နိုင်ငံတော်စီမံအုပ်ချုပ်ရေးကောင်စီ၊ သတင်းထုတ်ပြန်ရေးအဖွဲ့၏ အကြိမ် (၂၀) မြောက် သတင်းစာရှင်းလင်းပွဲ

နိုင်ငံတော်စီမံအုပ်ချုပ်ရေးကောင်စီ၊ သတင်းထုတ်ပြန်ရေးအဖွဲ့၏ အကြိမ် (၂၀) မြောက် သတင်းစာရှင်းလင်းပွဲ


Ministry of Information/ Naypyitaw / September 26, 2022
image_latest


နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့၏ အကြိမ် (၂၀) မြောက် သတင်းစာရှင်းလင်းပွဲကို စက်တင်ဘာ ၂၀ ရက် မွန်းလွဲပိုင်းတွင် ပြန်ကြားရေးဝန်ကြီးဌာန၌ ကျင်းပပြုလုပ်ပြီး နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်း၊ ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးခင်မောင်ဦး၊ ဌာနဆိုင်ရာမှ ပြောရေးဆိုခွင့်ရှိသူများနှင့် ဌာနဆိုင်ရာ သတင်းထုတ်ပြန်ရေးအဖွဲ့ ကိုယ်စားလှယ်များက သတင်းမီဒီယာများ၏ သိရှိလိုသည့် မေးမြန်းမှုများကို ပြန်လည်ဖြေကြားသည်။

(ယမန်နေ့မှအဆက်)

သူရိယနေဝန်းဂျာနယ်မှ CEO ဦးမိုးဟိန်း က ပြီးခဲ့သည့် အရှေ့ဖျားစီးပွားရေးဖိုရမ်သို့ တက်ရောက်ခဲ့သည့် နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ဦးဆောင်သော အဆင့်မြင့်မြန်မာကိုယ်စားလှယ်အဖွဲ့၏ ရရှိခဲ့သည့် ရုရှား-မြန်မာ ချစ်ကြည်ရေးသာမက မြန်မာနိုင်ငံတော်နှင့် ပြည်သူ ၅၅ သန်းအတွက်ရခဲ့သည့် အကျိုးကျေးဇူးရလဒ်များကို ယခုသတင်းစာရှင်းလင်းပွဲမှ ပြည်သူများကိုယ်စား မိမိအနေဖြင့် ကျေးဇူးဥပကာရတင်ရှိ ပါကြောင်းနှင့် ချီးကျူးဂုဏ်ပြုစကားပြောကြား လိုကြောင်း၊ ဗိုလ်ချုပ်မှူးကြီး မင်းအောင်လှိုင် ဦးဆောင်သော ရုရှားသွားသည့် မြန်မာကိုယ်စားလှယ် အဖွဲ့၏အောင်မြင်မှုသည် မည်မျှကြီးမားသလဲ ဆိုလျှင် သမိုင်းစဉ်အရ သုံးသပ်ရမည်ဆိုပါက ၁၉၄၇ ခုနှစ် ဇန်နဝါရီလက ဗိုလ်ချုပ်အောင်ဆန်း ခေါင်းဆောင်သည့် မြန်မာကိုယ်စားလှယ်အဖွဲ့ လန်ဒန်သွားပြီး လွတ်လပ်ရေးဆွေးနွေးပွဲ နောက်ပိုင်းကာလတစ်လျှောက် ၇၅ နှစ်အတွင်းတွင် ဗိုလ်ချုပ်မှူးကြီး မင်းအောင်လှိုင် ဦးဆောင်သည့် မြန်မာကိုယ်စားလှယ်အဖွဲ့၏ အောင်မြင်မှုသည် အကြီးမားဆုံးအောင်ပွဲဟု မိမိအပါအဝင် မိမိတို့ ပြည်သူလူထုအားလုံးက သုံးသပ်နေပါကြောင်း၊ အဘယ်ကြောင့်ဆိုသော် ၁၉၅၃ ခုနှစ် မြန်မာနိုင်ငံတော် ဝန်ကြီးချုပ် သခင်နုနှင့် တရုတ်ပြည်သူ့ သမ္မတနိုင်ငံ ခေါင်းဆောင်ကြီး မော်စီတုန်းတို့ တွေ့ဆုံခဲ့သည့်ပွဲသည်လည်းကောင်း၊ ၁၉၆၆ ခုနှစ် မြန်မာနိုင်ငံတော် ဝန်ကြီးချုပ် ဗိုလ်ချုပ်ကြီး နေဝင်းနှင့် အမေရိကန်သမ္မတ Lyndon B. Johnson တို့ ဝါရှင်တန်ဒီစီတွင် တွေ့ဆုံခဲ့သည့် တွေ့ဆုံဆွေးနွေးပွဲသည်လည်းကောင်း၊ ၁၉၅၅ ခုနှစ်နှင့် ၁၉၅၆ ခုနှစ် ရုရှားခေါင်းဆောင် Nikita Khrushchev နှင့် မြန်မာနိုင်ငံတော်ဝန်ကြီးချုပ် သခင်နုတို့ တွေ့ဆုံခဲ့သည့် ဆွေးနွေးပွဲများသည်လည်းကောင်း၊ ထိုအချိန်၌ သာမန်နိုင်ငံရေး အခြေအနေ အကျဉ်းအကျပ်ကာလမဟုတ်သည့် တည်ငြိမ်သည့်ကာလတွင် ရရှိခဲ့သည့် ထိပ်သီး ဆွေးနွေးပွဲများဖြစ်ကြောင်း။

ယခု ဗိုလ်ချုပ်မှူးကြီး မင်းအောင်လှိုင်နှင့် မြန်မာအဆင့်မြင့်ကိုယ်စားလှယ်အဖွဲ့၏ တွေ့ဆုံမှု သည် မြန်မာနိုင်ငံကို အနောက်အုပ်စုက ဘက်ပေါင်းစုံ အကျပ်အတည်းများ တိုက်ခိုက်နေသည့်ကြားမှ ရုရှားဖက်ဒရေးရှင်းနိုင်ငံသမ္မတ H.E. Vladimir Vladimirovich Putin နှင့် ရုရှားဖက်ဒရေးရှင်းက မြန်မာနိုင်ငံကို လည်းကောင်း၊ ဗိုလ်ချုပ်မှူးကြီး မင်းအောင်လှိုင်နှင့် မြန်မာနိုင်ငံ အဆင့်မြင့်ကိုယ်စားလှယ်အဖွဲ့ကိုလည်းကောင်း ထိုက်ထိုက်တန်တန် ချီးမြှင့်ပြီး မြန်မာနိုင်ငံတော်အတွက် မျှော်လင့်မထားသည့် အလွန်အံ့ဩစရာကောင်းသည့် အောင်မြင်မှုများကို သယ်ဆောင်လာခဲ့သောခရီးစဉ် ဖြစ်သည်ဟု နှိုင်းယှဉ်ပြောကြားလိုကြောင်း၊ မိမိမေးမြန်းလိုသည်မှာ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်၏ ရုရှားခရီးစဉ် တွင်ရရှိခဲ့သည့် အောင်မြင်မှုအတိုင်းအတာကို အဖွဲ့ဝင်အဖြစ်လိုက်ပါသွားသည့် ဗိုလ်ချုပ်အနေဖြင့် မည်ကဲ့သို့ရှုမြင်ကြောင်းနှင့် ရုရှားဖက်ဒရေးရှင်းနိုင်ငံ သမ္မတ H.E. Vladimir Vladimirovich Putin က မြန်မာနိုင်ငံကို လိုအပ်တာမှန်သမျှ မည်သည့်ကိစ္စမဆို လုပ်ပေးနိုင်သည်များအားလုံးကို ကူညီပြီး မြန်မာ့သမိုင်းတစ်လျှောက် အကြီးကျယ်ဆုံး အပြောင်းအလဲတစ်ခုနှင့် မြန်မာနိုင်ငံတွင် လိုအပ်နေသည့် စွမ်းအင်၊ အဏုမြူ၊ အာကာသ၊ စစ်ဘက်ရေးရာ ပူးပေါင်းဆောင်ရွက်မှု၊ ဆေးပညာ၊ စိုက်ပျိုးသီးနှံ၊ လောင်စာဆီကအစ လိုလေသေးမရှိအောင် ပေးအပ်တော့မည်ဆိုသည့် အကုန်လုံးအလုံးအရင်းဖြင့် ရုရှားမှလှိုင်းများ မြန်မာပြည်ကိုဆိုသည်ကို လူထုကမျှော်လင့်နေကြောင်း၊ ယင်းကိစ္စသည် NUG အကြမ်းဖက်အစိုးရကို မြေမြှုပ်သင်္ဂြိုဟ် ရသည့်အဆင့်သို့ ရောက်ရှိသွားပြီလား၊ အနောက် အုပ်စုကြံစည်နေသည့် မြန်မာနိုင်ငံကို ဝိုင်းဝန်းပိတ်ဆို့ရေးဆိုသည့် မျှော်လင့်ချက်၊ အနောက်အုပ်စုက လက်မှိုင်ချသွားရသည်အထိ အောင်မြင်မှုရရှိ သွားပြီလားဆိုသည်ကို ဗိုလ်ချုပ်အနေဖြင့် ဖြေနိုင်သလောက် ဖြေကြားပေးရန် မေးမြန်းသည်။

ဗိုလ်ချုပ် ဇော်မင်းထွန်း က မိမိတို့ ရုရှားခရီးစဉ်နှင့်ပတ်သက်ပြီး ဆောင်ရွက်ခဲ့သည်များကို ပြောကြားခဲ့ပြီးဖြစ်ကြောင်း၊ မိမိသုံးသပ်ချက်အရ မိမိတို့မျှော်လင့်ထားသည်ထက် ပိုမိုအောင်မြင်ခဲ့သည်ဟု ပြောခဲ့ကြောင်း၊ တချို့သော ကမ္ဘာ့ဖြစ်စဉ်၊ ဖြစ်ရပ်များရှိကြောင်း၊ ယခုစီးပွားရေးဖိုရမ်ပြီးလျှင် ဆက်စပ်ပြီးကြည့်ရမည့် လုပ်ငန်းစဉ်သည် ရှန်ဟိုင်း ပူးပေါင်းဆောင်ရွက်ရေးအဖွဲ့ အစည်းအဝေးဖြစ်ကြောင်း၊ ယင်းအစည်းအဝေးတွင် မည်သည့်ကိစ္စ များ သဘောတူညီမှုရရှိပြီး မည်သည့်ကိစ္စများ ဆွေးနွေးသည်ကို ကြည့်ပါက မိမိတို့ခရီးစဉ်၏ ရုပ်လုံးမှာ ပိုကြွလာမည်ဖြစ်ကြောင်း၊ မိမိအနေဖြင့် ပထမဦးဆုံး အလေးအနက်ထားပြောလိုသည်မှာ အရှေ့တောင်အာရှတွင် မြန်မာနိုင်ငံသည် ရုရှား နိုင်ငံအတွက် ကာလရှည်ကြာစွာ စိတ်ချရသည့် မိတ်ဖက်နိုင်ငံဟု ပြောလိုက်ခြင်းဖြစ်ကြောင်း၊ နိုင်ငံရေးလေ့လာသုံးသပ်သူများနှင့် နိုင်ငံတကာရေးရာ လေ့လာသုံးသပ်သူအနေဖြင့် အင်အားကြီး နိုင်ငံကြီးတစ်နိုင်ငံဖြစ်သည့်၊ ကုလသမဂ္ဂ၏ လုံခြုံရေးကောင်စီတွင်ပါဝင်သည့် နိုင်ငံကြီးတစ်နိုင်ငံ ဖြစ်သည့်၊ ကမ္ဘာ့ရေးရာများတွင် ဗီတိုအာဏာဖြင့် အဆုံးအဖြတ်ပေးနိုင်သည့် နိုင်ငံတစ်နိုင်ငံဖြစ်သည့် နိုင်ငံ၏ခေါင်းဆောင်တစ်ယောက်က ယင်းကဲ့သို့ ထုတ်ဖော်ပြောကြားလိုက်ခြင်းသည် မြန်မာနိုင်ငံသည် အရှေ့တောင်အာရှ၊ တောင်အာရှတွင် ဗဟို ချက် ဖြစ်လာမည်ဆိုသည့် အနေအထားမျိုးအထိ အောင်မြင်ခဲ့ကြောင်း။

နောက်တစ်ခုမှာ လုပ်ဆောင်နိုင်မှုဖြစ်ကြောင်း၊ ယင်းသို့လုပ်ဆောင်နိုင်မှုမှာ ယခင်အတိတ်ကို ပြန်ကြည့်ရမည်ဖြစ်ကြောင်း၊ အရှေ့တောင်အာရှ နိုင်ငံများတွင် တချို့သောနိုင်ငံများသည် အာဆီယံတွင် စီးပွားရေးဖွံ့ဖြိုးတိုးတက်သွားသည့် နိုင်ငံများရှိကြောင်း၊ ယင်းနိုင်ငံများကို ပညာရှင်များ၏ သုံးသပ်ချက်အရ ၎င်းတို့ကိုယ်တိုင် ကြိုးစားသဖြင့် တိုးတက်သည်မှာ မှန်ကန်သော်လည်းအခါအခွင့် သင့်သည့်လှိုင်းနှင့် အခါအခွင့်သင့်သည့်လေမိသွားသည့်အတွက် တိုးတက်သွားခြင်းဖြစ်ကြောင်း၊ ဥပမာပြောရလျှင် စင်ကာပူနိုင်ငံနှင့် ထိုင်းနိုင်ငံ၊ တောင်ကိုရီးယား စသည့်နိုင်ငံများ တိုးတက်သော လမ်းကြောင်းပေါ်သို့ ရောက်ရှိသွားကြောင်း၊ ၎င်းတို့ ကိုယ်တိုင်ကြိုးစား၍ တိုးတက်သွားသည်မှာ မှန်ကြောင်း၊ ထို့အပြင် ဗီယက်နမ်စစ်ပွဲနှင့် ကိုရီးယားစစ်ပွဲများတွင် အမေရိကန်က ထိုနိုင်ငံများတွင် အခြေပြုဆောင်ရွက်ခြင်း ဖြစ်သောကြောင့် ထို့အတွက် လိုအပ်သည့် ဒေါ်လာရေစီးကြောင်း မျောလာကြောင်း၊ ထို့ကြောင့် ယင်းနိုင်ငံများက ဒေါ်လာရေစီးကြောင်းအပေါ် တက်စီးခွင့်ရရှိသွားကြောင်း၊ ကျကျနန အသုံးချသွားနိုင်ကြောင်း၊ ထို့ကြောင့် စီးပွားရေးဖွံ့ဖြိုးတိုးတက်သည့်အပြင် တခြားတိုးတက်မှုများလည်းပါကြောင်း၊ ထိုကိစ္စ သည် အကြောင်းအရင်းတစ်ခုဖြစ်ကြောင်း။

ယခုအချိန်တွင် ရုရှားနိုင်ငံအနေဖြင့် အရှေ့ တောင်အာရှဒေသ၊ အာရှပစိဖိတ်ဒေသအပေါ် အာရုံစိုက်လာကြောင်း၊ ယင်းသို့ အာရုံစိုက်လာသည့်အပေါ် ၎င်းကိုယ်တိုင် ထုတ်ဖော်ပြောကြားချက်အရ အရှေ့တောင်အာရှတွင် မြန်မာနိုင်ငံသည် ၎င်းတို့၏ အခိုင်မာဆုံး မိတ်ဆွေနိုင်ငံဟု ပြောခဲ့ကြောင်း၊ မြန်မာနိုင်ငံတွင် ယခင်ကတည်းက ကြိုးပမ်းခဲ့သည်များရှိကြောင်း၊ အာကာသသိပ္ပံ၊ နည်းပညာနှင့်ပတ်သက်ပြီး အဆင့်မြင့်နည်းပညာများ၊ အဏုမြူစွမ်းအင်ကို ငြိမ်းချမ်းစွာအသုံးပြုသည့် နည်းပညာများ စသည်တို့နှင့်ပတ်သက်၍ ရုရှားအနေဖြင့် လိုက်လျောစွာဖြင့် ပစ္စည်းသာမက နည်းပညာများကိုပါ ပေးမည်ဖြစ်ကြောင်း၊ နိုင်ငံခေါင်းဆောင်တစ်ဦးက စိတ်ဝင်စားခြင်းဖြစ်သောကြောင့် မိမိအနေဖြင့် ရုရှားခရီးစဉ်ကို ယခင်ကလည်း လိုက်ပါဖူး၍ ယခုတစ်ခေါက်တွင် ကွဲပြားမှုများရှိကြောင်း၊ ပြည်နယ်များသို့ ရောက်သည့်အချိန်တွင် ၎င်းတို့ပြည်နယ်များသည် ဖက်ဒရေးရှင်းပြည်နယ်ဟု ပြော၍ရကြောင်း၊ ၎င်းတို့၏ အကြီးအကဲများသည် လုပ်ပိုင်ခွင့်များစွာ သီးခြားရှိကြောင်း၊ ၎င်းတို့၏ ကြိုဆိုမှုများသည် ယခုအချိန်တွင် အံ့မခန်းဖြစ်ရသည့် ကြိုဆိုမှုဖြစ်ကြောင်း၊ မိမိတို့ အရှေ့တောင်အာရှနိုင်ငံများ၊ တောင်အာရှနိုင်ငံများတွင် ရုရှားနိုင်ငံသည် အင်အားကြီးနိုင်ငံအနေဖြင့် မြန်မာနိုင်ငံကို အထူးအလေးပေးသည့် နိုင်ငံတစ်ခုအဖြစ် သတ်မှတ်လိုက်ပြီ ဖြစ်ကြောင်း၊ မိမိတို့အနေဖြင့် ဤလှိုင်းလုံးပေါ်၌ ကျကျနနစီးနိုင်ရန် အရေးကြီးကြောင်း။

နောက်တစ်ခုမှာ ရှန်ဟိုင်းပူးပေါင်းဆောင်ရွက် ရေးညီလာခံတွင် တရုတ်သမ္မတနှင့် ရုရှားသမ္မတတို့ တွေ့ဆုံသည့်အချိန်တွင် ပြောခဲ့သည်များရှိကြောင်း၊ ရုရှားနှင့်ပူးပေါင်းဆောင်ရွက်ပြီး အမေရိကန်၏ အာရှပစိဖိတ်နည်းဗျူဟာ၊ မဟာဗျူဟာနှင့် ပတ်သက်ပြီး ၎င်းတို့လုပ်ဆောင်ကြမည့်ကိစ္စများ တွေ့ရမည်ဖြစ်ကြောင်း၊ ၎င်းတို့အနေဖြင့် စစ်ရေး စစ်ရာများ ပူးပေါင်းဆောင်ရွက်မည်၊ တခြားကျန်သည့်ကိစ္စများ ပူးပေါင်းဆောင်ရွက်မည် စသည်တို့ကို ဆွေးနွေးသွားသည်ကို တွေ့ရမည် ဖြစ်ကြောင်း၊ အခါအခွင့်သင့်နေသည့် အချိန်ဖြစ်ကြောင်း၊ ယခုကဲ့သို့ အင်အားကြီးနိုင်ငံ နှစ်နိုင်ငံလုံး၏ အလေးထားမှု အခါအခွင့်သင့်နေသည့် အချိန်တွင် မိမိတို့ကိုထပ်မံပြီး အလေးထားသည့် လုပ်ဆောင်မှုမျိုးများ၊ ပြောဆိုချက်မျိုးများ၊ အလေးထားသည့် လိုက်လျောမှုများ လုပ်ဆောင်နေသည့်အချိန်တွင် မိမိတို့နိုင်ငံသူ နိုင်ငံသားများအနေဖြင့် စည်းလုံးညီညွတ်စွာဖြင့် ယခုလှိုင်းကို အမီစီးနိုင်ရန် လိုသည်ဟု မိမိအနေဖြင့် သုံးသပ်ပြောကြားလိုကြောင်း၊ အနောက်အုပ်စုက ကြံစည်နေသည့် ကိစ္စများနှင့်ပတ်သက်၍ ထိထိရောက်ရောက် အတိုင်းအတာတစ်ခုအထိ မိမိတို့တားဆီးနိုင်သည်ဟု ပြောနိုင်ကြောင်း၊ အနောက်နိုင်ငံများတွင် အခြေစိုက်သည့် မီဒီယာများ၏ ရေးသားမှုများ၊ ၎င်းတို့၏ ပြောဆိုချက်များသည် နောက်ပိုင်းတွင် ထွက်လာသည့် လေသံများကိုကြည့်ပြီး သိနိုင်ကြောင်း ပြောကြားသည်။

သူရိယနေဝန်းဂျာနယ်မှ CEO ဦးမိုးဟိန်းက ယခု ကုလသမဂ္ဂအထွေထွေညီလာခံကို အမေရိကန်နိုင်ငံ နယူးယောက်မြို့တွင် ကျင်းပနေသည့်အချိန်ကို ချိန်ကိုက်ပြီး ကျော်မိုးထွန်းဆိုသည့် ပြည်ပြေး အကြမ်းဖက်ပုဂ္ဂိုလ် မြန်မာနိုင်ငံဆိုင်ရာ ကုလသမဂ္ဂ သံအမတ်နေရာရရှိရေးကို သွေးရူးသွေးတန်းဖြင့် ကြိုးပမ်းနေသည့် အချိန်ကာလကို ချဉ်းကပ်ပြီး စစ်ကိုင်းတိုင်းဒေသကြီး ဒီပဲယင်းမြို့နယ် လက်ယက်ကုန်းကျေးရွာတွင် ဖြစ်သည့်ဖြစ်စဉ်ကို PDF နှင့် NUG ပြည်ဖျက်မီဒီယာများက လှုံ့ဆော်သွေးထိုးပြီး တပ်မတော်ပုံရိပ်၊ နိုင်ငံတော်၏ပုံရိပ်၊ နိုင်ငံတော်စီမံအုပ်ချုပ်ရေးကောင်စီပုံရိပ် ကျဆင်းအောင် ကုလသမဂ္ဂအထွေထွေညီလာခံနှင့် ချိန်ကိုက်ပြီး လုပ်ဆောင်နေသည်ဟု မိမိယူဆပါကြောင်း၊ ယင်းဖြစ်စဉ်ကို တပ်မတော်က သတင်းအတိအကျ ရ၍ KIA နှင့် အကြမ်းဖက်သမားများ လက်နက်သယ်ဆောင်ဖြတ်သန်းရန် လက်ယက်ကုန်း ကျေးရွာအနီးတွင်ထားရှိကြောင်း သတင်းအရ လုံခြုံရေးတပ်ဖွဲ့များကို ရဟတ်ယာဉ်ဖြင့်တင်ဆောင်ပြီး ဝင်ရောက်ရှင်းလင်းသည့်ကိစ္စကို ၎င်းဝါဒဖြန့်နေသကဲ့သို့ ဖြစ်ပေါ်ခဲ့ခြင်း အလျဉ်းမရှိဘဲ ဝါဒဖြန့်နေသည့်ကိစ္စဖြစ်ပေါ်နေကြောင်း၊ ယင်းကိစ္စနှင့်ပတ်သက်ပြီး ကုလသမဂ္ဂအထွေထွေညီလာခံတွင်ချိန်ကိုက်ပြီး သွေးထိုးသည်ဟု မိမိအနေဖြင့်ယူဆပါကြောင်း၊ ထိုကိစ္စနှင့်ပတ်သက်ပြီး မိမိအနေဖြင့် ဥပမာတစ်ခုပေးလိုကြောင်း၊ အမေရိကန်နိုင်ငံက ၁၉၆၈ ခုနှစ် မတ် ၁၆ ရက်တွင် ဗီယက်နမ်နိုင်ငံတောင်ပိုင်း မိုင်းလိုင်ကျေးရွာတွင် ဗီယက်နမ်ရွာသား ၅၀၀ ကို ဗီယက်ကောင်းဟုဆိုကာ အမေရိကန် အမှတ် (၂၀) ခြေမြန်တပ်ရင်းနှင့် အမှတ်(၂၃) ခြေမြန် တပ်ရင်းက အကုန်လုံးကို အစုလိုက် အပြုံလိုက် သတ်ဖြတ်မှုဖြစ်ပွားခဲ့သည့်ကိစ္စသည် ကမ္ဘာတွင် ဘာတစ်ခုမှ ဖြစ်မလာဘဲ ပျောက်ကွယ်သွား ကြောင်း၊ ထိုကဲ့သို့ ပြီးခဲ့သည့် အနှစ် ၂၀ ကာလတွင် အမေရိကန်သည် အာဖဂန်နစ္စတန်၊ ယီမင်၊ အီရတ်၊ အီသီယိုးပီးယား၊ ဆိုမာလီယာနိုင်ငံများတွင် လေကြောင်းဖြင့် ဒုံးတိုက်ခိုက်မှု ၁၄၀၀၀ ကျော် ပြုလုပ်ခဲ့ပြီး အရပ်သား ၂၀၀၀ ကျော်သေဆုံးကာ ကလေးငယ် ၅၀၀ သေဆုံးသည့်ကိစ္စများကို အားလုံးဖုံးထားပြီး ကမ္ဘာပေါ်တွင် ဘာမှထွက်မလာခဲ့ကြောင်း၊ ယခုချိန် တွင် မိမိတို့မြန်မာနိုင်ငံအတွင်းတွင် နိုင်ငံတော်စီမံ အုပ်ချုပ်ရေးကောင်စီနှင့် တပ်မတော်က တည်ငြိမ်မှုရရှိအောင် ကြိုးပမ်းနေသည့်အချိန်တွင် ဖြစ်လာသည့် ဖြစ်စဉ်များအပေါ် မဟုတ်တာများကို ငါးဖယ်က ပြောင်းပြန်၊ သူခိုးကလူဟစ်၊ ဗြောင်လိမ်ဗြောင်စား လုပ်ကာ လက်ယက်ကုန်းကျေးရွာသားများနှင့် ကလေးငယ်များကို လူသားဒိုင်းကာအဖြစ် အသုံးချသည့် အကြမ်းဖက်သမားများ၏လုပ်ရပ်ကို ပြောင်းပြန်လုပ်ကာ တပ်မတော်က လုပ်ပါသည်ဟု ဆိုပြီး ယင်းသို့ဝါဒဖြန့်နေမှုကို မိမိတို့လက်ပိုက်ကြည့်နေ၍ မရတော့ကြောင်း၊ နိုင်ငံတော်တည်ငြိမ်ရေးကြိုးပမ်းသည့်အခါတွင် တပ်မတော်နှင့် နိုင်ငံတော်က ပြည်သူများကိုကာကွယ်ပြီး ပြည်သူတို့၏ဘဝ တည်ငြိမ်ရေးကို ကြိုးပမ်းနေခြင်းကို ပြောင်းပြန်လုပ်ပြီး လူသားဒိုင်းကာလုပ်နေသည့် NUG, PDF အကြမ်းဖက်များကို လက်ယက်ကုန်းကျေးရွာဖြစ်စဉ်ကဲ့သို့ ဝါဒဖြန့်ချက်များအပေါ် NUG ကို ကမ္ဘာ့အင်တာပိုလ်၊ ကမ္ဘာ့အစိုးရများတွင် ချိတ်ဆက်ပြီး မည်သို့ဖမ်းဆီးနိုင်မည်ကို ပြည်သူလူထု ရှင်းလင်းသွားအောင် ဗိုလ်ချုပ်အနေဖြင့် ဖြေကြားပေးစေလိုကြောင်း မေးမြန်းသည်။

ဗိုလ်ချုပ် ဇော်မင်းထွန်း က ထူးခြားချက်အရ ကုလသမဂ္ဂအထွေထွေညီလာခံ ကျင်းပသည့် အချိန် ယခုတွင်သာမက ယခင်နှစ်များတွင်လည်း အနောက်ဘက်တွင် အမြဲတမ်း ပြဿနာမျိုးစုံရှိကြောင်း၊ ယခုနှစ်တွင် တစ်နိုင်ငံနှင့်တစ်နိုင်ငံကြားတွင် အထင်လွဲသည်အထိ ဖြစ်လာကြောင်း၊ ဆက်စပ်ကြည့်ပါက ထိုနေ့မတိုင်မီကြားတွင် ၎င်းတို့စစ်ရေးဆိုင်ရာ ပူးပေါင်းဆောင်ရွက်မှုတစ်ခု လုပ်လိုက်ပြီး နိုင်ငံတကာစစ်တပ်များမှ အရာရှိကြီးများ ဖိတ်ခေါ်ကာ လာတွေ့သည်များရှိကြောင်း၊ အကြောင်းမဲ့မဟုတ်နိုင်ကြောင်း၊ စစ်ကိုင်းတိုင်းဒေသကြီး ဒီပဲယင်းမြို့နယ် လက်ယက်ကုန်းကျေးရွာနှင့်ပတ်သက်ပြီး အတော်များများကို မီဒီယာများတွင် ဖွနေသည်ကို တွေ့ရကြောင်း၊ ဖြစ်စဉ်အမှန်ကို ထိုရက်များက လက်ယက်ကုန်းကျေးရွာသူ ကျေးရွာသားနှစ်ဦး၏ ပြောကြားချက်ကို ဗွီဒီယိုဖြင့် ဖွင့်ပြမည်ဖြစ်ကြောင်း၊ လက်ယက်ကုန်းကျေးရွာတွင် ယခင်ကတည်းက KIA၊ PDF အကြမ်းဖက်အဖွဲ့များ အဝင်အထွက်ရှိကြောင်း၊ ဘေးရွာများတွင်လည်း အဝင်အထွက်ရှိကြောင်း၊ တပ်မတော်ကို ယင်းဒေသခံများက ၎င်းတို့ရောက်ရှိနေသည့် သတင်းကိုပေးကြောင်း၊ တပ်မတော်အနေဖြင့် လုံခြုံရေးအရ ရွာထဲကိုဝင်ရောက်ကာ လုံခြုံရေးဆောင်ရွက်ခြင်းသာရှိကြောင်း၊ ယင်းသို့ဆောင်ရွက်နေစဉ်တွင် PDF အမည်ခံ အကြမ်းဖက်သောင်းကျန်းသူများက ရွာသူ ရွာသားများအကုန်လုံးကို ဘုန်းကြီးကျောင်းသို့ခေါ်သွားပြီး ဘုန်းကြီးကျောင်း အောက်ထပ်တွင်နေခိုင်းကာ လူသားဒိုင်းသဖွယ် အသုံးပြု၍ တပ်ကိုဝိုင်းဝန်းပစ်ခတ်ခဲ့ကြောင်း၊ မိမိတို့တပ်မတော်အနေဖြင့်လည်း ပြန်လည်ပစ်ခတ်ခဲ့ရသည်များရှိကြောင်း။

ထွက်ဆိုချက်အရ ထိုဘုန်းကြီးကျောင်းအောက်တွင် ၎င်းတို့နေခဲ့ရကြောင်း၊ နောက်ဆုံးတိုက်ပွဲ ပြီးသွားသည့်အချိန်တွင် အကြမ်းဖက်သမားများ ထွက်ပြေးသွားသည့်အခါ ဘုန်းကြီးကျောင်းအောက်တွင် ကလေးသူငယ်များ ကျန်နေခဲ့ကြောင်း၊ လူနာများ ကျန်ခဲ့ကြောင်း၊ ၎င်းတို့ကို မိမိတို့ကယ်ဆယ်ပြီး ကလေးငယ်နှစ်ယောက် ဒဏ်ရာပြင်းထန်နေသောကြောင့် ရဟတ်ယာဉ်ဖြင့် ချက်ချင်းစစ်ဆေးရုံကို ပို့ဆောင်ခဲ့ကြောင်း၊ ရေဦး၊ ဒီပဲယင်းဆေးရုံတို့တွင် ယခုအချိန်အထိ ဆေးကုသမှုခံယူနေရသူများရှိကြောင်း၊ တချို့ကောက်ကျစ်သည့် မီဒီယာများ ဘုန်းကြီးသတ်၊ သီလရှင်သတ်၊ အရပ်သား သတ်နေသည့်သူများက ဘာရေးထားသလဲဆိုလျှင် ထိုဘုန်းကြီးကျောင်းတွင် PDF များနှင့် ထိုရပ်ရွာက ယဉ်ကျေးလိမ္မာသင်တန်းဖွင့်နေသည်ကို ဘာမျှမရှိဘဲနှင့် တပ်က လာပစ်ခတ်ခြင်းဖြစ်သည်ဟု ရေးသားထားကြောင်း၊ လွန်စွာကလိမ်ကကျစ်ကျသည့် လုပ်ရပ်များဖြစ်ကြောင်း၊ ၎င်းတို့ကဲ့သို့ အကြမ်းဖက်သတ်ဖြတ်သူများက ယဉ်ကျေးလိမ္မာ သင်တန်းဖွင့်လှစ်သည်ဆိုသဖြင့် “ဘာများ သင်သလဲ” ဟူ၍ တကူးတက သွားရောက်လေ့လာ သင့်သည့်အနေအထားမျိုးပင် ဖြစ်နေကြောင်း၊ လူများကိုလည်း တပ်မှဓားစာခံအဖြစ်ခေါ်ဆောင်သွားသည်ဟု မဟုတ်တရုတ် ရေးထားကြောင်း၊ ထိခိုက်ဒဏ်ရာရရှိသည့် ဒေသခံလူနာများကို ဆေးကုသပေးနေမှု၊ ထောက်ပံ့ပေးနေမှု မှတ်တမ်းများကိုပြသပြီး ပုံများကိုလည်း မီဒီယာများကို ပေးမည်ဖြစ်ကြောင်း ပြောကြား၍ ကျေးရွာမှ ဒေသခံများ၏ ပြောဆိုချက်ဗီဒီယိုကို ဖွင့်လှစ်ပြသသည်။

အဆိုပါ Video File တွင် ပါဝင်သူများသည် ဖြစ်စဉ်တွင် အမှန်တကယ်ပါဝင်သူများဖြစ်ပြီး ဆေးကုသမှုခံယူနေသူများ ဖြစ်ပါကြောင်း၊ ဦးမိုးဟိန်း ပြောသကဲ့သို့ အထွေထွေညီလာခံ ရှိလာပြီဆိုပါက ကုန်ကြမ်းရှာကြခြင်းဖြစ်ပြီး တချို့လည်း ကုန်ချောထုတ်ပြီးသားရှိပါကြောင်း၊ ထို့ကြောင့် ယခုဖြစ်စဉ်မျိုး လုပ်ကြံမှုများ ဖြစ်ပေါ်လာခြင်းဖြစ်ပါကြောင်း၊ ပြည်သူလူထုအနေဖြင့် သိရှိပြီး မီဒီယာများအနေဖြင့် မှန်ကန်သည့်ဘက်က၊ မိမိတို့နိုင်ငံဘက်က ရပ်တည်သွားနိုင်ရေး ကြိုးပမ်းဆောင်ရွက်ကြရန် မိမိအနေဖြင့် ပြောလိုပါကြောင်း ဖြေကြားသည်။

Bullet ဂျာနယ်မှ ထုတ်ဝေသူ ဦးလှဆွေ က ယခင်ကလည်း မေးဖူး၊ ဖြေဖူးခဲ့သည့် မေးခွန်းတစ်ခု ဖြစ်ပါကြောင်း၊ NLD လက်ထက်က မြန်မာနိုင်ငံက လွှဲလိုက်သည်ဟုဆိုသည့် ဒေါ်လာ ၁ ဘီလီယံကိစ္စ ဖြစ်ပါကြောင်း၊ ၁ ဘီလီယံသည် အမေရိကန်ဘဏ်ကိုရောက်သွားသည်၊ လွှဲလိုက်သည်မှာ သေချာပါကြောင်း၊ စာရင်းဇယားသာ ရောက်သွားသည်ဆိုသော်လည်း NUG က မရမက တောင်းနေသည်ကို မိမိတို့တွေ့ရပါကြောင်း၊ တစ်ပဲခြောက်ပြားအလှူငွေဖြင့် လက်နက်ဝယ်နေသည်ကိုပင် အပြစ်မဲ့ပြည်သူများ သေနေသည်ကို တွေ့ရကြောင်း၊ အကယ်၍သာ ၁ ဘီလီယံကို ၎င်းတို့ရသွားပါက အတောမသတ်နိုင်သည့် သတ်ဖြတ်မှုများ ဖြစ်လာနိုင်သည့် အလားအလာ ရှိပါကြောင်း၊ ထို့ကြောင့် သွားလွှဲသူက မည်သူ၊ ယင်းကဲ့သို့လွှဲရန် အမိန့်ပေးသူက မည်သူ ဖြစ်ကြောင်း၊ ထိုသို့စာရင်းဇယားလွှဲသည်ဆိုပါက ဥပဒေနှင့်ညီပါသလား၊ မညီပါက မည်သို့အရေးယူ ရန်ရှိသည်ကို သိလိုပါကြောင်း၊ မြန်မာပြည်နှင့် ဘင်္ဂလားဒေ့ရှ် အကြားတွင် Zero Zone ဟု ရှိပါ ကြောင်း၊ ယင်း Zero Zone သည် နှစ်ဖက်စလုံး မလာရသည့် ကြားနေရာဖြစ်ပါကြောင်း၊ ယင်းနေရာတွင် ထွက်ပြေးသွားသည့် ဘင်္ဂါလီအချို့က အခြေချ နေခြင်းများရှိပါကြောင်း၊ NLD လက်ထက်က ယင်းနေရာကိုမနေရန် ဘင်္ဂလားဒေ့ရှ်အစိုးရကို ပြောခဲ့သော်လည်း လက်မခံဘဲပယ်ချခဲ့သည်ဟု မိမိတို့သိရှိရပါကြောင်း၊ Zero Zone ထဲတွင် ARSA များရှိနေသည်ကို အိန္ဒိယထောက်လှမ်းရေးက သတင်းပေးသော်လည်း ပယ်ချခဲ့သည်ကို မိမိသိရှိ ထားပါကြောင်း၊ ထို့ကြောင့် Zero Zone ထဲတွင် ယခုချိန်ထိရှိနေသည့်ဘင်္ဂါလီများကို မည်သည့်နည်းဖြင့် ဖယ်ရှားခိုင်းမည်ကို သိလိုပါကြောင်း၊ တစ်ဆက်တစ်စပ်တည်း ဖြစ်သည့်အတွက် မိမိတို့ဘက်ကပဲ အင်အားသုံးဖယ်ရှားမည်လား၊ ယခုအတိုင်း အလျှော့ပေးပြီး ဆက်နေခွင့်ပေးမည်လား၊ AA က ပစ်လိုက်သည့်အတွက် သေဆုံးသွားသည့် ဘင်္ဂါလီသည် ယင်း Zero Zone ထဲကဟု သိရပါကြောင်း၊ Zero Zone ထဲကကိစ္စများသည် နှစ်နိုင်ငံ ဆက်ဆံရေး၏ မီးပွားများဟု မိမိအနေဖြင့် မြင်ပါကြောင်း၊ Zero Zone အတွင်းရှိသည့် ဘင်္ဂါလီများကို မည်ကဲ့သို့ဖယ်ရှားမည်ကို သိလိုပါကြောင်း၊ ဘင်္ဂလားဒေ့ရှ်နယ်မြေအတွင်းတွင် AA စခန်းသုံးခု ရှိသည်ဟု ထောက်ပြထားသည်ကို တွေ့ရပါကြောင်း၊ ယင်းစခန်းသုံးခု ဖယ်ရှားပေးရန် ပြောသကဲ့သို့ Zero Zone အတွင်းက ဒုက္ခသည် စခန်းများကို ပင်မဒုက္ခသည်စခန်းများနှင့် သွားပေါင်းပြီးထားရန်အတွက် ဘင်္ဂလားဒေ့ရှ်အစိုးရကို တောင်းဆိုရန် ရှိ/ မရှိ သိလိုပါကြောင်း။

တပ်မတော်က ခေါ်ယူနေသည့်သင်တန်းများရှိပါကြောင်း၊ အထူးသဖြင့် ကွန်ပျူတာသင်တန်း၊ တပ်ကြပ်ကြီး/စာရေးသင်တန်း စသည့်သင်တန်းများတွင် အသက်ကန့်သတ်ချက်များကို (ကိုဗစ်-၁၉ ရောဂါကြောင့် နိုင်ငံရေးအခြေအနေများကြောင့်) တစ်နှစ်တန်သည်၊ နှစ်နှစ်တန်သည် လျှော့ပေးသင့်ကြောင်းကို မိမိအနေဖြင့် အကြံပြုတင်ပြလိုပါကြောင်း၊ တချို့သည် တပ်မတော်ထဲဝင်ရန် ဆန္ဒပြင်းပြပြီး အသက်ခြောက်လခန့် ကျော်သွားခြင်း ရှိပါကြောင်း၊ အရာရှိသင်တန်းများကို အသက်ကန့်သတ်ချက်ထားသည်ကို မဆိုလိုသော်လည်း အခြားအဆင့် သင်တန်းများကို ဖြေလျှော့ပေးရန် ဖြစ်နိုင်ပါသလား သိလိုပါကြောင်း မေးမြန်းသည်။

ဗိုလ်ချုပ် ဇော်မင်းထွန်း က ၁ ဘီလီယံကိစ္စနှင့်ပတ်သက်၍ တာဝန်ရှိသူများအနေဖြင့် စုံစမ်း စစ်ဆေးဆဲဟု ပြောလိုပါကြောင်း၊ စာရင်းမဲ့ပြုလုပ်ခဲ့သည့်အတွက် လုပ်ပိုင်ခွင့်ကျော်လွန်ခြင်း ရှိ၊ မရှိ များနှင့်ပတ်သက်ပြီး အချိန်တန်ရင်သိရပါမည်ဟု ပြောလိုပါကြောင်း၊ ဘင်္ဂလားဒေ့ရှ်- မြန်မာနယ်ခြားကိစ္စနှင့်ပတ်သက်ပြီး မြန်မာမီဒီယာအများစုကိုပါ မိမိအနေဖြင့် မေတ္တာရပ်ခံလိုသည်မှာ Zero Zone ဆိုသည့် အသုံးအနှုန်းသည် ဘင်္ဂလားဒေ့ရှ်ဘက်က လိုချင်နေသည့်အသုံးအနှုန်း၊ တချို့သော အဖွဲ့ အစည်းများက လိုချင်နေသည့် အသုံးအနှုန်းဖြစ်ပါကြောင်း၊ Zero Zone ကို မိမိတို့မီဒီယာများအနေဖြင့် နောင်တွင်မသုံးကြရန်ပြောလိုပါကြောင်း၊ အဓိပ္ပာယ် များစွာပါသည့် အသုံးအနှုန်းဖြစ်ပါကြောင်း၊ ၎င်းတို့က လိုချင်သည့်အတွက် Zero Zone ဟု သုံးခြင်း ဖြစ်ပါကြောင်း၊ နှစ်နိုင်ငံနယ်ခြားတွင် Zero Zone ဟူ၍မရှိကြောင်း၊ မြန်မာ-ဘင်္ဂလားဒေ့ရှ် နှစ်နိုင်ငံတွင် နယ်စပ်ထိစပ်မှုက ၁၆၈ ဒသမ ၅၇ မိုင်ခန့် ရှိပါကြောင်း၊ အားလုံးတိုင်းပြီးဖြစ်ပြီး စာချုပ်နှစ်ခုရှိပါကြောင်း၊ ၁၉၈၀ စာချုပ်နှင့် ၁၉၉၈ စာချုပ် ဟူ၍ရှိပါကြောင်း၊ ၁၉၈၀ စာချုပ်ကို အနှစ်ချုပ်ပြီး ပြောရမည်ဆိုပါက နယ်ခြားဒေသတွင် နယ်စပ်မျဉ်း၏ ကိုက် ၅၀၀ အတွင်းတွင် အစိုးရဝန်ထမ်းများမှအပ လက်နက်ကိုင်အရပ်သားများ ဝင်ခွင့်မပြုဟု နှစ်နိုင်ငံသဘောတူပြီးဖြစ်ပါကြောင်း၊ ၁၉၉၈ သဘောတူညီချက်ဆိုသည်မှာ ၁၂-၁၁-၁၉၉၈ တွင် ကုန်းတွင်းနယ်နိမိတ်စာချုပ် ချုပ်ဆိုခဲ့ပါကြောင်း၊ နှစ်နိုင်ငံနယ်စပ်၏ တစ်ဖက် ပေ ၁၅၀ အတွင်း မည်သည့်အဆောက်အအုံမျှ ဆောက်လုပ်ခွင့်မရှိပါကြောင်း၊ နယ်ခြားဒေသစည်းမျဉ်း ဖြစ်ပါကြောင်း၊ Zero Zone နှင့် လုံးဝမသက်ဆိုင်ပါကြောင်း၊ မြန်မာနိုင်ငံမှ မြန်မာ-ဘင်္ဂလားဒေ့ရှ်နယ်စပ်တွင် နယ်စပ်ခြံစည်းရိုးဆောက်ပါကြောင်း၊ ယင်းနယ်စပ် ခြံစည်းရိုးသည် စည်းမျဉ်းနှင့်အညီ ဆောက်လုပ်ခြင်း ဖြစ်ကြောင်း၊ နယ်စပ်ခြံစည်းရိုး၏ နောက် ပေ ၁၅၀ သည် မြန်မာနိုင်ငံ၏နယ်နိမိတ်သာဖြစ်ကြောင်း၊ နယ်စပ်မျဉ်း၏နောက် ပေ ၁၅၀ ဆုတ်ပြီး ဆောက်ထားခြင်းဖြစ်ကြောင်း၊ တချို့နေရာများတွင် စာချုပ်များရှိပြီးဖြစ်သည့်အတွက် လိုက်နာနိုင်ရေး ဆောင်ရွက်လျက်ရှိပါကြောင်း။

နိုင်ငံခြားရေးဝန်ကြီးဌာန တာဝန်ရှိသူများအနေဖြင့် ARSA စခန်းများ ယင်းတို့အထဲတွင် ရှိနေသည်များကို အသိပေးခဲ့ခြင်းများရှိပါကြောင်း၊ ARSA သည် ယခင် မောင်တောဒေသတွင် ပဋိပက္ခများဖြစ်ပွားစဉ်ကပင် ထွက်ပြေးသူများသည် မည်သည့်နေရာတွင်နေကြောင်း၊ အထောက်အထားအပြည့်အစုံဖြင့် ၎င်းတို့နိုင်ငံအတွင်းတွင် လှုပ်ရှားနေသည့်ပုံများ၊ ၎င်းတို့နိုင်ငံအတွင်း ဆောင်ရွက်နေသည့်ပုံများ၊ ၎င်းတို့နိုင်ငံအတွင်း မည်သည့်နေရာတွင် ရှိသည်ဆိုသည့် အထောက်အထားကို ဘင်္ဂလားဒေ့ရှ်ကို အမြဲပေးပါကြောင်း၊ ဘင်္ဂလားဒေ့ရှ်ဘက်ကလည်း မိမိတို့ဘက်အတွင်းရှိသည်များကို ပေးပါကြောင်း၊ မိမိတို့အနေဖြင့် အိမ်နီးနားချင်းနိုင်ငံများနှင့် ဆက်ဆံရေးမူဝါဒသည် မိမိတို့အိမ်နီးနားချင်းနိုင်ငံများကို ဆန့်ကျင်ပြီး နေသည့်အဖွဲ့အစည်းများကို မြန်မာမြေထဲတွင် အခြေချခွင့်မပေးပါကြောင်း၊ အခြားနိုင်ငံများကလည်း အလားတူ တုံ့ပြန်နိုင်မှုရှိရန် လိုပါကြောင်း၊ ၁၉၈၀ ပြည့်နှစ် ပူးပေါင်းဆောင်ရွက်ရေး သဘောတူစာချုပ်၊ ၁၉၉၈ ခုနှစ် ကုန်းတွင်းပိုင်းနယ်နိမိတ် စာချုပ်များတွင် စာချုပ်ပါအတိုင်း နှစ်နိုင်ငံသည် အချုပ်အခြာအာဏာပိုင်နိုင်ငံများပီသစွာ လိုက်နာ သွားရန်လိုအပ်သည်ဟုပြောလိုပါကြောင်း၊ လိုက်နာမှုများနှင့် ပတ်သက်ပြီး ချို့ယွင်းချက်များ၊ ချိုးဖောက်မှုများရှိခဲ့ပါက နိုင်ငံတော်အစိုးရအနေဖြင့် နိုင်ငံခြားရေးဝန်ကြီး ဌာနနှင့် ပြောဆိုခြင်း၊ ထောက်ပြခြင်းများကို ဆက်လက်ပြီး သံတမန်ရေးရာနည်းလမ်းများနှင့်အညီ ဆောင်ရွက်သွားမည်ဖြစ်ကြောင်း၊ တပ်ကြပ် ကြီး/စာရေးကိစ္စကို သက်ဆိုင်ရာဌာနများနှင့် ပြန်တင်ပြပြီး ပြန်လည်ညှိနှိုင်းပြီး ဆောင်ရွက်ပေး မည်ဖြစ်ကြောင်း၊ ယခင်ကလည်း ဗိုလ်သင်တန်း ခေါ်သည့်အချိန်တွင် စစ်တက္ကသိုလ်၊ တပ်မတော်ဆေးတက္ကသိုလ်၊ တပ်မတော်အင်ဂျင်နီယာ တက္ကသိုလ်ခေါ်သည့်အချိန်တွင် ခြောက်လတိုးမြှင့် သတ်မှတ်ပေးခဲ့ပါကြောင်း၊ တချို့သည် အကန့်အသတ်များရှိနိုင်ပါကြောင်း၊ ညှိနှိုင်းဆောင်ရွက်ပေးနိုင်ရန် ဆောင်ရွက်ပေးမည်ဟု ပြောလိုပါကြောင်း ပြန်လည်ဖြေကြားသည်။

Trend ဂျာနယ်မှ သတင်းထောက်ချုပ် Online ဝဏ္ဏ က NUG ဝန်ကြီးဖြစ်သည့် လွင်ကိုလတ်သည် ပြီးခဲ့သည့်ရက်ပိုင်းတွင် Non-CDM များကို အကြမ်းဖက်ဥပဒေနှင့် တရားစွဲမည်၊ ဖမ်းဝရမ်း ထုတ်မည်ဟု ပြောဆိုခဲ့ကြောင်း၊ နောက်ပြီး NUG ကို ထောက်ခံသည့်တစ်ယောက်ကလည်း Non-CDM များကို သတ်ဖြတ်သည်အထိ ပြောဆိုကြောင်း၊ NUG အဖွဲ့သားများဘက်မှလည်း အလားတူ ခြိမ်းခြောက်ခြင်းများရှိကြောင်း၊ ထိုသို့ ဝေဖန်ပြောဆိုမှုများ ထွက်လာကြောင်း၊ ထူးခြားသည်မှာ လွင်ကိုလတ်အပါအဝင် ပြောဆိုခဲ့သူသည် ၎င်းတို့အခေါ်အဝေါ် (စကစ)က လွှတ်ထားသည့်သူများဟု စွပ်စွဲပြောဆိုမှုများရှိကြောင်း၊ နိုင်ငံတော်စီမံအုပ်ချုပ် ရေးကောင်စီမှ NUG ဘက်သို့ တစ်နည်းအားဖြင့် သူလျှိုများစေလွှတ်ထားခြင်း ရှိ၊ မရှိ သိလိုပါကြောင်း မေးမြန်းသည်။

ဗိုလ်ချုပ် ဇော်မင်းထွန်း က ယင်းကိစ္စများ ရှိလျှင်ပင် ပြော၍မရကြောင်း၊ မရှိဘူးဟုလည်း ပြောမရကြောင်း၊ နိုင်ငံတော်လုံခြုံရေးနှင့် ပတ်သက်လျှင် နိုင်ငံတော်အဆင့် လုပ်သင့်လုပ်ထိုက်သည်များကို မျိုးစုံလုပ်ဆောင်ကြောင်း၊ တချို့သော ဇာတ်လမ်းများကို အချိန်တန်မှသိရကြောင်း၊ မော့ဆက်က နာမည်ကြီးသည့် အလီကိုဟင်သည် အာရပ်နိုင်ငံများကို ထိုးဖောက်ခဲ့ကြောင်း၊ အနည်းဆုံး သမ္မတအကြံပေး၊ ဝန်ကြီးချုပ်အကြံပေးအထိ ဖြစ်သွားကြောင်း၊ အမှန်တကယ် ၎င်းသည်အစ္စရေး ထောက်လှမ်းရေးအဖွဲ့ မော့ဆက်မှ ဖြစ်ကြောင်း၊ ၎င်း၏ဇာတ်လမ်းဆိုလျှင် နှစ် ၃၀၊ ၄၀ မှ ပေါ်လာကြောင်း၊ တချို့ကိစ္စများကိုလည်း မိမိတို့အနေဖြင့် သိနိုင်တာမရှိကြောင်း ပြန်လည်ဖြေကြားသည်။

သူရိယနေဝန်းသတင်းဌာနမှ သတင်းထောက် ဒေါ်သဇင်ဦး က တစ်နှစ်ကျော်ကြာအထိ ငြိမ်းချမ်းနေသည့် ရခိုင်ပြည်နယ်တွင် မြန်မာနိုင်ငံ၏ နယ်ခြားစောင့်ရဲကင်းစခန်းများကို AA အဖွဲ့က စတင်ထိုးစစ်ဆင်တိုက်ခိုက်ခဲ့သဖြင့် မြန်မာ့တပ်မတော်အနေဖြင့် ပြန်လည်ခုခံတိုက်ခိုက် နေရသည်ဟု ကြားသိရကြောင်း၊ တစ်ချိန်တည်းတွင် AA အဖွဲ့အပါအဝင် မြောက်ပိုင်းမဟာမိတ် အဖွဲ့များသည် UWSA ၏ ဌာနချုပ်တွင် တွေ့ဆုံဆွေးနွေးခဲ့သည်ဟု သိရကြောင်း၊ ထိုဆွေးနွေးပွဲတွင် AA အဖွဲ့မှ UWSA အဖွဲ့ထံသို့ လေယာဉ်ပစ်လက်နက်များ အကူအညီတောင်းခံခဲ့သည်ဟု ထိုဆွေးနွေးပွဲနှင့် နီးစပ်သူတချို့ထံမှ ပြန်လည်ပြောကြားချက်များအရ ကြားသိရကြောင်း၊ ယခုကဲ့သို့သော အချိန်မျိုးတွင် UWSA ဌာနချုပ်တွင် မြောက်ပိုင်းမဟာမိတ်အဖွဲ့ တွေ့ဆုံခဲ့မှုအပေါ် နိုင်ငံတော်စီမံအုပ်ချုပ်ရေးကောင်စီအနေဖြင့် မည်သို့မှတ်ချက်ပြုမည်ကို သိလိုပါကြောင်း၊ နိုင်ငံတော်စီမံအုပ်ချုပ်ရေးကောင်စီက ဖိတ်ခေါ်ထားသည့် ငြိမ်းချမ်းရေးဆွေးနွေးပွဲ လမ်းကြောင်းပေါ်သို့ သတ္တိရှိရှိရောက်မလာရဲသေးသည့် AA အဖွဲ့သည် ရခိုင်ပြည်နယ်ငြိမ်းချမ်းရေးကို ပျက်ပြားစေရုံသာမက မြန်မာ-ဘင်္ဂလားဒေ့ရှ်နှစ်နိုင်ငံ ချစ်ကြည်ရေးကိုပါထိခိုက်အောင် ရည်ရွယ်ချက်ရှိရှိ လုပ်ဆောင်နေကြောင်း၊ ထိုသို့လုပ်ဆောင်ခြင်းအပေါ် နိုင်ငံတော်စီမံအုပ်ချုပ်ရေး ကောင်စီအနေဖြင့် AA အဖွဲ့ကို မည်သို့တုံ့ပြန်သွားမည်ကို သိလိုပါကြောင်းနှင့် နယ်ခြားစောင့် ရဲကင်းစခန်းများကိုလည်း လူအင်အား၊ လက်နက်အင်အား ထပ်မံတိုးချဲ့သွားရန် အစီအစဉ် ရှိ /မရှိ သိလိုပါကြောင်း မေးမြန်းသည်။

ဗိုလ်ချုပ် ဇော်မင်းထွန်း က UWSA တွင် AA အဖွဲ့နှင့်တွေ့ဆုံခြင်းကို သတင်းများတွင် တွေ့ရ ကြောင်း၊ ထိုကိစ္စနှင့်ပတ်သက်ပြီး စုံစမ်းချက် အစီရင်ခံစာများနှင့် တချို့သောသတင်းများ မိမိတို့ ရရှိထားပြီးဖြစ်ကြောင်း၊ UWSA အဖွဲ့သည် မိမိတို့နှင့် ငြိမ်းချမ်းရေးဆွေးနွေးသည့်အဖွဲ့ ၁၀ ဖွဲ့ထဲတွင် ပါဝင်ကြောင်း၊ ဒုတိယအကြိမ် ဆွေးနွေးသည့် အဖွဲ့ခြောက်ဖွဲ့ထဲတွင်လည်း ပါဝင်ကြောင်း၊ ၎င်းတို့လိုချင်သည့် ရည်မှန်းချက်၊ လုပ်ဆောင်ချင်သည့် အချက်များကို နိုင်ငံတော်ဝန်ကြီးချုပ်နှင့် ပွင့်လင်းစွာဆွေးနွေးပြီးဖြစ်ကြောင်း၊ ထို့ကြောင့် ကျန်သည့် အဖွဲ့များအနေဖြင့် ငြိမ်းချမ်းရေးလမ်းကြောင်းပေါ် အခြေအနေပေးနေသည့်အချိန်တွင် ဆက်လက် လျှောက်လှမ်းကြရန် ပြောကြားလိုကြောင်း၊ ထိုကဲ့သို့ မလုပ်ဆောင်ဘဲ နိုင်ငံတော်ကို အကြမ်းဖက်လုပ်ငန်းများ လုပ်ဆောင်နေသူများကို အားပေးနေလျှင် ငြိမ်းချမ်းရေးလမ်းကြောင်းနှင့် ပြဒါးတစ်လမ်း၊ သံတစ်လမ်းဖြစ်သွားနိုင်သည်ဟု ပြောလိုကြောင်း၊ AA အဖွဲ့နှင့်ပတ်သက်ပြီး BP-40 အနီးစခန်းအား တိုက်ပြီးသည့်နောက်ပိုင်းတွင် တပ်မတော်အနေဖြင့် လိုအပ်သည့်တုံ့ပြန်ဆောင်ရွက်မှုများကို ဆောင်ရွက်လျက်ရှိကြောင်း၊ လိုအပ်သည့် တုံ့ပြန်ဆောင်ရွက်မှုများကို မီဒီယာအနေဖြင့်လည်း သတင်းများ တွေ့ရ မည်ဖြစ်ကြောင်း၊ တပ်မတော်အနေဖြင့် ဒေသခံပြည်သူလူထု၏ ဒေသတည်ငြိမ်အေးချမ်းရေး၊ လုံခြုံရေးအတွက် လိုအပ်သည့်တုံ့ပြန်မှု၊ ထိရောက်သည့်တုံ့ပြန်မှုများကို ဆက်လက်ဆောင်ရွက် သွားမည်ဖြစ်ကြောင်း၊ ငြိမ်းချမ်းရေးလမ်းကြောင်းကို မလျှောက်လှမ်းချင်သည့်အတွက် ဦးစွာအင်အားနည်းသည့် နယ်ခြားစောင့်ရဲကင်းစခန်းများကို ဝင်ရောက်တိုက်ခိုက်ခြင်းဖြစ်ကြောင်း၊ ဝင်ရောက်တိုက်ခိုက်သည့်နောက်ကွယ်၌ အကြံအစည်များစွာရှိကြောင်း၊ ထိုအကြံအစည်များကိုလည်း မိမိတို့အနေဖြင့် သိရှိပြီးဖြစ်ကြောင်း၊ လိုအပ်သည့်တုံ့ပြန်မှုများကိုလည်း ဆက်လက်ဆောင်ရွက်သွားမည်ဖြစ်ကြောင်း ဖြေကြားသည်။

Eleven Media မှ သတင်းထောက် ဦးအောင်မင်းသိန်း က လက်ရှိမြန်မာနိုင်ငံတွင် နိုင်ငံခြားရင်းနှီးမြှုပ်နှံမှုများ၊ လုပ်ငန်းသစ်များ လွှဲပြောင်းဝယ်ယူခြင်းများရှိလာကြောင်း၊ ထိုကိစ္စများတွင် ဟွန်ဒီများနှင့်ငွေလွှဲပြီး လုပ်ဆောင်ခြင်းများရှိကြောင်း၊ ထိုသို့လုပ်ဆောင်သည့်အတွက် နိုင်ငံ ခြားငွေကြေးဈေးကွက်တွင် ငွေလဲလှယ်မှုနှုန်း ရိုက်ခတ်ခြင်းများ ဖြစ်လာနိုင်ကြောင်း၊ ယင်းနေရာတွင် ရင်းနှီးမြှုပ်နှံမှုပမာဏက တချို့ဆိုလျှင် ဒေါ်လာသန်းရာချီရှိကြောင်း၊ ထိုသို့များပြားသည့် အတွက် နိုင်ငံခြားငွေကြေးဈေးကွက်တွင် ဗဟိုဘဏ် ကသတ်မှတ်ထားသော ငွေလဲလှယ်နှုန်းထက် များသည့်ပမာဏကိုဆွဲတင်ပြီး ဈေးကစားကြသူ များလည်းရှိလာနိုင်ကြောင်း၊ နိုင်ငံခြားကုမ္ပဏီ အနေဖြင့်လည်း FDI ဝင်လာသည့်အချိန် တစ်ဖက် လှည့်ဖြင့် မြန်မာများက ဝယ်ယူခြင်းများလည်းရှိကြောင်း၊ ထိုအခြေအနေများရှိသည့်အတွက် ထိုမှဝင်ရောက်လာသည့် ငွေကြေးများနှင့်ပတ်သက်ပြီး သက်ဆိုင်ရာအဖွဲ့အစည်းများက မည်သို့စိစစ် ဆောင်ရွက်ထားပါသလဲ၊ ဥပမာအနေဖြင့် Ooredoo Myanmar ဆက်သွယ်ရေးကုမ္ပဏီကို မြန်မာပိုင် စင်ကာပူကုမ္ပဏီတစ်ခုက ဒေါ်လာ ၅၇၆ သန်းဖြင့် ဝယ်ယူခဲ့သည်ကို တွေ့ရကြောင်း၊ ထိုရင်းနှီးမြှုပ်နှံမှုသည် ပမာဏကြီးမားကြောင်း၊ ယင်းမှ ငွေကြေးအမြောက်အမြား ပြည်တွင်းထဲသို့ စီးဝင်လာမည် ဖြစ်သည့်အတွက် ငွေကြေးစီးဆင်းမှုနှင့် ပတ်သက်ပြီး စိစစ်ဆောင်ရွက်သွားရန် အစီအစဉ် ရှိ၊ မရှိနှင့် ထိုရင်းနှီးမြှုပ်နှံမှုမှ ဝင်ရောက်လာမည့်ငွေကြေး များနှင့်ပတ်သက်ပြီး ငွေကြေးခဝါချမှုများ၊ မူးယစ် ဆေးဝါးနှင့်ပတ်သက်သည့်ငွေကြေးများ မဖြစ်စေရန်နှင့် ထိုငွေကြေးများသည် တိုင်းပြည်အတွက် စီးပွားရေးများကိုလည်း ရိုက်ခတ်နိုင်သည်အထိ ဖြစ်လာနိုင်ကြောင်း၊ ငွေကြေးဈေးကွက်တွင်လည်း ကမောက်ကမဖြစ်လာနိုင်ကြောင်း၊ ယင်းကိစ္စများနှင့် ပတ်သက်ပြီး နိုင်ငံတော်အစိုးရအနေဖြင့် မည်သို့စိစစ်ဆောင်ရွက်ထားပါသလဲ၊ စိစစ်ဆောင်ရွက်ပြီး သွားပြီဆိုလျှင် အများပြည်သူများ သိရှိရန်အတွက် ဖြေကြားပေးစေ လိုကြောင်း မေးမြန်းသည်။

ဗိုလ်ချုပ် ဇော်မင်းထွန်း က ငွေကြေးဈေးကွက်တွင် နိုင်ငံခြားငွေဈေးနှုန်း မြင့်တက်စေရန် ရည်ရွယ်ချက်ဖြင့် ဆောင်ရွက်နေသည့်ကိစ္စများတွင် ဘဏ်များ ပါဝင်ပတ်သက်မှုမရှိစေရန် အတွက် ဗဟိုဘဏ်မှ ဘဏ်များသို့ ကန့်သတ်မှုများ၊ ပြောဆိုမှုများ၊ အသိပညာပေးခြင်းများကို လုပ်ဆောင်လျက်ရှိကြောင်း၊ သတ်မှတ်ငွေလဲလှယ်နှုန်းထက် ပိုမိုဆောင်ရွက်နေကြသည့် ငွေလဲသည့်ကောင်တာများကိုလည်း လုပ်ငန်းနှင့်ပတ်သက်ပြီး လုပ်ငန်းလိုင်စင်သတိပေးခြင်း၊ လုပ်ငန်းလိုင်စင်ရုပ်သိမ်းခြင်းများ ဆောင်ရွက်လျက်ရှိကြောင်း၊ ဘဏ်လုပ်ငန်းကဏ္ဍသို့ စီးဝင်လာသည့်ငွေများ၊ ငွေကြေးခဝါချမှု၊ မူးယစ်ဆေးဝါးနှင့် သက်ဆိုင်သည့် ဥပဒေနှင့်မညီသည့် ငွေကြေးမျိုး မဖြစ်စေရန်အတွက် ဘဏ်လုပ်ငန်းများတွင် မတည်ရင်းနှီးငွေတိုးမြင့်ခြင်းအတွက် ဝင်ရောက် လာသည့်ငွေများကိုလည်း စစ်ဆေးမှုများပြုလုပ်ကြောင်း၊ ငွေကြေးခဝါချမှု ရှိ၊ မရှိ၊ အခွန်ဆောင်ခြင်း ရှိ၊ မရှိ စိစစ်ခြင်း သက်ဆိုင်ရာအဖွဲ့အစည်းများဖြစ်သည့် စီမံကိန်းနှင့် ဘဏ္ဍာရေးဝန်ကြီးဌာနနှင့် တရားဥပဒေစိုးမိုးရေးအဖွဲ့အစည်းနှင့် ပူးပေါင်းဆောင်ရွက်နေ ကြောင်း၊ စီမံကိန်းနှင့်ဘဏ္ဍာရေးဝန်ကြီးဌာန၊ နိုင်ငံခြားရင်းနှီးမြှုပ်နှံမှု၊ အပြည်ပြည်ဆိုင်ရာ ပူးပေါင်းဆောင်ရွက်ရေး၊ ပြည်ထဲရေးဝန်ကြီး ဌာနအောက်တွင်ရှိသည့် စီးပွားရေးနှင့်ပတ်သက် သည့်အဖွဲ့အစည်းများကို စုံစမ်းစစ်ဆေးနေသည့် အဖွဲ့အစည်းများ၊ ငွေကြေးစီးဆင်းမှုများကို စုံစမ်းစစ်ဆေးနေသည့်အဖွဲ့များနှင့် လုပ်ဆောင်နေကြောင်း၊ ဘဏ်လုပ်ငန်းကဏ္ဍအတွင်းသို့ ပြည်ပမှ မတည်ရင်းနှီးမြှုပ်နှံမှုဝင်လာလျှင် ရင်းနှီးမြှုပ်နှံမှုအထောက်အထားများ၊ Share Holder စာရင်းများ၊ သက်ဆိုင်ရာ သံရုံးများမှ ရင်းနှီးမြှုပ်နှံမှုကိစ္စအပေါ်တွင် သဘောထားမှတ်ချက် တောင်းခံခြင်း၊ သက်ဆိုင်ရာနိုင်ငံတွင် ကုမ္ပဏီမှတ်ပုံတင်ထားသည့် အထောက်အထားများ၊ နှစ်ဦးနှစ်ဖက်သဘောတူညီထားသည့် စာချုပ်များကိုစိစစ်ခြင်း၊ ငွေကြေးဆိုင်ရာ စုံစမ်းထောက်လှမ်းရေးအဖွဲ့များမှ စုံစမ်းစစ်ဆေးသည့် သဘောထားမှတ်ချက်တောင်းခံခြင်းများကို အဆင့်ဆင့်လုပ်ဆောင်ရကြောင်း၊ တော်ရုံတန်ရုံဖြင့် လုပ်၍မရကြောင်း၊ Ooredoo Myanmar ဆက်သွယ် ရေးကုမ္ပဏီနှင့် ပတ်သက်ပြီး မြန်မာပိုင်စင်ကာပူ ကုမ္ပဏီမှဝယ်ယူသည့်ကိစ္စသည် မြန်မာနိုင်ငံတော် ဗဟိုဘဏ်ကို တရားဝင်တင်ပြထားခြင်း မရှိသေးကြောင်း၊ ပြည်ပမှ လာရောက်ရင်းနှီးမြှုပ်နှံလျှင် Cash In ဝင်လာမည်ဖြစ်ကြောင်း၊ ပြည်ပရင်းနှီးမြှုပ်နှံမှုကို အားပေးကြောင်း၊ မြန်မာနိုင်ငံတော် ဗဟိုဘဏ်၊ ငွေကြေးဆိုင်ရာစုံစမ်းထောက်လှမ်းမှု အဖွဲ့အစည်းနှင့် တရားဥပဒေစိုးမိုးရေးအဖွဲ့နှင့်လည်း ပူးပေါင်းဆောင်ရွက်လျက်ရှိကြောင်း၊ ဗဟို ဘဏ်၏ ၁၃-၇-၂၀၂၂ ရက်နေ့ ညွှန်ကြားချက်အမှတ် (၈/၂၀၂၂)အရ နိုင်ငံခြားငွေရေးကြေးရေး အဖွဲ့အစည်းက ၁၀၀ ရာခိုင်နှုန်းပိုင်ဆိုင်သည့် ဘဏ်မဟုတ်သည့် ငွေရေးကြေးရေး အဖွဲ့အစည်းများကို အကျိုးတူရင်းနှီးမြှုပ်နှံခြင်းဆိုင်ရာ ညွှန်ကြားချက်လည်းရှိကြောင်း၊ လုပ်ဆောင်ရမည့် ကန့်သတ်ချက် စာရွက်စာတမ်းများရှိကြောင်း၊ ကန့်သတ်ချက် စာရွက်စာတမ်းအချက် ၂၁ ရှိကြောင်း၊ ယင်းတို့ကို မှီငြမ်းကြည့်လျှင် ပိုပြီးခိုင်မာလာမည်ဟု ရှင်းလင်းဖြေကြားသည်။

(ဆက်လက်ဖော်ပြပါမည်)

HOT NEWS
January 4,