လုပ်ငန်းခွင်အကြိုမူလတန်းဆရာအတတ်ပညာသင်တန်း PPTT(၉/၂၃) သင်တန်းသား၊သင်တန်းသူများအားကြိုဆို

လုပ်ငန်းခွင်အကြိုမူလတန်းဆရာအတတ်ပညာသင်တန်း PPTT(၉/၂၃) သင်တန်းသား၊သင်တန်းသူများအားကြိုဆို

ဘားအံ - ဇွန် (၇)

ပညာရေးဝန်ကြီးဌာန၊ ဘားအံပညာရေးဒီဂရီကောလိပ်၊ ၂၀၂၂-၂၀၂၃ ပညာသင်နှစ် လုပ်ငန်းခွင်အကြို မူလတန်းဆရာအတတ်ပညာသင်တန်း PPTT (၉/၂၀၂၃) သင်တန်းသား၊ သင်တန်းသူများအား ကြိုဆိုသည့် အခမ်းအနားကို ဇွန်လ ၇ ရက်နေ့ နံနက် ၈ နာရီခန့်က ဘားအံမြို့၊ ဇွဲကပင်ခန်းမ၌ ကျင်းပသည်။

ကြိုဆိုပွဲတွင် ကရင်ပြည်နယ်ဝန်ကြီးချုပ်ဦးစောမြင့်ဦးက မောင်တို့၊မယ်တို့သည် တက္ကသိုလ်မှ ဘာသာရပ် ဆိုင်ရာဘွဲ့အသီးသီးကို ရရှိပြီးထားသူများဖြစ်ကြပြီး ဘာသာရပ်ဆိုင်ရာ အကြောင်းအရာများကိုနှံ့စပ်ကျွမ်းကျင်သူများ ဖြစ်ကြကာ ယခုသင်တန်းတွင် ဆရာ့အတတ်ပညာအရည်အသွေးပြည့်ဝသော ဆရာကောင်း၊ ဆရာမွန်များအဖြစ် သင်ပြနည်းဆိုင်ရာပညာရပ်များကို ထပ်လောင်းလေ့ကျင့်သင်ကြားသွားကြရန် အထူးမှာကြားလိုကြောင်း၊ မိမိတို့၏ ဘဝလမ်းလျှောက်လှမ်းနိုင်ရန်အတွက် တန်းဖိုးရှိလှသော ဆရာ့ဘဝကိုခံယူပြီး ပညာရေးလောကထဲသို့ ဝင်ရောက်လာ ကြသည့်အတွက် အထူးဂုဏ်ယူဝမ်းမြောက်မိပါကြောင်း၊ လက်တွေ့ဘဝနှင့်ပေါင်းစပ်/ဆက်စပ်သင်ယူနိုင်သော၊ စဉ်းစားတွေးခေါ်သင်ကြားပို့ချပေးနိုင်သော ဆရာ၊ဆရာမကောင်းများဖြစ်အောင် ကြိုးစားရင်းဖြင့် စာရိတ္တမဏ္ဍိုင်ခိုင်မာ သော ဆရာများဖြစ်အောင် မိမိကိုယ်မိမိ ပြုစုပျိုးထောင်၍ မိမိတပည့်များကိုလည်း စာရိတ္တမဏ္ဍိုင်ခိုင်မာသော နိုင်ငံ့သားကောင်းများဖြစ်အောင် ပြုစုပျိုးထောင်ပေးကြရန် တိုက်တွန်းပြောကြားသည်။

ထို့နောက် ဘားအံပညာရေးဒီဂရီကောလိပ် ကျောင်းအုပ်ဆရာမကြီးက သင်တန်းဆိုင်ရာအချက်အလက်များ ကို ရှင်းလင်းပြောကြားပြီး ပြည်နယ်ဝန်ကြီးချုပ်က သင်တန်းသား၊သင်တန်းသူတစ်ဦးလျှင် ငွေကျပ်နှစ်သောင်းနှုန်းဖြင့် သင်တန်းသား၊သင်တန်းသူ(၃၃၂)ဦးအတွက် စုစုပေါင်းငွေကျပ် (၆၆)သိန်း(၄)သောင်းကျပ်ကို ကျောင်းအုပ်ဆရာမကြီး ထံ ထောက်ပံ့ပေးအပ်ရာ သင်တန်းသား၊သင်တန်းသူများကိုယ်စား သင်တန်းသားတစ်ဦးက ကျေးဇူးတင်စကားပြန် လည် ပြောကြားသည်။

ယင်းနောက် သင်တန်းသား၊သင်တန်းသူများက တိုင်းရင်းသားရိုးရာယဉ်ကျေးမှုအကအလှများဖြင့် သီဆိုကပြ ဖျော်ဖြေကြပြီး ပြည်နယ်ဝန်ကြီးချုပ်နှင့်အစိုးရအဖွဲ့ဝင်များက ဂုဏ်ပြုဆုများပေးအပ်ချီးမြှင့်ကာ သင်တန်းသား၊ သင်တန်းသူများအား ရင်းရင်းနှီးနှီးတွေ့ဆုံနှုတ်ဆက်၍ အားပေးစကားများပြောကြားခဲ့သည်။

ဘားအံပညာရေးဒီဂရီကောလိပ်၏ ၂၀၂၂-၂၀၂၃ ပညာသင်နှစ် လုပ်ငန်းခွင်အကြို မူလတန်းဆရာအတတ် ပညာသင်တန်း PPTT (၉/၂၀၂၃) သို့ ကရင်ပြည်နယ်နှင့်ဧရာဝတီတိုင်းဒေသကြီးတို့မှ သင်တန်းသား၊သင်တန်းသူ ၃၃၂ ဦး တက်ရောက်လျက်ရှိပြီး ဇွန်လ ၁ ရက်နေ့မှ ဇူလိုင်လ ၃၁ ရက်နေ့ထိ ပညာရေးဆိုင်ရာဘာသာရပ်များ၊ သင်ရိုးညွှန်းတမ်းနှင့်သင်ပြနည်းဆိုင်ရာလေ့လာမှုဘာသာရပ်များကို စာတွေ့လက်တွေ့ သင်ကြားပို့ချပေးသွားမည်ဖြစ် ကာ အခမ်းအနားအပြီးတွင် သင်တန်းသား၊သင်တန်းသူများသည် ဘားအံမြို့၏ အထင်ကရနေရာများဖြစ်သော ဦးပေါက်တံတားနှင့်ဇွဲကပင်အဆင့်မြင့်ပန်းခြံများသို့ သွားရောက်လည်ပတ်လေ့လာခဲ့ကြကြောင်း သိရသည်။

ကရင်ပြည်နယ်အစိုးရအဖွဲ့နှင့် ကရင်ပြည်နယ်ကုန်သည်များနှင့်စက်မှုလက်မှုလုပ်ငန်းရှင်များအသင်းမှ EC၊ CEC များ၊ ညီနောင်အသင်းများအား တွေ့ဆုံသည့်အခမ်းအနားကို ဇွန်လ ၇ ရက်နေ့ နံနက် ၁၀ နာရီခန့်က ပြည်နယ် အစိုးရအဖွဲ့ရုံး အစည်းအဝေးခန်းမ(၂)၌ ကျင်းပသည်။

ထိုသို့တွေ့ဆုံရာတွင် ကရင်ပြည်နယ်ဝန်ကြီးချုပ်ဦးစောမြင့်ဦးက MSMEs လုပ်ငန်းများဖွံ့ဖြိုးတိုးတက်ရေး အတွက် အားသွန်ခွန်စိုက်ဆောင်ရွက်လျက်ရှိရာတွင် စိုက်ပျိုးမွေးမြူရေးကိုအခြေခံသည့်နိုင်ငံဖြစ်သည့်အတွက် စိုက်ပျိုးမွေးမြူရေးထုတ်ကုန်များကို တန်ဖိုးမြှင့်ထုတ်လုပ်၍ တင်ပို့ရောင်းချပြီး အခြားစီးပွားရေးလုပ်ငန်းများကို ဖွံ့ဖြိုး တိုးတက်အောင် ဆောင်ရွက်ကြရမည်ဖြစ်ကြောင်း၊ ပြည်နယ်၏ ကုန်သွယ်မှုအနေအထားအရ သွင်းကုန်လျော့ချ၍ ပို့ကုန်မြှင့်တင်နိုင်ရန်လိုအပ်ပြီး ဒေသထွက်ကုန်ကြမ်းများကိုအခြေခံသည့် သွင်းကုန်အစားထိုး ကုန်ပစ္စည်းထုတ်လုပ်မှု များကို လုပ်ကိုင်ဆောင်ရွက်နိုင်ရန်လိုကြောင်း၊ ထုတ်ကုန်များပိုမိုတိုးမြှင့်ထုတ်လုပ်နိုင်ရန်အတွက် ကုန်သည်များနှင့် စက်မှုလုပ်ငန်းရှင်များအသင်းနှင့်ညီနောင်အသင်းများမှ အမှန်တကယ်ဆောင်ရွက်ရမည်ဖြစ်ပြီး ထိုသို့ဆောင်ရွက်မှသာ တိုင်းပြည်ဖွံ့ဖြိုးတိုးတက်မည်ဖြစ်ကြောင်း၊ ထို့ကြောင့် လုပ်ငန်းရှင်များအချင်းချင်း စည်းလုံးညီညွတ်စွာဖြင့် ချိတ်ဆက် ပူးပေါင်းဆောင်ရွက်ကြဖို့လိုကြောင်း ပြောကြားသည်။

ထို့နောက် ပြည်နယ်စီးပွားရေးရာဝန်ကြီးဦးစောခင်မောင်မြင့်က MSMEs လုပ်ငန်းများဖွံ့ဖြိုးတိုးတက်ရေး ရှေ့ဆက်ဆောင်ရွက်မည့်လုပ်ငန်းစဉ်များကို ရှင်းလင်းပြောကြားပြီး စားသုံးသူရေးရာဦးစီးဌာန၊ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၊ စက်မှုကြီးကြပ်နှင့်စစ်ဆေးရေးဦးစီးဌာနတို့မှ ပြည်နယ်ဦးစီးမှူးများက MSMEs လုပ်ငန်းများရေရှည်ဖွံ့ဖြိုးတိုးတက်ရေးဆိုင်ရာများကို သက်ဆိုင်ရာဌာနအလိုက် ရှင်းလင်းဆွေးနွေးတင်ပြကြပြီး တွေ့ဆုံပွဲသို့တက်ရောက်လာသော ကုန်သည်စက်မှုလက်မှုလုပ်ငန်းရှင်များအသင်းနှင့် ညီနောင်များအသင်း စုစုပေါင်း အသင်း ၃၀ မှ တာဝန်ရှိသူများက သက်ဆိုင်ရာလုပ်ငန်းများအလိုက် ဆွေးနွေးတင်ပြကြရာ တက်ရောက်လာသူများမှ ဝိုင်းဝန်းအကြံပြုဆွေးနွေးခဲ့ကြကာ ပြည်နယ်ဝန်ကြီးချုပ်က ပေါင်းစပ်ညှိနှိုင်းဖြည့်ဆည်းဆောင်ရွက်ပေးခဲ့ကာ နိဂုံးချုပ် အမှာစကားပြောကြားသည်။

ယင်းနောက် မြဝတီနယ်စပ်သယ်ယူပို့ဆောင်ရေးနှင့်ဝန်ဆောင်မှုလုပ်ငန်းရှင်များအသင်းမှ မိုခါမုန်တိုင်း ဘေးသင့် ပြည်သူများအတွက် ငွေကျပ်သိန်း(၅၀)ကို ပေးအပ်လှူဒါန်းရာ ကရင်ပြည်နယ်ဝန်ကြီးချုပ်က လက်ခံရယူပြီး ဂုဏ်ပြု မှတ်တမ်းလွှာ ပြန်လည်ပေးအပ်ခဲ့ပါသည်။