ဂမ်ဘီယာနှင့် မြန်မာနိုင်ငံတို့၏ အမှုနှင့် ပတ်သက်သည့် ကြားနာပွဲတွင် မြန်မာနိုင်ငံ၏ ရှေ့နေများက ဆက်လက်တုန့်ပြန်ချေပလျှောက်ထား

ဂမ်ဘီယာနှင့် မြန်မာနိုင်ငံတို့၏ အမှုနှင့် ပတ်သက်သည့် ကြားနာပွဲတွင် မြန်မာနိုင်ငံ၏ ရှေ့နေများက ဆက်လက်တုန့်ပြန်ချေပလျှောက်ထား

နေပြည်တော် ဇန်နဝါရီ ၂၁

ဂမ်ဘီယာနှင့် မြန်မာနိုင်ငံတို့၏ အမှုနှင့်ပတ်သက်၍ ကြားနာပွဲ (Oral Hearing) ကို ဇန်နဝါရီ ၁၂ ရက်မှ ၂၉ ရက်အထိ နယ်သာလန်နိုင်ငံသည်ဟိတ်မြို့ရှိ အပြည်ပြည်ဆိုင်ရာတရားရုံး၌ ပြုလုပ်လျက်ရှိရာ မြန်မာနိုင်ငံ၏ ပထမအကျော့ တင်ပြလျှောက်ထားခြင်းကို ဇန်နဝါရီ ၁၉ ရက် ဒေသစံတော်ချိန် နံနက် ၁၀ နာရီမှ ညနေ ၆ နာရီအထိ ပြုလုပ်ခဲ့ရာ မြန်မာနိုင်ငံ၏ ဦးဆောင်ရှေ့နေ Mr.Christopher Staker ၊ မြန်မာနိုင်ငံ၏ ရှေ့နေ Mr. Sam-Bloom Cooper နှင့် Ms. Leigh Lawrie တို့က တုန့်ပြန်ချေပလျှောက်လဲခဲ့ကြသည်။

ဆက်လက်၍လည်း မြန်မာနိုင်ငံ၏ ရှေ့နေ Mr. Stefan Talmon က မြန်မာနိုင်ငံသည် ဘင်္ဂါလီများဖိနှိပ်ရန် အမုန်းစကားဖြန့်ချိမှုကို အစိုးရ သို့မဟုတ် တပ်မတော်က ဦးစီးဆောင်ရွက်ခဲ့သည့်အတွက် ဘင်္ဂါလီများကို မျိုးသုဉ်းစေလိုသည့် ရည်ရွယ်ချက်ရှိကြောင်း ဂမ်ဘီယာ၏ လျှောက်လဲမှုနှင့်စပ်လျဉ်း၍ လည်းကောင်း၊ မြန်မာနိုင်ငံ၏ ရှေ့နေ Ms. Alina Mironက အပြစ်ပေးရန် ပျက်ကွက်မှုနှင့် သက်သေအထောက်အထားများ ဖျက်ဆီးမှုဆိုင်ရာစွပ်စွဲချက်များနှင့် ပတ်သက်၍လည်းကောင်း၊ မြန်မာနိုင်ငံ၏ ရှေ့နေ Sam- Bloom Cooper က သက်သေပြရန် တာဝန်ကို ကျေပွန်အောင်ဆောင်ရွက်နိုင်ခြင်းမရှိကြောင်း စွပ်စွဲချက်နှင့်ပတ်သက်၍လည်းကောင်း၊ မြန်မာနိုင်ငံ၏ရှေ့နေ Ms. Alina Miron က ဂမ်ဘီယာက မြန်မာနိုင်ငံအနေဖြင့် လူမျိုးသုဉ်းသတ်ဖြတ်မှုကို ကျူးလွန်မှုမရှိစေရေးနှင့် ကျူးလွန်သူများအား အပြစ်ပေးရန်နှင့် ဥပဒေပြဋ္ဌာန်းရန်ပျက်ကွက်သည်ဟု စွပ်စွဲချက်နှင့် ပတ်သက်၍ လည်းကောင်း ၊ မြန်မာနိုင်ငံ၏ ရှေ့နေ Mr. Stefan Talmon က ဂမ်ဘီယာဘက်မှ စွပ်စွဲတောင်းဆိုထားသည့် ဥပဒေရေးရာနောက်ဆက်တွဲကိစ္စရပ်များနှင့် ပတ်သက်၍လည်းကောင်း တုန့်ပြန်ချေပ လျှောက်လဲခဲ့ကြကြောင်း သတင်းရရှိသည်။