ဘုတလင်နှင့် ရေစကြိုမြို့နယ်တို့၌ အကြမ်းဖက်တိုက်ခိုက်မှုများပြုလုပ်ရာတွင် အသုံးပြုသည့် လက်လုပ်မိုင်းများ၊ လက်နက်၊ ခဲယမ်းနှင့် ဆက်စပ်ပစ္စည်းများအား သိမ်းဆည်းရမိ

ဘုတလင်နှင့် ရေစကြိုမြို့နယ်တို့၌ အကြမ်းဖက်တိုက်ခိုက်မှုများပြုလုပ်ရာတွင် အသုံးပြုသည့် လက်လုပ်မိုင်းများ၊ လက်နက်၊ ခဲယမ်းနှင့် ဆက်စပ်ပစ္စည်းများအား သိမ်းဆည်းရမိ

      တိုင်းဒေသကြီးနှင့် ပြည်နယ်အသီးသီး၌ အကြမ်းဖက်တိုက်ခိုက်မှုများ မဖြစ်ပေါ်စေရေး၊ နယ်မြေဒေသတည်ငြိမ်အေးချမ်းရေးနှင့် ပြည်သူများလုံခြုံဘေးကင်းအေးချမ်းစွာ နေထိုင်နိုင်ရေးတို့အတွက် လုံခြုံရေးတပ်ဖွဲ့ဝင်များကလိုအပ်သည့် လုံခြုံရေးလုပ်ငန်းများအား နေ့ညမပြတ် ဆောင်ရွက်လျက်ရှိပါသည်။

       ထိုသို့ဆောင်ရွက်လျက်ရှိရာ မတ်လ ၃၁ ရက်နေ့ နံနက် ၅ နာရီတွင် လုံခြုံရေးတပ်ဖွဲ့ဝင်များက နယ်မြေဒေသတည်ငြိမ်အေးချမ်းရေးအတွက် လုံခြုံရေးလုပ်ငန်းများဆောင်ရွက်နေစဉ် စစ်ကိုင်းတိုင်းဒေသကြီး၊ ဘုတလင်မြို့နယ်၊ တက်လိုင်းကျေးရွာ၏ တောင်ဘက် ၂ ဖာလုံခန့်အကွာရှိ တဲ ၃ လုံးအတွင်းမှ အကြမ်းဖက်အဖွဲ့များ၏ လက်လုပ်မိုင်း  ၂ လုံး၊ ဆားကစ်ပြား ၁၂ ခု၊ Keypad ဖုန်း၂ လုံး၊ အစိမ်းရောင် လည်တိုဖိနပ် ၃ ရံ၊ ဆိုင်ကယ်ဘက်ထရီအိုး ၁၀ လုံး၊ ပြောက်ကျားအင်္ကျီ ၁ ထည်၊ ပြောက်ကျားလည်စီး ၁ ခု၊ NLD တံဆိပ်ပါ အနီရောင်အင်္ကျီ ၂ ထည်၊ NLD တံဆိပ်ပါ အနီရောင် နဖူးစည်း ၁ ခုနှင့် ပြောက်ကျား ဦးထုပ် ၁ လုံးတို့အား တွေ့ရှိသိမ်းဆည်းရမိခဲ့ကြောင်း သိရသည်။

      အလားတူ နံနက် ၅ နာရီ ၄၅ မိနစ်တွင် လုံခြုံရေးတပ်ဖွဲ့ဝင်များက နယ်မြေဒေသတည်ငြိမ်အေးချမ်းရေးအတွက် လုံခြုံရေးလုပ်ငန်းများဆောင်ရွက်နေစဉ် မကွေးတိုင်းဒေသကြီး၊ ရေစကြိုမြို့နယ်၊ သမန္တပို့အလယ်ကျေးရွာအရောက်တွင် အဆိုပါကျေးရွာရှိ ရပ်ကွက်အုပ်ချုပ်ရေးမှူး ရုံးအတွင်းမှနေ၍ PDF အမည်ခံအကြမ်းဖက်အဖွဲ့ အင်အား ၁၅ ဦးခန့်က လက်နက်ငယ်များဖြင့် ပစ်ခတ်တိုက်ခိုက်ခဲ့သဖြင့် လုံခြုံရေးတပ်ဖွဲ့ဝင်များက ပြန်လည်ခုခံပစ်ခတ်ခဲ့ရာ ၂၅ မိနစ်အကြာတွင် အကြမ်းဖက်အဖွဲ့များ ဆုတ်ခွာထွက်ပြေးသွားခဲ့ပြီး ထိတွေ့မှုဖြစ်စဉ်အတွင်း အကြမ်းဖက်အဖွဲ့ဝင်အချို့ ထိခိုက်သေဆုံးကာ အခင်းဖြစ်နေရာမှ AK-47 သေနတ် ၂ လက်၊ M4 ကာဘိုင် ၁ လက်၊ အူဇီ ၁ လက်၊ လက်လုပ်သေနတ် ၁ လက်၊ ၇.၆၂ ကျည် ၁၆၃ တောင့်၊ ၅.၅၆ ကျည် ၈၃ တောင့်၊ ၉မမ ကျည် ၆ တောင့်၊ AK-47 ကျည်အိမ် ၂ ခု၊ M-4 ကျည်အိမ် ၂ ခု၊ အူဇီကျည်အိမ် ၁ ခု၊ စကားပြော စက် ၃ လုံး၊ အားသွင်းခွက် ၆ ခု၊ လက်လုပ်မိုင်း ၉ လုံး၊ ဒီတိုနေတာ ၂ ခု၊ ယမ်းကြိုး ၂ ချောင်း၊ ရီမု ၁ ခု၊ ဆားကစ်ပြား ၁၁ ခု၊ မီးတိတ်ခွေ ၄ ခွေ၊ နိုင်လွန်ကြိုးခွေ ၂ ခွေ၊ မှတ်ပုံတင်ကတ် ၁ ခုနှင့် ယာဉ်မောင်း လိုင်စင်ကတ် ၁ ခုတို့အား တွေ့ရှိသိမ်းဆည်းရမိခဲ့ကြောင်း သိရသည်။

      အထက်ပါဖြစ်စဉ်များမှ သိမ်းဆည်းရမိသည့် လက်လုပ်မိုင်း၊ လက်နက်၊ ခဲယမ်းနှင့် ဆက်စပ်ပစ္စည်းများအား စနစ်တကျသိမ်းဆည်းရှင်းလင်းခဲ့ပြီး နယ်မြေဒေသအေးချမ်းတည်ငြိမ်ရေးအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များအား ဆက်လက်ဆောင်ရွက်လျက်ရှိကြောင်း သတင်းရရှိသည်။