မန္တလေးတိုင်းဒေသကြီး၊ ပျော်ဘွယ်မြို့နယ်၌ ယာဉ်တိုက်မှုဖြစ်ပွား၍ အမျိုးသမီး တစ်ဦး သေဆုံးပြီး အမျိုးသား တစ်ဦးနှင့် အမျိုးသမီး တစ်ဦးတို့ ဒဏ်ရာရရှိ

မန္တလေးတိုင်းဒေသကြီး၊ ပျော်ဘွယ်မြို့နယ်၌ ယာဉ်တိုက်မှုဖြစ်ပွား၍ အမျိုးသမီး တစ်ဦး သေဆုံးပြီး အမျိုးသား တစ်ဦးနှင့် အမျိုးသမီး တစ်ဦးတို့ ဒဏ်ရာရရှိ

     ၂၀၂၆ ခုနှစ်၊ ဖေဖော်ဝါရီ ၆ ရက်က မန္တလေးတိုင်းဒေသကြီး၊ ပျော်ဘွယ်မြို့နယ်၌ ယာဉ်တိုက်မှု ဖြစ်ပွား၍ အမျိုးသမီး တစ်ဦး သေဆုံးပြီး အမျိုးသား တစ်ဦးနှင့် အမျိုးသမီး တစ်ဦးတို့ ဒဏ်ရာရရှိခဲ့ကြောင်း သိရသည်။

     ဖြစ်စဉ်မှာ ဖေဖော်ဝါရီ ၆ ရက် နံနက် ၅ နာရီတွင် မန္တလေးတိုင်းဒေသကြီး၊ ပျော်ဘွယ်မြို့နယ်၊ ဆားတောင်ကျေးရွာ ရန်ကုန်-မန္တလေးကားလမ်းဟောင်း၊ မိုင်တိုင်အမှတ် ၂၈၄ မိုင် ၇ ဖာလုံအနီး၌ ယာဉ်တိုက်မှုဖြစ်ပွားကြောင်း သတင်းအရ ပျော်ဘွယ်မြို့မရဲစခန်းမှ တပ်ဖွဲ့ဝင်များက သွားရောက် စစ်ဆေးခဲ့ရာ ရမည်းသင်းမြို့မှ ပျော်ဘွယ်မြို့သို့ တပ်ကုန်းမြို့နယ်၊ ရွေးစုကျေးရွာနေ မျိုးသန့်(၃၅)နှစ် မောင်းနှင်ပြီး ဇနီးဖြစ်သူ ဒေါ်ယုယုခိုင်(၄၃)နှစ်နှင့် တစ်ရွာတည်းနေ ဒေါ်တင်ဇာဦး(၄၂)နှစ်တို့ လိုက်ပါ လာသည့် ၁၂ ဟ/XXXX HIGO သုံးဘီးယာဉ်သည် အခင်းဖြစ်နေရာအရောက်၌ လမ်းယာဘက်ဘေးတွင် ရပ်တန့်ထားသော ဆားလင်းကြီးမြို့နယ်၊ ဖောင်းကားကျေးရွာနေ ရန်ပိုင်ထွန်း(၃၉)နှစ် မောင်းနှင်သည့် SHN/2B-XXXX NISSAN TRUCK ၁၀ ဘီးယာဉ်အား နောက်မှ ဝင်ရောက်တိုက်မိခဲ့သဖြင့် ဒေါ်ယုယုခိုင်တွင် ဒဏ်ရာများရရှိကာ သေဆုံးသွားခဲ့ပြီး မျိုးသန့်နှင့် ဒေါ်တင်ဇာဦးတို့တွင် ဒဏ်ရာများ အသီးသီးရရှိခဲ့သောကြောင့် မျိုးသန့်နှင့် ရန်ပိုင်ထွန်း တို့နှစ်ဦးအား ပျော်ဘွယ်မြို့မရဲစခန်း ယာဉ်(ပ)၆/၂၀၂၆၊ ရာဇသတ်ကြီးပုဒ်မ ၃၀၄-က/၃၃၇/၃၃၈ ဖြင့် အမှုဖွင့်အရေးယူထားကြောင်း သတင်းရရှိသည်။