အခွင့်အလမ်းများကို ရှင်းလင်းပြောကြားသည်။

ယင်းနောက် စက်မှုဝန်ကြီးဌာန ဌာနဆိုင်ရာ တာဝန်ရှိသူများက MSME ကဏ္ဍတွင် အလုပ်အကိုင် အခွင့်အလမ်းများရရှိရေး၊ MSME လုပ်ငန်းများဖွံ့ဖြိုးတိုးတက်ရေး၊ စွန့်ဦးတီထွင်မှုများ ဆောင်ရွက်နိုင် ရေးတို့တွင် Naypyitaw State Polytechnic University နှင့် ပူးပေါင်းဆောင်ရွက်သွားမည့် အခြေအနေ၊ နိုင်ငံပိုင်စက်ရုံများတွင် လာရောက်လေ့လာ သင်ယူနိုင်မည့် အခြေအနေများကိုလည်းကောင်း၊ MSME လုပ်ငန်းရှင်များက Naypyitaw State Polytechnic University နှင့် လက်တွေ့စီးပွားရေးလုပ်ငန်းများတွင် ပူးပေါင်းဆောင်ရွက်သွားမည့် အခြေအနေများကိုလည်းကောင်း ရှင်းလင်းဆွေးနွေးတင်ပြရာ တာဝန်ရှိသူများက လိုအပ်သည်များပေါင်းစပ်ညှိနှိုင်းဆောင်ရွက်ပေးပြီး ပြည်‌ထောင်စု ဝန်ကြီး ဒေါက်တာချာလီသန်းက နိဂုံးချုပ်အမှာစကား ပြောကြားခဲ့ကြောင်း သိရသည်။

သတင်းစဉ်