(၃၃) ကြိမ်မြောက် အရှေ့တောင်အာရှအားကစားပြိုင်ပွဲ ခြင်းလုံးပြိုင်ပွဲများမှ မြန်မာနိုင်ငံအတွက် ရွှေတံဆိပ်ဆုများ စတင်ဆွတ်ခူးရရှိ

(၃၃) ကြိမ်မြောက် အရှေ့တောင်အာရှအားကစားပြိုင်ပွဲ ခြင်းလုံးပြိုင်ပွဲများမှ မြန်မာနိုင်ငံအတွက် ရွှေတံဆိပ်ဆုများ စတင်ဆွတ်ခူးရရှိ

(၃၃) ကြိမ်မြောက် အရှေ့တောင်အာရှအားကစားပြိုင်ပွဲ ခြင်းလုံးပြိုင်ပွဲနောက်ဆုံးဗိုလ်လုပွဲစဉ်များကို ဒီဇင်ဘာ ၁၀ ရက်က ထိုင်းနိုင်ငံ နခွန်ပထုန်ပြည်နယ် နခွန်ပထုန်အားကစားစင်တာရှိ ပရိသတ် ၄၀၀၀ ဆံ့ အားကစားရုံ၌ ကျင်းပရာ မြန်မာခြင်းလုံး အမျိုးသမီးအသင်းနှင့် အမျိုးသားအသင်းတို့က ရွှေတံဆိပ်ဆုများ စတင်ဆွတ်ခူးရယူနိုင်ခဲ့သည်။

မြန်မာနိုင်ငံအတွက် ပထမဦးဆုံးရွှေတံဆိပ်ဆုကို မြန်မာခြင်းလုံးအမျိုးသမီးအသင်းက ရယူပေးနိုင်ခဲ့ပြီး ဗိုလ်လုပွဲတွင် မြန်မာအမျိုးသမီးအသင်းသည် အိမ်ရှင်ထိုင်းအမျိုးသမီးအသင်းနှင့် ယှဉ်ပြိုင်ကစားခဲ့ပြီး ရမှတ် ၅၀၂ မှတ် - ၄၄၆ မှတ်ဖြင့် အပြတ်အသတ်အနိုင်ရရှိကာ ရွှေတံဆိပ်ဆုကို ထိုက်ထိုက်တန်တန် ဆွတ်ခူးနိုင်ခဲ့ခြင်းဖြစ်သည်။

အဆိုပါရွှေတံဆိပ်ဆုသည် (၃၃) ကြိမ်မြောက် အရှေ့တောင်အာရှအားကစားပြိုင်ပွဲ၏ ပထမဆုံးဆုတံဆိပ်ဖြစ်သကဲ့သို့ မြန်မာနိုင်ငံအတွက်လည်း ပထမဆုံးဆုတံဆိပ်ဖြစ်ကြောင်း သိရသည်။ အဆိုပါခြင်းလုံးပြိုင်ပွဲတွင် လာအိုခြင်းလုံးအမျိုးသမီး အသင်းက ၃၁၅ မှတ်ဖြင့် တတိယရရှိခဲ့ပြီး မလေးရှားအသင်းက ၇၇ မှတ်ဖြင့် စတုတ္ထရရှိခဲ့သည်။

ထို့အပြင် (၃၃) ကြိမ်မြောက် အရှေ့တောင်အာရှ အားကစားပြိုင်ပွဲ ရိုးရာခြင်းလုံးပြိုင်ပွဲတွင် မြန်မာခြင်းလုံးအမျိုးသားအသင်းကလည်း မြန်မာနိုင်ငံအတွက် ဒုတိယမြောက် ရွှေတံဆိပ်ဆုကို ထိုက်ထိုက်တန်တန် ထပ်မံဆွတ်ခူးရယူပေးနိုင်ခဲ့သည်။ အမျိုးသားခြင်းလုံးဗိုလ်လုပွဲတွင်လည်း မြန်မာနှင့် ထိုင်းအသင်းတို့ ယှဉ်ပြိုင်ကစားခဲ့ပြီး မြန်မာအသင်းက ရမှတ် ၅၇၄ မှတ် - ၅၀၁ မှတ်ဖြင့် အနိုင်ရရှိခဲ့ကာ ရွှေတံဆိပ်ဆွတ်ခူးနိုင်ခဲ့ခြင်းဖြစ်သည်။ အဆိုပါခြင်းလုံးပြိုင်ပွဲတွင် လာအိုအသင်းက ၃၇၅ မှတ်ဖြင့် တတိယရရှိခဲ့ပြီး မလေးရှားအသင်းက ရမှတ် ၁၆၀ ဖြင့် စတုတ္ထရရှိခဲ့သည်။

မြန်မာနိုင်ငံအတွက် ထိုက်ထိုက်တန်တန်ဖြင့် ပထမဆုံးရွှေတံဆိပ်ဆုကို ဆွတ်ခူးရယူပေးခဲ့သည့် ခြင်းလုံးအမျိုးသမီးအသင်းနှင့် ဒုတိယမြောက် ရွှေတံဆိပ်ဆုကို ထပ်မံဆွတ်ခူးရယူပေးနိုင်ခဲ့သည့် ခြင်းလုံးအမျိုးသားအသင်းတို့ကို အားကစားနှင့် လူငယ်ရေးရာဝန်ကြီးဌာနက USD $ 600၊ ကမ္ဘောဇဘဏ်နာယက ဦးအောင်ကိုဝင်းက ထိုင်းဘတ်ငွေခြောက်သိန်း၊ မြန်မာနိုင်ငံရွက်လှေအဖွဲ့ချုပ်ဥက္ကဋ္ဌ ဦးမိုးမြင့်က ထိုင်းဘတ်ငွေငါးသောင်း၊ ရန်ကုန်တိုင်းဒေသကြီး လူမှုရေးရာဝန်ကြီး ဦး‌ဌေးအောင်နှင့် ရန်ကုန်တိုင်းဒေသကြီးအား ကစားနှင့်လူငယ်ရေးရာ အထောက်အကူပြုကော်မတီဝင်များက ထိုင်းဘတ်ငွေငါးသောင်းနှင့် USD $ 400၊ မြန်မာနိုင်ငံခြင်းလုံးနာယက ဦးစိုးတင့်က ထိုင်းဘတ်ငွေ သုံးသောင်း၊ မြန်မာနိုင်ငံခြင်းလုံး ဥက္ကဋ္ဌ ဦးရဲဝင်းထွဋ်တင်က USD $ 3000 နှင့် ဒုတိယဥက္ကဋ္ဌ ဦးအောင်မြင့်မြတ်က USD $ 1000 ၊ မြန်မာနိုင်ငံ အမျိုးသမီးအားကစားအဖွဲ့ချုပ်ဥက္ကဋ္ဌ ဒေါ်ခင်လေးမွန်နှင့် အဖွဲ့က USD $ 600 နှင့် ထိုင်းဘတ်ငွေ တစ်သောင်းပေးအပ်ချီးမြှင့်ကြသည်။

ဇော်ဇော်