ရှမ်းပြည်နယ်၊ တာချီလိတ်မြို့နယ်၌ မော်တော်ယာဉ်မှ အရှိန်မထိန်းနိုင်ဘဲ လမ်းဘေးရှိ ဓာတ်တိုင်အား ဝင်ရောက်တိုက်မိခဲ့မှုကြောင့် အမျိုးသမီး တစ်ဦး သေဆုံးကာ တစ်ဦး ထိခိုက်ဒဏ်ရာရရှိ

ရှမ်းပြည်နယ်၊ တာချီလိတ်မြို့နယ်၌ မော်တော်ယာဉ်မှ အရှိန်မထိန်းနိုင်ဘဲ လမ်းဘေးရှိ ဓာတ်တိုင်အား ဝင်ရောက်တိုက်မိခဲ့မှုကြောင့် အမျိုးသမီး တစ်ဦး သေဆုံးကာ တစ်ဦး ထိခိုက်ဒဏ်ရာရရှိ

     ၂၀၂၆ ခုနှစ်၊ ဖေဖော်ဝါရီ ၂၇ ရက်က ရှမ်းပြည်နယ်၊ တာချီလိတ်မြို့နယ်၌ မော်တော်ယာဉ်မှ အရှိန်မထိန်းနိုင်ဘဲ လမ်းဘေးရှိ ဓာတ်တိုင်အား ဝင်ရောက်တိုက်မိခဲ့မှုကြောင့် အမျိုးသမီး တစ်ဦး သေဆုံးကာ တစ်ဦး ထိခိုက်ဒဏ်ရာရရှိခဲ့ကြောင်း သိရသည်။

     ဖြစ်စဉ်မှာ ဖေဖော်ဝါရီ ၂၇ ရက် နံနက် ၆ နာရီ ၃၀ မိနစ်တွင် ရှမ်းပြည်နယ်၊ တာချီလိတ် မြို့နယ်၊ ဝိန်းကျောက်ရပ်ကွက်၊ မြို့ရှောင်လမ်းပေါ်၌ ယာဉ်တိုက်မှုဖြစ်ပွားကြောင်း သတင်းအရ အမှတ်(၁၂၁)ယာဉ်ထိန်းရဲတပ်ဖွဲ့စုမှ တပ်ဖွဲ့ဝင်များက သွားရောက်စစ်ဆေးခဲ့ရာ တာချီလိတ်မြို့နယ်၊ မကာဟိုခမ်းရပ်ကွက်နေ မထက်ထက်ဝေ (၂၉)နှစ် မောင်းနှင်ပြီး ဝမ်ကောင်းရပ်ကွက်နေသူများ ဖြစ်ကြသည့် မစုစုနှင်း(၂၈)နှစ်နှင့် မနှင်းဝတ်ရည်(၂၇)နှစ်တို့ လိုက်ပါလာသည့် SHN-12/3L-XXXX TOYOTA NOAH မော်တော်ယာဉ်သည် မြို့ရှောင်လမ်းအတိုင်း ဟုန်လုံဈေးမှ မကာဟိုခမ်းရပ်ကွက် ဘက်သို့ မောင်းနှင်လာစဉ် အခင်းဖြစ်နေရာအရောက်၌ အရှိန်မထိန်းနိုင်ဘဲ လမ်းဘေးရှိ ဓာတ်တိုင်အား ဝင်ရောက်တိုက်မိခဲ့သဖြင့် မနှင်းဝတ်ရည်တွင် ထိခိုက်ဒဏ်ရာများရရှိကာ သေဆုံးခဲ့ပြီး မစုစုနှင်းတွင် ထိခိုက်ဒဏ်ရာများ ရရှိခဲ့သောကြောင့် ထက်ထက်ဝေ အား ဟောင်လိတ်နယ်မြေ ရဲစခန်း ယာဉ်(ပ)၄/၂၀၂၆၊ ရာဇသတ်ကြီးပုဒ်မ ၃၀၄-က/၃၃၇/၂၇၉ ဖြင့် အမှုဖွင့်အရေးယူထားကြောင်း သတင်းရရှိပါသည်။