(၁၄) ကြိမ်မြောက် တိုင်းရင်းဆေးသုတေသနစာတမ်းဖတ်ပွဲ ကျင်းပ

(၁၄) ကြိမ်မြောက် တိုင်းရင်းဆေးသုတေသနစာတမ်းဖတ်ပွဲ ကျင်းပ

နေပြည်တော် ဩဂုတ် ၂၈

(၁၄) ကြိမ်မြောက် တိုင်းရင်းဆေးသုတေသနစာတမ်းဖတ်ပွဲ ဖွင့်ပွဲအခမ်းအနားကို ယနေ့နံနက်ပိုင်းတွင် မြန်မာနိုင်ငံဆရာဝန်အသင်း (မန္တလေး) ရတနာပုံခန်းမ၌ ကျင်းပရာ ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်း၊ မန္တလေးတိုင်းဒေသကြီးဝန်ကြီးချုပ် ဦးမျိုးအောင်၊ တိုင်းဒေသကြီးဝန်ကြီးများ၊ ဆေးနှင့် ဆေးနှီးနွှယ်တက္ကသိုလ်များမှ ပါမောက္ခချုပ်များ၊ ဂုဏ်ထူးဆောင်ပါမောက္ခများ၊ မြန်မာနိုင်ငံတိုင်းရင်းဆေးကောင်စီ၊ တိုင်းရင်းဆေးပညာရပ်ဆိုင်ရာအကြံပေးအဖွဲ့၊ မြန်မာနိုင်ငံတိုင်းရင်းဆေးဆရာအသင်း၊ တိုင်းရင်းဆေးဝါးထုတ်လုပ်သူများနှင့် ဆေးပစ္စည်းလုပ်ငန်းရှင်များ အသင်းတို့မှဥက္ကဋ္ဌနှင့် အဖွဲ့ဝင်များ၊ တိုင်းဒေသကြီး၊ ပြည်နယ်များမှကိုယ်စားလှယ်များ၊ စာတမ်းရှင်သုတေသီများနှင့် ဖိတ်ကြားထားသော ဧည့်သည်တော်များ တက်ရောက်ကြသည်။

ဦးစွာ တက်ရောက်လာသူများက တိုင်းရင်းဆေးပညာရှင်များ၏ နဝရတ်ကတိသစ္စာကို သံပြိုင်ရွတ်ဆို၍ စာတမ်းဖတ်ပွဲကို ဖွင့်လှစ်ပေးကြသည်။

ထို့နောက် ပြည်ထောင်စုဝန်ကြီးက နိုင်ငံတော်အစိုးရက တိုင်းရင်းဆေးသုတေသနများ ဆောင်ရွက်ရန် အားပေးနေချိန်တွင် အရှိန်အဟုန်မြှင့်၍ သုတေသနကျင့်ဝတ်နှင့်အညီ စနစ်တကျဆောင်ရွက်ကြရမည်ဖြစ်ကြောင်း၊ တိုင်းရင်းဆေးထုတ်လုပ်သည့် လုပ်ငန်းများသည် နိုင်ငံတော်အစိုးရက အားပေးဆောင်ရွက်လျက်ရှိသည့် အသေးစား၊ အငယ်စားနှင့် အလတ်စားစီးပွားရေးလုပ်ငန်း (MSME) များတွင် ပါဝင်လျက်ရှိသဖြင့် စနစ်တကျဖွံ့ဖြိုးတိုးတက်စေရေး ဆောင်ရွက်ရမည်ဖြစ်ပြီး တိုင်းရင်းဆေးဝါးလုပ်ငန်းရှင်များအနေဖြင့် ဆေးနံ့သာတုပ်ကွေးအဖျားပျောက်ဆေးကဲ့သို့ စနစ်ကျစွာထုတ်လုပ်ရန်လိုကြောင်း၊ လုပ်ငန်းများဖွံ့ဖြိုးလာသည်နှင့်အညီ ရိုးရာအသိပညာကို ကာကွယ်ရေးအတွက် မူပိုင်ခွင့်ကိစ္စများကိုလည်း ထည့်သွင်းစဉ်းစားရမည်ဖြစ်ကြောင်း။

စာတမ်းဖတ်ပွဲတွင် မန္တလေးငလျင်ကြီး ဘေးဒဏ်သင့်ဒေသများရှိ ကျေးရွာနေပြည်သူများအား ကွင်းဆင်းဆေးကုသခြင်း၊ လေ့လာခြင်းနှင့် ပတ်သက်သည့်စာတမ်းများပါဝင်မည်ဖြစ်သဖြင့် ပြန်လည်အသုံးချနိုင်သော ပြည်သူ့ကျန်းမာရေးအကျိုးပြုသုတေသနရလဒ်များ ရရှိစေမည်ဖြစ်ကြောင်း၊ ဆွေးနွေးချက်များကို စနစ်တကျမှတ်တမ်းများထားရှိပြီး မိမိတို့မြန်မာ့တိုင်းရင်းဆေးပညာဖွံ့ဖြိုးတိုးတက်ရေးအတွက် အကျိုးရှိရှိအသုံးချနိုင်ရေး ဆောင်ရွက်ကြရန်နှင့် သုတေသနတွေ့ရှိချက်များကို မျှဝေဖလှယ်ဆွေးနွေးညှိနှိုင်းကာ မြန်မာ့တိုင်းရင်းဆေး ပညာပိုမိုဖွံ့ဖြိုးတိုးတက်စေရေး တက်ညီလက်ညီပူးပေါင်းဆောင်ရွက်ကြရန် တိုက်တွန်းပြောကြားပြီး ဧည့်သည်တော်များနှင့်အတူ ပြသထားသော သုတေသနပိုစတာများကို လှည့်လည်အားပေးကြည့်ရှုသည်။

စာတမ်းဖတ်ပွဲကို ၂၀၂၅ ခုနှစ် ဩဂုတ် ၂၈ ရက်မှ ၂၉ ရက်အထိကျင်းပ၍ သုတေသနစာတမ်းအစောင် ၂၀ နှင့် ပိုစတာ ငါးစောင်ကို ဖတ်ကြားပြသမည်ဖြစ်ပြီး မြန်မာ့တိုင်းရင်းဆေးဝါးများ၏ ဘေးအန္တရာယ်ကင်းရှင်းမှု၊ အာနိသင်ထိရောက်မှုကို စမ်းသပ်လေ့လာခြင်း၊ မြန်မာတိုင်းရင်းဆေးဝါးများ အသုံးပြုမှုကို ပြည်သူလူထုအတွင်း လေ့လာခြင်းစသည့် အကြောင်းအရာများကို ကျန်းမာရေးဝန်ကြီးဌာနသာမက နှီးနွှယ်ဆက်စပ်ဝန်ကြီးဌာနများဖြစ်သော ကာကွယ်ရေးဝန်ကြီးဌာန၊ သိပ္ပံနှင့်နည်းပညာဝန်ကြီးဌာန၊  ပညာရေးဝန်ကြီးဌာနတို့က စာတမ်းများဖတ်ကြား တင်သွင်းကြမည်ဖြစ်သည်။

ထို့နောက် ပြည်ထောင်စုဝန်ကြီးသည် အဖွဲ့ဝင်များနှင့်အတူ အရိုးရောဂါအထူးကုဆေးရုံကြီး (မန္တလေး) ရှိ ခြေတုလက်တုနှင့် အားပြုကိရိယာအလုပ်ရုံ၌ မန္တလေးငလျင်ကြီးကြောင့် ခြေလက်ဆုံးရှုံးခဲ့ရသူများအား ခြေတုလက်တုများ တပ်ဆင်ပေးအပ်သည့် အခမ်းအနားသို့ တက်ရောက်ပြီး ဆေးနှင့် ထောက်ပံ့ပစ္စည်းများ ပေးအပ်လှူဒါန်းသည်။

မန္တလေးငလျင်ကြီးကြောင့် ထိခိုက်ဒဏ်ရာရရှိပြီး ခြေလက်အင်္ဂါဆုံးရှုံးခဲ့သူများအား နိုင်ငံတော်အကြီးအကဲ၏ စေတနာလမ်းညွှန်မှုဖြင့် အလုံးစုံတာဝန်ယူကူညီပံ့ပိုးပေးလျက်ရှိပြီး အရည်အသွေးကောင်းမွန်သော ခြေတုလက်တုများ တပ်ဆင်ခြင်းကို ကျန်းမာရေးဝန်ကြီးဌာနအစီအစဉ်ဖြင့် အမျိုးသားပြန်လည်သန်စွမ်းရေးဆေးရုံ (ရန်ကုန်) နှင့် အရိုးရောဂါအထူးကုဆေးရုံကြီး (မန္တလေး) တို့တွင် ဆောင်ရွက်ပေးလျက်ရှိရာ ၂၀၂၅ ခုနှစ် ဇွန်လအတွင်း ခြေလက်ဆုံးရှုံး သူ ၂၂ ဦးကို ပထမအသုတ်အဖြစ် တပ်ဆင်ကုသပြီးဖြစ်ပြီး ဒုတိယအသုတ်အဖြစ် ခြေတုလက်တုတပ်ဆင်ရန်အသင့်ဖြစ်သူ ၂၁ ဦးကို မန္တလေးနှင့် ရန်ကုန်တို့တွင် ဆောင်ရွက်ပေးနေခြင်းဖြစ်သည်။

မွန်းလွဲပိုင်းတွင် ပြည်ထောင်စုဝန်ကြီးသည် မန္တလေးပြည်သူ့ဆေးရုံကြီး၌ ဩဂုတ် ၂၀ ရက်က (၈၄) ကြိမ်မြောက် ကျောက်ကပ်အစားထိုးခွဲစိတ်ကုသမှုအဖြစ် ဆောင်ရွက်ခဲ့သည့် လူနာနှင့် ကျောက်ကပ်အလှူရှင်တို့အား တွေ့ဆုံအားပေး၍ စားသောက်ဖွယ်ရာများ ပေးအပ်သည်။

အဆိုပါကျောက်ကပ်လူနာသည် အမရပူရမြို့ နေ အသက် ၃၀ ရှိ အမျိုးသားဖြစ်ပြီး ကျောက်ကပ်အလှူရှင်သည် ၎င်း၏ ဝမ်းကွဲညီဖြစ်သူ အသက် ၂၂  နှစ်ရှိ အမျိုးသားဖြစ်ကာ ၎င်းတို့၏ ကျန်းမာရေးအခြေအနေကောင်းမွန်လျက်ရှိသည်။

ထို့နောက် ပြတ်တောက်သွားသည့် ဘယ်ဘက်လက်ဖျံကို ပြန်လည်ဆက်ပေးသည့် ခွဲစိတ်ကုသမှုခံယူခဲ့သည့်လူနာအား သွားရောက်ကြည့်ရှုအားပေးစကားပြောကြားကာ စားသောက်ဖွယ်ရာများ ပေးအပ်သည်။

ဘယ်ဘက်လက်ဖျံပြတ်တောက်ခဲ့သူ လူနာသည် ကျောက်ဆည်မြို့နေ အသက် ၄၀ ရှိ အမျိုးသားဖြစ်ပြီး လက်ပြန်ဆက်သည့် ခွဲစိတ်ကုသမှုကို ဩဂုတ် ၁၉ ရက် ည ၁၀ နာရီ ၅ မိနစ်မှ စတင်ကာ ၇ နာရီနီးပါး ကြိုးစားဆောင်ရွက်ခဲ့ခြင်းဖြစ်ကြောင်းနှင့် ခွဲစိတ်ပြီး လက်၏ သွေးလှည့်ပတ်မှုမှာ တိုးတက်ကောင်းမွန်လျက်ရှိပြီး လက်လှုပ်ရှားမှုများ စတင်ဆောင်ရွက်နိုင်ပြီဖြစ်ကြောင်း သိရသည်။

သတင်းစဉ်