MPT က “အတူလက်တွဲ အမြဲရှိမည်”ဟူသည့် ကတိကဝတ်နှင့်အညီ ၂၀၂၂-၂၃ ဘဏ္ဍာနှစ် အတွင်း အများပြည်သူတို့၏ ကျန်းမာရေးနှင့် လူမှုဘဝများ အဆင်ပြေစေရေးအတွက် အလေးပေး ပံ့ပိုးကူညီခဲ့

၂၀၂၂ခုနှစ် ဇူလိုင်လအတွင်းတွင် လူသားချင်းစာနာထောက်ပံ့မှုကို အထောက်အကူဖြစ်စေနိုင်ရန်အတွက် မြန်မာနိုင်ငံကြက်ခြေနီအသင်းမှ ဆောင်ရွက်လျက်ရှိသော လူမှုကရုဏာလုပ်ငန်းများအတွက် MPT က ကျပ်သန်း (၅၀) ကူညီပံ့ပိုးပေးခဲ့ပါသည်။ ယခုအစီအစဥ်အရ အကူအညီလိုအပ်နေသူ ၃,၆၉၄ ဦးအား ပံ့ပိုးကူညီ ပေးနိုင်ခဲ့ ပါသည်။

၂၀၂၂ခုနှစ် စက်တင်ဘာလအတွင်း မျက်စိစမ်းသပ်ခန်းတွင် အသုံးပြုသည့် အမေရိကန်ဒေါ်လာ ၄၈၀၀ တန်ဖိုးရှိသော Non-contact Tonometer (NCT) CT-800 ရေတိမ်တိုင်းစက်ကို မြန်မာ့မီးရထားဆေးရုံ (အင်းစိန်) သို့ လှူဒါန်းခဲ့ပြီး အဆိုပါ လှူုဒါန်းမှုမှတစ်ဆင့် မျက်စိဝေဒနာရှင် လူရာပေါင်းများစွာ ကုသမှု ခံယူနိုင်မည် ဖြစ်ပါသည်။

၂၀၂၂ခုနှစ် နိုဝင်ဘာလအတွင်းတွင် တိုင်းဒေသကြီးနှင့် ပြည်နယ်များရှိ နေရာဒေသ (၂၄) ခုမှ ဘိုးဘွားရိပ်သာများနှင့် အခြားလိုအပ်နေသောနေရာများသို့ မြန်မာကျပ်ငွေ  (၅၅) သန်း တန်ဖိုးရှိ အခြေခံစားသောက်ကုန်များနှင့် လှူဒါန်းငွေများကို လှူဒါန်းဆောင်ရွက်ခဲ့ပါသည်။ ပြည်တွင်းအော်ပရေတာဖြစ်သည့် MPT အနေဖြင့် မြန်မာ့ရိုးရာဓလေ့များကို လေးစားတန်ဖိုးထားပြီး ယခုလှူဒါန်းမှုအား လူကြီးသူမများကို ဂါရဝပြုသည့် တန်ဆောင်တိုင် ကာလတွင် သုံးစွဲသူ အများပြည်သူတို့အား ကျေးဇူးတုံ့ပြန်မှုကို ပြသသည့် အနေဖြင့် လှူဒါန်းဆောင်ရွက်ခဲ့ခြင်းဖြစ်ပါသည်။

သွေးလှူဒါန်းခြင်းသည် လူ့အသက်ကယ်တင်ခြင်းနှင့် ကျန်းမာရေးအခြေအနေကို ပိုမိုကောင်းမွန်စေသော အခြေခံကျသည့် လိုအပ်ချက်တစ်ရပ်ဖြစ်သောကြောင့် MPT အနေဖြင့် ၂၀၁၆ခုနှစ်မှ စတင်၍ ၂၀၁၉ ခုနှစ် ကိုဗစ်ကာလ မတိုင်မီအထိ နိုင်ငံတစ်ဝန်းစုပေါင်းသွေးလှူဒါန်းမှုများကို အများပြည်သူနှင့် လူမှုအဖွဲ့အစည်းများ၏ အကူအညီဖြင့် တစ်နှစ်လျှင် သုံးကြိမ်မျှ ဆောင်ရွက်ခဲ့ပြီးဖြစ်ပါသည်။ ၂၀၁၆ခုနှစ်မှ ၂၀၁၉ခုနှစ်အထိ လူမှုအသိုက်အဝန်း အတွက် သွေးအိတ် ပေါင်း ၁သောင်းကျော်ခန့် လှူဒါန်းပြီးဖြစ်ကာ ပါဝင်လှူဒါန်းသူဦးရေမှာ ၇,၀၀၀ ခန့်ဖြစ်ပါသည်။ လွန်ခဲ့သည့် ၂၀၂၃ခုနှစ် ဖေဖော်ဝါရီလတွင် MPT ဝန်ထမ်းများ နှင့် စေတနာသွေးလှူရှင်များ ပါဝင် ဆောင်ရွက်ခဲ့သော စုပေါင်း သွေးလှူဒါန်းမှုမှတစ်ဆင့် နေပြည်တော်၊ ရန်ကုန်နှင့် မန္တလေးမြို့ တို့မှ သွေးလိုအပ်သူများ နှင့် အရေးပေါ်သွေးဌာနများသို့ သွေးအိတ်ပေါင်း (၁၈၉)အိတ်ကျော် ထပ်မံလှူဒါန်းနိုင်ခဲ့ ပါသည်။ 

MPT အနေဖြင့် သာတူညီမျှရှိမှုူ၊ အမျိုးသမီးများ၏ စွမ်းရည်နှင့် ကြံ့ခိုင်မှုတို့ကို အလေးထားအသိအမှတ်ပြုပြီး MPT ဝန်ထမ်းဦးရေ၏ ထက်ဝက်ခန့်မှာလည်း အမျိုးသမီးများဖြစ်ပါသည်။ ထို့အပြင် MPT အနေဖြင့် အမျိုးသမီးများ၏ လူမှုအသိုက်အဝန်းအပေါ် အထောက်အကူပြုမှုကို ဂုဏ်ပြုသည့်အနေဖြင့် အမေများနေ့၊ မြန်မာအမျိုးသမီးများနေ့နှင့် အပြည်ပြည်ဆိုင်ရာ အမျိုးသမီးများနေ့ အထိမ်းအမှတ် အထူးအစီအစဥ်များကို ၂၀၂၂ခုနှစ် မေလနှင့် ဇွန်လအတွင်းက ကျင်းပခဲ့ပါသည်။ အဆိုပါ အထူးအစီအစဥ်များမှတစ်ဆင့် သုံးစွဲသူများနှင့် MPT တို့မှ ရရှိခဲ့သော မြန်မာကျပ်ငွေ (၇.၄) သန်းအား ရွှေသံလွင် ဘိုးဘွားရိပ်သာ၊ Save The Aged ဘိုးဘွားရိပ်သာ နှင့် ပြည်သူ့ကျန်းမာရေး ဖောင်ဒေးရှင်း (PHF) သို့ လှူဒါန်းခဲ့ပါသည်။

မိမိတို့၏ စိတ်ကူး အိပ်မက်များ အမှန်တကယ်လက်တွေ့ဖြစ်လာချိန်တွင် အတိုင်းမသိ ပျော်ရွှင်ဝမ်းမြောက်မှုကို ခံစားကြရမှာဖြစ်ပြီး MPT အနေဖြင့် သုံးစွဲသူအများပြည်သူတို့၏ အိပ်မက်များ အကောင်အထည် ပေါ်လာရေး အတွက် တတ်စွမ်းသမျှ ဖြည့်ဆည်းဆောင်ရွက်လိုသည့် ဆန္ဒရှိထားပါသည်။ ထို့ကြောင့် မိသားစု၊ လုပ်ငန်းသစ်အတွက် ထောက်ပံ့ခြင်း(မိမိကိုယ်တိုင်အတွက်)၊ ရပ်ရွာအဖွဲ့အစည်းများအတွက် ကူညီထောက်ပံ့ခြင်း၊ သတ်မှတ်ချက်အားလုံး ပြည့်မီသည့် အိပ်မက်အမျိုးအစား စသဖြင့် အမျိုးအစား (၄) မျိုးပါဝင်သော “ရွှေအိပ်မက်” အစီအစဥ်အား စီစဥ်ဆောင်ရွက်ခဲ့ပါသည်။ အဆိုပါ အစီအစဥ်မှ ကံထူးရှင် (၇) ယောက်ကို ရွေးချယ်ခဲ့ပြီး စုစုပေါင်း မြန်မာကျပ်ငွေ သန်း (၃၂၀) တန်ဖိုးရှိ ၎င်းတို့၏ အိပ်မက်များကို အကောင်အထည်ဖော်ပေးခဲ့ပါသည်။

၂၀၂၂ ခုနှစ် နိုဝင်ဘာလအတွင်းတွင် MPT အနေဖြင့်  ကျွမ်းကျင်စားဖိုမှူး ဖြစ်လိုသည့် ဟင်းချက်ဝါသနာရှင်များ၏ အိပ်မက်ကို အကောင်အထည်ဖော်နိုင်သည့် အခွင့်အရေးတစ်ခုဖြစ်ပြီး ယင်းပြိုင်ပွဲမှတစ်ဆင့် ၎င်းတို့၏ အချက်အပြုတ်စွမ်းရည်များကို ပြသနိုင်မည့် MasterChef All Stars Myanmar အစီအစဥ်ကို ကူညီပံ့ပိုး ပေးခဲ့ ပါသည်။  ဟင်းချက်ဝါသနာပါသည့် MPT သုံးစွဲသူများ အနေဖြင့် ယခုဟင်းချက်ပြိုင်ပွဲမှတစ်ဆင့် လေ့လာသင်ယူခွင့် ရရှိရန်နှင့် ဖျော်ဖြေမှုရရှိနိုင်သည့်အပြင် စားဖိုမှူးအဖြစ် အသက်မွေးဝမ်းကျောင်းပြုနိုင်သည့် အခွင့်အရေးကို ရရှိနိုင်သောကြောင့် အဓိကပံ့ပိုးသူအဖြစ် ကူညီဆောင်ရွက်ပေးခဲ့ခြင်းဖြစ်ပါသည်။

မြန်မာလူငယ်ဘောလုံးအားကစားဖွံ့ဖြိုးတိုးတက်စေရေးနှင့် အားကစား မှတစ်ဆင့် တက်ကြွလှုပ်ရှားမှုရှိသည့် လူနေမှုဘဝကို ရရှိနိုင်ရေးအတွက် မြန်မာနေရှင်နယ်လိဂ်နှင့် မြန်မာဘောလုံးအဖွဲ့ချုပ်တို့နှင့် ၂၀၁၈ခုနှစ်မှစတင်၍ လက်တွဲဆောင်ရွက်ခဲ့ပါသည်။ ပြီးခဲ့သည့် ၂၀၂၂ ခုနှစ်တွင် MPT အနေဖြင့် မြန်မာနေရှင်နယ်လိဂ်အတွက် မြန်မာကျပ်ငွေ (၆၄၇) သန်း ကူညီပံ့ပိုးပေးခဲ့ပါသည်။

MPT အနေဖြင့် နိုင်ငံတစ်ဝန်းရှိ သုံးစွဲသူများအတွက် အကောင်းဆုံးသော တယ်လီကွန်းဝန်ဆောင်မှုများကို ပေးအပ်နိုင်ရန် အစဥ်အမြဲကြိုးပမ်းလျက်ရှိပါသည်။ လာမည့် ဘဏ္ဍာနှစ်အတွက်လည်း ဧပြီလ မှ စတင်၍ နိုင်ငံတစ်ဝန်း ကူညီပံ့ပိုးပေးမှုများကို စတင်ဆောင်ရွက်သွားမည်ဖြစ်ပါသည်။ MPT အနေဖြင့် မြန်မာ့ရိုးရာ ဓလေ့ထုံးတမ်းအစဥ်အလာများကို တန်ဖိုးထားကျင့်သုံးလျက်ရှိပြီး လာမည့်သင်္ကြန် ကာလ အတွင်းတွင်လည်း မိဘမဲ့ဂေဟာများ၊ ဘိုးဘွားရိပ်သာများ၊ ဘုန်းတော်ကြီးနှင့် သီလရှင်ကျောင်းများ၊ ဘုန်းတော်ကြီးသင် ပညာရေးကျောင်းများနှင့် အခြားပြည်တွင်းအဖွဲ့အစည်းများ အပါအဝင် နိုင်ငံတစ်ဝန်းရှိ လူမှုအသိုက်အဝန်းအတွက် လှူဒါန်းမှုများ ပြုလုပ်သွားမည်ဖြစ်ပါသည်။