ကမ္ဘာ့ကာကွယ်ဆေးထိုးနှံတိုက်ကျွေးရေးရက်သတ္တပတ်အခမ်းအနားကျင်းပ၊ အပန်းဖြေစခန်းများမှ ပြည်လည်ရောက်ရှိလာသော လူရည်ချွန် မောင်မယ်များ အတွေ့အကြုံရှင်းလင်း

ကမ္ဘာ့ကာကွယ်ဆေးထိုးနှံတိုက်ကျွေးရေးရက်သတ္တပတ်အခမ်းအနားကျင်းပ၊ အပန်းဖြေစခန်းများမှ ပြည်လည်ရောက်ရှိလာသော လူရည်ချွန် မောင်မယ်များ အတွေ့အကြုံရှင်းလင်း

ဘားအံ - မေ (၆)

ကလေးများအနာဂတ်လှပဖို့ လူတိုင်းပါဝင်ဆောင်ရွက်လို့ ကာကွယ်ဆေးဖြင့် အသက်ကယ်စို့ ဆောင်ပုဒ်ဖြင့် ၂၀၂၄ ခုနှစ် ပြည်နယ်အဆင့်ကမ္ဘာ့ကာကွယ်ဆေးထိုးနှံတိုက်ကျွေးရေးရက်သတ္တပတ် အထိမ်းအမှတ်အခမ်းအနားကို မေလ ၆ ရက်နေ့ နံနက် ၈ နာရီက ဘားအံပြည်သူ့ဆေးရုံကြီး၊ တိုးချဲ့(၃)ထပ်ဆောင်၊ အစည်းအဝေးခန်းမ၌ ကျင်းပသည်။

ဦးစွာ ကရင်ပြည်နယ်အစိုးရအဖွဲ့ ပြည်နယ်ဝန်ကြီးချုပ်ဦးစောမြင့်ဦးက ပြည်သူတစ်ရပ်လုံးအား လိုအပ်သော ကာကွယ်ဆေးများကို သတ်မှတ်ချက်အတိုင်းအသက်အရွယ်အလိုက်အကြိမ်ပြည့်ထိုးနှံတိုက်ကျွေးထားခြင်းအားဖြင့် ကာကွယ်ဆေးဖြင့်ကာကွယ်၍ရသောရောဂါများကို ကာကွယ်နိုင်ကြောင်း၊ ကလေးများ၏အနာဂတ်လှပစေရေး အတွက် အသက်အရွယ်အလိုက်ထိုးနှံတိုက်ကျွေးရမည့် ကာကွယ်ဆေးများ တစ်ယောက်မကျန်ထိုးနှံတိုက်ကျွေးရေး အတွက် ကာကွယ်ဆေးထိုးလုပ်ငန်းတွင် အားလုံးဆက်လက်ပူးပေါင်းဆောင်ရွက်ပေးကြရန် တိုက်တွန်းပြောကြား သည်။

ထို့နောက် ၂၀၂၄ ခုနှစ်၊ ကမ္ဘာ့ကာကွယ်ဆေးထိုးနှံတိုက်ကျွေးရေးရက်သတ္တပတ်အထိမ်းအမှတ် Video Clip ကို အတူတကွကြည့်ရှုခဲ့ကြပြီး စုပေါင်းမှတ်တမ်းဓာတ်ပုံများရိုက်ကူးကာ ပြည်နယ်ဝန်ကြီးချုပ်၊ ပြည်နယ်တရား လွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝင်များ၊ မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့နာယက နှင့်အဖွဲ့ဝင်များက ကလေးငယ်များအား ကာကွယ်ဆေးတိုက်ကျွေးခဲ့ကြပြီး အာဟာရဖြည့်စွက်အစားအစာများနှင့် အမှတ်တရလက်ဆောင်များ ပေးအပ်ခဲ့ကြသည်။

ဆက်လက်၍ ၂၀၂၃-၂၀၂၄ ပညာသင်နှစ် ပုဂံ၊ တောင်ကြီး၊ ငွေဆောင်၊ ချောင်းသာ အပန်းဖြေစခန်းများမှ ပြန်လည်ရောက်ရှိ လာသော လူရည်ချွန်မောင်/မယ်များ၏ အတွေ့အကြုံရှင်းလင်းပွဲ အခမ်းအနားကို မေလ ၆ ရက်နေ့ နံနက် ၁၀ နာရီက ဘားအံမြို့ ဇွဲကပင်ခန်းမ၌ ကျင်းပသည်။

ဦးစွာ လူရည်ချွန်မောင်/မယ်များက လူရည်ချွန် သီချင်းဖြင့် ဖျော်ဖြေတင်ဆက်ပြီး ပြည်နယ်ဝန်ကြီးချုပ် ဦးစောမြင့်ဦးက ရွေးချယ်ခံရထားပြီးဖြစ်သော လူရည်ချွန်မောင်မယ်များအနေဖြင့်လည်း တိုင်းပြည်၏ရတနာ၊ ပြည်နယ်၏သားကောင်းသမီးမွန်များအဖြစ် ဆက်လက်ကြိုးစားပြီး စံပြလူငယ်လေးများအောင် နေထိုင်ကြိုးစားကြဖို့ လိုကြောင်း ပြောကြားသည်။

ထို့နောက် ပုဂံ၊ တောင်ကြီး၊ ငွေဆောင်၊ ချောင်းသာ လူရည်ချွန်စခန်းများမှ ပြန်လည်ရောက်ရှိလာသော လူရည်ချွန်မောင်/မယ်များက ခရီးစဉ်အတွေ့အကြုံများကို ရှင်းလင်းပြောကြားပြီး အခြေခံပညာကျောင်းများမှ ကျောင်းသား၊ကျောင်းသူများက ရိုးရာယဉ်ကျေးမှုအကအလှများဖြင့် သီဆိုကပြဖျော်ဖြေကြရာ ပြည်နယ်ဝန်ကြီးချုပ် နှင့်တာဝန်ရှိသူများက ဂုဏ်ပြုဆုငွေများအသီးသီးပေးအပ်ချီးမြှင့်ခဲ့ကြသည်။

ယင်းနောက် ပြည်နယ်မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့နှင့်ပြည်နယ်အမျိုးသမီးရေးရာအဖွဲ့ နာယကနှင့်အဖွဲ့ဝင်များက လူရည်ချွန်မောင်/မယ်များအား ဂုဏ်ပြုဆုငွေများပေးအပ်ချီးမြှင့်ပြီး ပြည်နယ်ဝန်ကြီးချုပ် က လူရည်ချွန်မောင်မယ်များအား အမှတ်တရလက်ဆောင်ပစ္စည်းများပေးအပ်ရာ ကြီးကြပ်ဆရာ၊ဆရာမများက ပြည်နယ်ဝန်ကြီးချုပ်အား အမှတ်တရလက်ဆောင်များ ပြန်လည်ပေးအပ်သည်။

ထို့နောက် ပြည်နယ်ဝန်ကြီးချုပ်၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝင်များ နှင့်တာဝန်ရှိသူများ လူရည်ချွန်မောင်မယ်များနှင့်အမှတ်တရစုပေါင်းမှတ်တမ်းဓာတ်ပုံများရိုက်ကူးခဲ့ကြပြီး ပြည်နယ်ဝန်ကြီးချုပ်နှင့်အဖွဲ့သည် အခမ်းအနားသို့ တက်ရောက်လာသူများအား ရင်းရင်းနှီးနှီးတွေ့ဆုံအားပေးစကား ပြောကြားကာ လူရည်ချွန်မောင်/မယ်များအား နေ့လည်စာဖြင့် ဂုဏ်ပြုတည်ခင်းဧည့်ခံခဲ့ကြပါသည်။