ပဲခူးတိုင်းဒေသကြီး၊ အုတ်တွင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးပြီး တစ်ဦး ဒဏ်ရာရရှိ

ပဲခူးတိုင်းဒေသကြီး၊ အုတ်တွင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးပြီး တစ်ဦး ဒဏ်ရာရရှိ

     ၂၀၂၆ ခုနှစ်၊ ဧပြီ ၂၄ ရက်က ပဲခူးတိုင်းဒေသကြီး၊ အုတ်တွင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးပြီး တစ်ဦး ဒဏ်ရာရရှိခဲ့ကြောင်း သိရသည်။

     ဖြစ်စဉ်မှာ ဧပြီ ၂၄ ရက် နံနက် ၁၁ နာရီတွင် အုတ်တွင်းမြို့နယ်၊ ပဲခူးလမ်းရပ်ကွက်၊ ရန်ကုန်-မန္တလေးလမ်းဟောင်း မိုင်တိုင်အမှတ် ၁၅၀ မိုင် ၃ ဖာလုံအနီး၌ ယာဉ်တိုက်မှုဖြစ်ပွားကြောင်း သတင်းအရ အုတ်တွင်းမြို့မရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ တောင်ငူမြို့မှ အုတ်တွင်းမြို့ဘက်သို့ တံတားဦးမြို့နယ်၊ ချောင်းဘတ်ကျေးရွာနေ ဦးဂျေမောင်မောင်(၃၅)နှစ် မောင်းနှင်သော MDY-14 6M/XXXX TRACTOR HEAD ယာဉ်သည် လမ်းဘေးတွင် ရပ်တန့်ပြီး ဘိလပ်မြေအိတ်များ ချနေစဉ် ဘေးမှ ဖြတ်သန်းမောင်နှင်သွားသော ပဲခူးလမ်းရပ်ကွက်နေ သားပြည့်(ခ)မြင့်မိုရ်ကျော်(၁၇)နှစ် မောင်းနှင်ပြီး တစ်ရပ်ကွက်တည်းနေ မြတ်မင်းသန့်(၁၆)နှစ် လိုက်ပါလာသော ဆိုင်ကယ်ပေါ်သို့ TRACTOR HEAD ယာဉ်တွင် အုပ်ထားသော မိုးကာစမှာ လေလွင့်ပြီး သားပြည့်(ခ)မြင့်မိုရ်ကျော်၏ မျက်နှာအား အုပ်မိ၍ ဆိုင်ကယ်တိမ်းမှောက်သွားစဉ် တောင်ငူမြို့နယ်၊ အုတ်ကျွတ်တန်းကျေးရွာနေ ဦးစိုးမိုးဟိန်း(ခ)စိုးမိုး(၃၇)နှစ် မောင်းနှင်လာသော YGN-6 7G/XXXX JAC ယာဉ်မှ  ဝင်ရောက်တိုက်မိခဲ့သဖြင့် သားပြည့်(ခ)မြင့်မိုရ်ကျော်တွင် ဒဏ်ရာများရရှိကာ သေဆုံးခဲ့ပြီး မြတ်မင်းသန့်တွင် ဒဏ်ရာများရရှိခဲ့သောကြောင့် ဂျေမောင်မောင်နှင့် စိုးမိုးဟိန်း(ခ)စိုးမိုးတို့ နှစ်ဦး အား အုတ်တွင်းမြို့မရဲစခန်း ယာဉ်(ပ) ၆/၂၀၂၆၊ ရာဇသတ်ကြီးပုဒ်မ ၃၀၄-က/၃၃၇/၂၇၉ ဖြင့်အမှုဖွင့်အရေးယူထားကြောင်း သတင်းရရှိပါသည်။