ကွန်ပျူတာတက္ကသိုလ်(ဘားအံ) (၁၃) ကြိမ်မြောက် ဘွဲ့နှင်းသဘင်အခမ်းအနား ကျင်းပ

ကွန်ပျူတာတက္ကသိုလ်(ဘားအံ) (၁၃) ကြိမ်မြောက် ဘွဲ့နှင်းသဘင်အခမ်းအနား ကျင်းပ

ဘားအံ - မေ (၂၈)

သိပ္ပံနှင့်နည်းပညာဝန်ကြီးဌာန၊ အဆင့်မြင့်သိပ္ပံနှင့်နည်းပညာဦးစီးဌာန ကွန်ပျူတာတက္ကသိုလ်(ဘားအံ)၏ (၁၃)ကြိမ်မြောက် ဘွဲ့နှင်းသဘင်အခမ်းအနားကို မေလ ၂၇ ရက်နေ့ နံနက် ၉ နာရီခွဲခန့်က အဆိုပါတက္ကသိုလ် ဘွဲ့နှင်းသဘင်ခန်းမ၌ ကျင်းပသည်။

ဘွဲ့နှင်းသဘင်အခမ်းအနားတွင် ကရင်ပြည်နယ်အစိုးရအဖွဲ့ ပြည်နယ်ဝန်ကြီး ချုပ်ဦးစောမြင့်ဦးက ဘွဲ့ယူ မောင်မယ်များအနေဖြင့် မိမိတို့တတ်မြောက်သည့်ပညာဖြင့် မိမိဘဝကိုအောင်မြင်အောင်တည်ဆောက်ကြရမည်ဖြစ် သည့်အတွက် မိမိကိုယ်တိုင် မိမိပတ်ဝန်းကျင်၏လူမှုစီးပွားဘဝများဖွံ့ဖြိုးတိုးတက်စေရေးနှင့် လူ့အသိုင်းအဝန်းကို အထောက်အကူပြုနိုင်အောင် ကြိုးစားတည်ဆောက်ကြရန် တိုက်တွန်းလိုကြောင်း၊ မိမိတို့ရွေးချယ်ခဲ့သည့် IT ကျွမ်းကျင်ပညာရှင်တစ်ဦးအဖြစ် ပြောင်းလဲတိုးတက်နေသောနည်းပညာရပ်များကို အမြဲမပြတ်လေ့လာဆည်းပူးရင်း ထူးချွန်ထက်မြတ်သည့် နိုင်ငံ့သားကောင်း၊ သမီးကောင်း IT ပညာရှင်များဖြစ်အောင် ကြိုးစားကြစေလိုကြောင်း ပြောကြားပြီး ဘွဲ့ယူမောင်မယ်များအတွက် ငွေကျပ် သုံးသိန်းရှစ်သောင်းကို ချီးမြှင့်ပေးအပ်သည်။

ထို့နောက် ကွန်ပျူတာတက္ကသိုလ်(ဘားအံ)ပါမောက္ခချုပ်ဒေါက်တာခင်မာလာထွန်းအမှူးပြုသော စီမံခန့်ခွဲရေး အဖွဲ့နှင့်ပညာရေးအဖွဲ့ဝင်ပုဂ္ဂိုလ်များက ဘွဲ့အပ်နှင်းမည့်စင်မြင့်ထက်တွင်နေရာယူကြပြီး လိုအပ်သည့် ကတိခံဝန်ချက်များရယူကာ ကွန်ပျူတာတက္ကသိုလ်(ဘားအံ)ပါမောက္ခချုပ်က ကွန်ပျူတာသိပ္ပံဘွဲ့ Bachelor of Computer Science (B.C.Sc.) (၁၇)ဦး၊ ကွန်ပျူတာနည်းပညာဘွဲ့ Bachelor of Computer Technology (B.C.Tech.) ( ၂ )ဦး တို့အား ဘွဲ့လက်မှတ်များအပ်နှင်းပေးအပ်ပြီး အဝေးရောက်ဘွဲယူသူ ကွန်ပျူတာသိပ္ပံဘွဲ့ Bachelor of Computer Science (B.C.Sc.)မှ ( ၄ ) ဦးနှင့် ကွန်ပျူတာနည်းပညာဘွဲ့ Bachelor of Computer Technology (B.C.Tech.) ( ၃ )ဦး တို့အား ဘွဲ့အပ်နှင်းပေးအပ်ကာ ဘွဲ့ရမှတ်ပုံတင်စာအုပ်တွင် ဘွဲ့ရရှိသူစာရင်းကို အတည်ပြုလက်မှတ်ရေးထိုး၍ ဘွဲ့နှင်းသဘင်မိန့်ခွန်းပြောကြားသည်။

ယနေ့ဘွဲနှင်းသဘင်အခမ်းအနားတွင် အဝေးရောက်ဘွဲ့ယူသူ(၇)ဦးအပါအဝင် စုစုပေါင်း(၂၆)ဦးအား သက်ဆိုင်ရာဘွဲ့အသီးသီးကို အပ်နှင်းခဲ့ပြီး ကရင်ပြည်နယ်ဝန်ကြီးချုပ်ဦးစောမြင့်ဦး၊ ပြည်နယ်တရားလွှတ်တော် တရားသူကြီးချုပ်ဒေါ်ခင်ဆွေထွန်း၊ ပြည်နယ်အစိုးရအဖွဲ့ဝင်များက ဘွဲ့ယူပြီးသူမောင်မယ်များနှင့်၎င်းတို့၏ မိဘ၊ ဆွေမျိုး၊ ညီအစ်ကိုမောင်နှမများအား ရင်းရင်းနှီးနှီးတွေ့ဆုံ၍ အားပေးစကားများပြောကြားခဲ့ပါသည်။