ညောင်လေးပင်မြို့နယ်၌ အကြမ်းဖက်မှုကိုလိုလားသည့် KNU သောင်းကျန်းသူအဖွဲ့နှင့် PDF အမည်ခံအကြမ်းဖက်သမားများက ၂၃၀ ကေဗွီ ဓာတ်အားလိုင်း လျှပ်စစ်တာဝါတိုင်အား မိုင်းထောင်ဖောက်ခွဲဖျက်ဆီး

ညောင်လေးပင်မြို့နယ်၌ အကြမ်းဖက်မှုကိုလိုလားသည့် KNU သောင်းကျန်းသူအဖွဲ့နှင့် PDF အမည်ခံအကြမ်းဖက်သမားများက ၂၃၀ ကေဗွီ ဓာတ်အားလိုင်း လျှပ်စစ်တာဝါတိုင်အား မိုင်းထောင်ဖောက်ခွဲဖျက်ဆီး

      ပဲခူးတိုင်းဒေသကြီး၊ ညောင်လေးပင်မြို့နယ်၌ လျှပ်စစ်ဓာတ်အားပြတ်တောက်စေရန် ရည်ရွယ်၍ အကြမ်းဖက်မှုကို လိုလားသည့် KNU သောင်းကျန်းသူအဖွဲ့နှင့် PDF အမည်ခံ အကြမ်းဖက်သမားများက ၂၃၀ ကေဗွီ ဓာတ်အားလိုင်း လျှပ်စစ်တာဝါတိုင်အား မိုင်းထောင်ဖောက်ခွဲဖျက်ဆီးခဲ့သည်။

     ဖြစ်စဉ်မှာ မေလ ၁၂ ရက်နေ့ နံနက် ၇ နာရီတွင် ပဲခူးတိုင်းဒေသကြီး၊ ညောင်လေးပင်မြို့နယ်၊ မြို့မ(၁)ရပ်ကွက်၊ မွန်စုပိုင်းနှင့် ဘုရားစုပိုင်းကြား စစ်တောင်းမြစ်ကမ်းဘေးရှိ ရွှေကျင် ရေအားလျှပ်စစ်စက်ရုံမှ ကျောက်တံခါးမြို့နယ်၊ သာယာကုန်းဓာတ်အားခွဲစက်ရုံသို့ သွယ်တန်းထားသော ၂၃၀ ကေဗွီ ဓာတ်အားလိုင်း လျှပ်စစ်တာဝါတိုင်အား အကြမ်းဖက်မှုကိုလိုလားသည့် KNU သောင်းကျန်းသူအဖွဲ့နှင့် PDF အမည်ခံအကြမ်းဖက်သမားများက မိုင်းထောင်ဖောက်ခွဲဖျက်ဆီးသွားခဲ့ကြောင်းသတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါနေရာတွင် အကြမ်းဖက်သမားများ၏ မိုင်းထောင်ဖောက်ခွဲဖျက်ဆီးသွားခဲ့မှုကြောင့် တာဝါတိုင်အောက်ခြေ ဒေါက်တိုင် ၄ တိုင် အနက် ဒေါက်တိုင် ၃ တိုင် ပျက်စီးသွားခဲ့ပြီး တာဝါတိုင်ပြိုလဲခြင်းမရှိကြောင်းနှင့် လျှပ်စစ်ဓာတ်အား ပြတ်တောက်ခြင်းမရှိကြောင်း သိရသည်။

     အထက်ပါဖြစ်စဉ်မှ ပျက်စီးသွားသည့် ၂၃၀ ကေဗွီ ဓာတ်အားလိုင်း လျှပ်စစ်တာဝါတိုင်အား ပြုပြင်နိုင်ရေး တာဝန်ရှိသူများက ဆက်လက်ဆောင်ရွက်လျက်ရှိကြောင်းနှင့် လျှပ်စစ်တာဝါတိုင်အား မိုင်းထောင်ဖောက်ခွဲဖျက်ဆီးသွားခဲ့သည့် အကြမ်းဖက်သမားများအား ဖမ်းဆီးအရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိသည်။