လူသိနည်းပါးသော (လျစ်လျူရှုခံ) မျိုးစိတ်များအပေါ် အခြေခံသည့် အပင်မျိုးဗီဇအရင်းအမြစ်ထိန်းသိမ်းခြင်း အလုပ်ရုံဆွေးနွေးပွဲ ကျင်းပ

လူသိနည်းပါးသော (လျစ်လျူရှုခံ) မျိုးစိတ်များအပေါ် အခြေခံသည့် အပင်မျိုးဗီဇအရင်းအမြစ်ထိန်းသိမ်းခြင်း အလုပ်ရုံဆွေးနွေးပွဲ ကျင်းပ

နေပြည်တော် ဖေဖော်ဝါရီ ၉

လူသိနည်းပါးသော (လျစ်လျူရှုခံ) မျိုးစိတ်များအပေါ် အခြေခံသည့် အပင်မျိုးဗီဇအရင်းအမြစ်များ ထိန်းသိမ်းခြင်း အလုပ်ရုံဆွေးနွေးပွဲကို ယမန်နေ့ နံနက်ပိုင်းက ရေဆင်းစိုက်ပျိုးရေးတက္ကသိုလ်၌ ကျင်းပသည်။

တက်ရောက်

အလုပ်ရုံဆွေးနွေးပွဲသို့ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာတင်ထွဋ်နှင့် ရေဆင်းစိုက်ပျိုးရေးတက္ကသိုလ်မှ ပါမောက္ခချုပ်၊ ဒုတိယပါမောက္ခချုပ်များ၊ ပါမောက္ခများ၊ ဌာနမှူးများ၊ ဆရာ ဆရာမများနှင့် တိုင်းဒေသကြီးနှင့် ပြည်နယ်များမှ ကျောင်းသား ကျောင်းသူများ တက်ရောက်ကြသည်။

အလုပ်ရုံဆွေးနွေးပွဲတွင် ဒုတိယဝန်ကြီးက မြန်မာနိုင်ငံ၌ တိုင်းဒေသကြီးများနှင့် ပြည်နယ်များအလိုက် စားရေရိက္ခာနှင့် ဆေးဖက်ဝင်အပင်၊ ထူးခြားသော အပင်မျိုးစိတ်များ ကြွယ်ဝစွာရှိသဖြင့် မြန်မာနိုင်ငံ၏ ဇီဝမျိုးစုံမျိုးကွဲကြွယ်ဝမှုကို ကိုယ်စားပြုပါကြောင်း၊ စီးပွားဖြစ်စိုက်ပျိုးဖြစ်ထွန်းမှုမရှိသေးဘဲ လျစ်လျူရှုခံနေရသော အပင်မျိုးစိတ်များကို ပျောက်ဆုံးမှုမရှိရန် ထိန်းသိမ်းခြင်းသည် ပြည်ထောင်စုကြီး၏ သဘာဝအမွေအနှစ်ကို ထိန်းသိမ်းခြင်းပင်ဖြစ်ပါကြောင်း၊ မျိုးရိုင်းများတွင်ရှိသော ထူးကဲသည့် လက္ခဏာများကို အသုံးပြု၍ အထွက်ကောင်းမျိုးများ ထုတ်လုပ်ခဲ့ပါကြောင်း။

လျစ်လျူရှုခံ မျိုးစိတ်များကို ပျောက်ကွယ်မျိုးသုဉ်းမှုမရှိစေရန် ပြန်လည်ထိန်းသိမ်းကာကွယ်ခြင်းဖြင့် မိမိတို့နိုင်ငံတွင် အပင်မျိုးစိတ်များ၏ ကြွယ်ဝမှုကို မှတ်တမ်းတင်နိုင်မည်ဖြစ်ကြောင်း၊ အဆိုပါမျိုးစိတ်များတွင် ပါဝင်သည့် ဓာတုဒြပ်ပေါင်းများကို ရှာဖွေဖော်ထုတ်ပြီး လူသားများ၏ ကျန်းမာရေး၊ စိုက်ပျိုးရေးနှင့် မွေးမြူရေးနယ်ပယ်များတွင် အသုံးပြုနိုင်မည်ဖြစ်ကြောင်း၊ လူသားအကျိုးပြုတန်ဖိုးမြင့်ထုတ်ကုန်များကိုလည်း ထုတ်လုပ်နိုင်မည်ဖြစ်ကြောင်း ပြောကြားသည်။

ထို့နောက် တက်ရောက်လာကြသူများက “လူသိနည်းပါးသော (လျစ်လျူရှုခံ) မျိုးစိတ်များအပေါ် အခြေခံသည့် အပင်မျိုးဗီဇအရင်းအမြစ်ထိန်းသိမ်းခြင်း” ခေါင်းစဉ်ဖြင့် ဆွေးနွေးခြင်း၊ စာရင်းပြုစုခြင်းများ ဆောင်ရွက်ကြပြီး တိုင်းဒေသကြီးနှင့် ပြည်နယ်အသီးသီးရှိ မျိုးစိတ်စုစုပေါင်း ၂၈၉ မျိုးကို စာရင်းပြုစုနိုင်ခဲ့ကြောင်း သိရသည်။

သတင်းစဉ်