နယ်စပ်ရေးရာဝန်ကြီးဌာန ၂၀၂၄ - ၂၀၂၅ ပညာသင်နှစ် တက္ကသိုလ်ဝင်စာမေးပွဲတွင် ထူးချွန်စွာအောင်မြင်ခဲ့သော ဝန်ထမ်းသားသမီးများ၊ အောင်ချက်အကောင်းဆုံး သင်တန်းကျောင်းများ၊ လူရည်ချွန်ဆုရရှိသော ကျောင်းသား ကျောင်းသူများအား ဆုချီးမြှင့်

နယ်စပ်ရေးရာဝန်ကြီးဌာန ၂၀၂၄ - ၂၀၂၅ ပညာသင်နှစ် တက္ကသိုလ်ဝင်စာမေးပွဲတွင် ထူးချွန်စွာအောင်မြင်ခဲ့သော ဝန်ထမ်းသားသမီးများ၊ အောင်ချက်အကောင်းဆုံး သင်တန်းကျောင်းများ၊ လူရည်ချွန်ဆုရရှိသော ကျောင်းသား ကျောင်းသူများအား ဆုချီးမြှင့်

နေပြည်တော် ဩဂုတ် ၂၈

နယ်စပ်ရေးရာဝန်ကြီးဌာန ၂၀၂၄-၂၀၂၅ ပညာသင်နှစ် တက္ကသိုလ်ဝင်စာမေးပွဲတွင် ထူးချွန်စွာ အောင်မြင်ခဲ့ကြသော ဝန်ထမ်းသား သမီးများ၊ အောင်ချက်အကောင်းဆုံးသင်တန်းကျောင်းများ၊ လူရည်ချွန်ဆုရရှိသော ကျောင်းသား ကျောင်းသူများအား ဂုဏ်ပြုဆုချီးမြှင့်ခြင်းအခမ်းအနားကို ယနေ့နံနက်ပိုင်းတွင် နယ်စပ်ရေးရာဝန်ကြီးဌာန ဧရာဝတီခန်းမ၌ ကျင်းပရာ နယ်စပ်ရေးရာဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ရာပြည့်နှင့် ဇနီး၊ ဒုတိယဝန်ကြီး ဗိုလ်ချုပ်ဖြိုးသန့်နှင့် ဇနီး၊ အမြဲတမ်းအတွင်းဝန်နှင့် ဇနီး၊ ညွှန်ကြားရေးမှူးချုပ်များနှင့် ဇနီးများ၊ ဝန်ကြီးရုံးနှင့် ဦးစီးဌာနများမှ အရာထမ်း၊ အမှုထမ်းများ၊ ဆုရကျောင်းသား ကျောင်းသူများနှင့် ၎င်းတို့၏ မိသားစုဝင်များ တက်ရောက်ကြသည်။

ဦးစွာ ပြည်ထောင်စုဝန်ကြီး ဒုတိယဗိုလ်ချုပ်ကြီး ရာပြည့်က အမျိုးသားကာကွယ်ရေးနှင့် လုံခြုံရေးကောင်စီ၏ ဦးတည်ချက် ၄ ရပ် တွင် တတိယအချက်အနေဖြင့် “နိုင်ငံတော်စဉ်ဆက်မပြတ် ဖွံ့ဖြိုးတိုးတက်ခိုင်မာစေရေးအတွက် အမျိုးသားပညာရေးကဏ္ဍ၊ ကျန်းမာရေးကဏ္ဍတို့ကို အလေးထားမြှင့်တင်ရေး” ဆိုကာ ဦးတည်ချက်ချမှတ်အကောင်အထည်ဖော် ဆောင်ရွက်ပေးလျက်ရှိကြောင်း၊ ပညာရေးသည် နိုင်ငံတော်တည်ဆောက်ရေး၏ အခြေခံအုတ်မြစ်ဖြစ်သည့်အတွက် ကျောင်းသား ကျောင်းသူများအား အရည်အချင်းပြည့်ဝသော ပညာတတ်များ ပေါ်ထွန်းလာစေရန်လိုအပ်သော ကူညီထောက်ပံ့မှုများ နှစ်စဉ်အလေးထားဆောင်ရွက်ပေးလျက်ရှိပါကြောင်း၊ ကျောင်းသား ကျောင်းသူများအနေဖြင့် ဗလငါးတန်နှင့် ပြည့်စုံသည့် နိုင်ငံ့သားကောင်းရတနာ၊ သမီးကောင်းရတနာများ ဖြစ်လာစေရေး ကြိုးစားအားထုတ်သွားကြရန်နှင့် မိဘများအနေဖြင့်လည်း သားသမီးများ၏ ပညာရည်မြင့်မားရေးကို အလေးထား ပြုစု ပျိုးထောင်ပေးသွားကြရန် တိုက်တွန်းမှာကြားသည်။

ထို့နောက် ပြည်ထောင်စုဝန်ကြီးက ၂၀၂၄-၂၀၂၅ ပညာသင်နှစ် တက္ကသိုလ်ဝင်စာမေးပွဲတွင် ထူးချွန်စွာအောင်မြင်ခဲ့သည့် ၆ ဘာသာဂုဏ်ထူးရှင် တစ်ဦးနှင့် အောင်ချက်အကောင်းဆုံး ပထမ၊ ဒုတိယ၊ တတိယဆုရရှိသည့် လူငယ်ဖွံ့ဖြိုးရေးသင်တန်းကျောင်း သုံးကျောင်းတို့ကိုလည်းကောင်း၊ ပြည်ထောင်စုဝန်ကြီး၏ ဇနီးက ၄ ဘာသာ ဂုဏ်ထူးရှင်တစ်ဦး၊ ၃ ဘာသာ ဂုဏ်ထူးရှင်တစ်ဦးနှင့် လူရည်ချွန်ဆုရရှိသော ကျောင်းသား ကျောင်းသူနှစ်ဦးတို့ကိုလည်းကောင်း၊ ဒုတိယဝန်ကြီးက ၃ ဘာသာဂုဏ်ထူးရှင်နှစ်ဦးနှင့် လူရည်ချွန်ဆုရရှိသော ကျောင်းသား ကျောင်းသူနှစ်ဦးတို့ကိုလည်းကောင်း၊ ဒုတိယဝန်ကြီး၏ ဇနီးက ၃ ဘာသာ ဂုဏ်ထူးရှင်နှစ်ဦးနှင့် လူရည်ချွန်ဆုရရှိသူတစ်ဦးတို့ကိုလည်းကောင်း၊ အမြဲတမ်းအတွင်းဝန်က ၃ ဘာသာဂုဏ်ထူးရှင် တစ်ဦးနှင့် ၂ ဘာသာ ဂုဏ်ထူးရှင်နှစ်ဦးတို့ကိုလည်းကောင်း၊ အမြဲတမ်းအတွင်းဝန်၏ ဇနီးက ၂ ဘာသာဂုဏ်ထူးရှင်တစ်ဦးနှင့် ၁ ဘာသာဂုဏ်ထူးရှင်နှစ်ဦးတို့ကိုလည်းကောင်း၊ ညွှန်ကြားရေးမှူးချုပ်များနှင့် ဇနီးများက ၁ ဘာသာဂုဏ်ထူးရှင် ၁၂ ဦးတို့ကိုလည်းကောင်း ဂုဏ်ပြုဆုများပေးအပ်ပြီး ထူးချွန်ဆုရ ကျောင်းသား ကျောင်းသူများ ကိုယ်စား ၆ ဘာသာဂုဏ်ထူးရှင် မအင်ကြင်းခိုင်က ကျေးဇူးတင်စကားပြောကြားသည်။

နယ်စပ်ရေးရာဝန်ကြီးဌာနမှ ၂၀၂၄-၂၀၂၅ ပညာသင်နှစ်တွင် ထူးချွန်စွာအောင်မြင်ခဲ့ကြသည့် ၆ ဘာသာဂုဏ်ထူးရှင် တစ်ဦး၊ ၄ ဘာသာဂုဏ်ထူးရှင် တစ်ဦး၊ ၃ ဘာသာဂုဏ်ထူးရှင် ခြောက်ဦး၊ ၂ ဘာသာဂုဏ်ထူးရှင် ရှစ်ဦး၊ ၁ ဘာသာဂုဏ်ထူးရှင် ၃၂ ဦး စုစုပေါင်း ဂုဏ်ထူးရှင် ၄၈ ဦးတို့ကိုလည်းကောင်း၊ လူရည်ချွန်ဆုရရှိသူ ခုနစ်ဦးနှင့် တက္ကသိုလ်ဝင်စာမေးပွဲတွင် အောင်ချက် ၉၅ ရာခိုင်နှုန်းဖြင့် ပထမဆုရ ကလေးလူငယ်ဖွံ့ဖြိုးရေးသင်တန်းကျောင်း၊ အောင်ချက် ၇၉ ရာခိုင်နှုန်းဖြင့် ဒုတိယဆုရ ပင်လောင်းလူငယ်ဖွံ့ဖြိုးရေးသင်တန်းကျောင်း၊ အောင်ချက် ၆၅ ရာခိုင်နှုန်းဖြင့် တတိယဆုရ ပခုက္ကူလူငယ်ဖွံ့ဖြိုးရေးသင်တန်းကျောင်းတို့ကိုလည်းကောင်း ဂုဏ်ပြုဆုများ ပေးအပ်ခဲ့ခြင်းဖြစ်ကြောင်း သိရသည်။

သတင်းစဉ်