နေပြည်တော်၌ ဌာနဆိုင်ရာသင်္ကြန်ယိမ်းအဖွဲ့များ သင်္ကြန်အကအလှများ ဇာတ်တိုက်လေ့ကျင့်လျက်ရှိ

နေပြည်တော်၌ ဌာနဆိုင်ရာသင်္ကြန်ယိမ်းအဖွဲ့များ သင်္ကြန်အကအလှများ ဇာတ်တိုက်လေ့ကျင့်လျက်ရှိ

နေပြည်တော် ဧပြီ ၂

မြန်မာသက္ကရာဇ် ၁၃၈၅ ခုနှစ် မြန်မာ့ရိုးရာ မဟာသင်္ကြန်ပွဲတော်ကို နိုင်ငံတစ်ဝန်း၌ စည်ကားသိုက်မြိုက်စွာကျင်းပနိုင်ရန် ဌာနဆိုင်ရာများအလိုက် သင်္ကြန်ယိမ်းအဖွဲ့များဖြင့် သင်္ကြန်အကအလှများ ဇာတ်တိုက်လေ့ကျင့်နေကြပြီ ဖြစ်သည်။

မြန်မာ့အသံနှင့် ရုပ်မြင်သံကြားမှလည်း “ခါသင်္ကြန်အဆိုအက” အစီအစဉ်ကို ယခင်နှစ်များနည်းတူ တင်ဆက်နိုင်ရေး သင်္ကြန်ယိမ်းအဖွဲ့များဖြင့် ရိုက်ကူးရေးစီစဉ် ဆောင်ရွက်လျက်ရှိရာ ယနေ့နံနက်ပိုင်းတွင် အလုပ်သမားဝန်ကြီးဌာန ကိုယ်စားပြုသင်္ကြန်ယိမ်းအဖွဲ့များ သည် နေပြည်တော်-တပ်ကုန်းရှိ မြန်မာ့အသံနှင့် ရုပ်မြင်သံကြားသို့ လာရောက်၍ “ ဖိုးညိုမြ ” နှင့် “ ဖြူနီပြာဝါ ” တေးသီချင်းများဖြင့်လည်းကောင်း၊ မွန်းလွဲပိုင်းတွင်လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန လူမှုဝန်ထမ်းဦးစီးဌာနမှ သင်္ကြန်ယိမ်းအဖွဲ့များသည် “ ရေတွေစိုကုန်ပြီ ”တေးသီချင်း၊ ရင်သွေးရတနာ မူကြိုကျောင်းမှ မူကြိုကလေးငယ်များက “သင်္ကြန်မိုး” တေးသီချင်းများဖြင့် လည်းကောင်း ရိုက်ကူးခဲ့ကြပြီး မြန်မာ့အသံနှင့် ရုပ်မြင်သံကြား စိန်ရတုပြတိုက်သို့လည်း ဝင်ရောက်ကြည့်ရှုလေ့လာကြသည်။

ထို့ပြင် သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ရင်းနှီးမြှုပ်နှံမှုနှင့်နိုင်ငံခြားစီးပွား ဆက်သွယ်ရေးဝန်ကြီးဌာန၊ နိုင်ငံခြားရေးဝန်ကြီးဌာနနှင့် သာသနာရေးနှင့်ယဉ်ကျေးမှုဝန်ကြီးဌာနမှ ယိမ်းအဖွဲ့များသည် ၎င်းတို့၏ဌာနများတွင် သင်္ကြန်တေးသီချင်းဖြင့် အကတိုက်လေ့ကျင့်လျက်ရှိရာ မြန်မာ့အသံနှင့်ရုပ်မြင်သံကြားမှ သွားရောက်သတင်းရယူ ရိုက်ကူးခဲ့ကြောင်း သိရသည်။

သတင်းစဉ်