ဧရာဝတီတိုင်းဒေသကြီး၊ ဟင်္သာတမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံး

ဧရာဝတီတိုင်းဒေသကြီး၊ ဟင်္သာတမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံး

    ၂၀၂၆ ခုနှစ်၊ ဧပြီ ၆ ရက်က ဧရာဝတီတိုင်းဒေသကြီး၊ ဟင်္သာတမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးခဲ့ကြောင်း သိရသည်။
    ဖြစ်စဉ်မှာ ဧပြီ ၆ ရက် နံနက် ၁၁ နာရီ ၁၀ မိနစ်အချိန်တွင် ဧရာဝတီတိုင်းဒေသကြီး၊ ဟင်္သာတမြို့နယ်၊ သပြုပင်ကျေးရွာအနီး ဟင်္သာတ-ဇလွန်ကားလမ်း မိုင်တိုင်အမှတ် ၄ မိုင် ၅ ဖာလုံနှင့် ၆ ဖာလုံကြား၌ ယာဉ်တိုက်မှုဖြစ်ပွားကြောင်း သတင်းအရ ဒူးယားနယ်မြေရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ ဇလွန်မြို့မှ ဟင်္သာတမြို့ဘက်သို့ ဇလွန်မြို့နယ်၊ ကျီးတောရိုးကျေးရွာနေ ညီညီအောင်(၅၁)နှစ် မောင်းနှင်လာသော AYY/80W-XXXX Sawasdee 115 ဆိုင်ကယ်သည် အခင်းဖြစ်နေရာအရောက်၌ လားရာတူလမ်း၏ယာဘက်တွင် ရပ်တန့်ထားသော 9N-XXXX DONGFENG ခရီးသည်တင်မော်တော်ယာဉ်အား ကျော်တက်စဉ် ယာဉ်ဝဲဘက်ခြမ်းအား ဝင်ရောက်တိုက်မိသဖြင့် ညီညီအောင်တွင် ထိခိုက်ဒဏ်ရာများရရှိကာ သေဆုံးသွားခဲ့သောကြောင့် ညီညီအောင် အား ဒူးယားနယ်မြေရဲစခန်း ယာဉ်(ပ) ၂/၂၀၂၆၊ ရာဇသတ်ကြီးပုဒ်မ ၃၀၄-က ဖြင့် အမှုဖွင့်အရေးယူထားကြောင်း သတင်းရရှိပါသည်။