ပွင့်လင်းရာသီတွင် ကရင်ပြည်နယ်အတွင်း ပြည်တွင်း/ပြည်ပခရီးသွားဧည့်သည်ဝင်ရောက်မှုပိုမိုများပြား

ပွင့်လင်းရာသီတွင် ကရင်ပြည်နယ်အတွင်း ပြည်တွင်း/ပြည်ပခရီးသွားဧည့်သည်ဝင်ရောက်မှုပိုမိုများပြား

ဘားအံ - နိုဝင်ဘာ (၂၁)

ပွင့်လင်းရာသီတွင် ကရင်ပြည်နယ်အတွင်း ပြည်တွင်း/ပြည်ပခရီးသွားဧည့်သည်ဝင်ရောက်မှုပိုမိုများပြားသည့် အတွက် ခရီးစဉ်ဒေသများနှင့်တည်းခိုနေထိုင်ရန်နေရာများ အစဉ်သန့်ရှင်းသပ်ရပ်မှုရှိစေရေး စီစဉ်ဖန်တီးပေးကြရန် ပြည်နယ်ဒေသဆိုင်ရာခရီးသွားလုပ်ငန်းကော်မတီဥက္ကဋ္ဌ ပြည်နယ်ဝန်ကြီးချုပ်ဦးစောမြင့်ဦးက နိုဝင်ဘာလ ၂၁ ရက်နေ့ မွန်းလွဲ ၁ နာရီက ပြည်နယ်အစိုးရအဖွဲ့ရုံး အစည်းအဝေးခန်းမ(၃)တွင်ကျင်းပသည့် (၉/၂၀၂၄) ကြိမ်မြောက် ပြည်နယ်ဒေသဆိုင်ရာခရီးသွားလုပ်ငန်းကော်မတီအစည်းအဝေးတွင် ပြောကြားသည်။

ရိုးရာအစားအစာနှင့် ဒေသထွက်ထူးခြားဆန်းသစ်သောအစားအစာများကို ရောင်းချပေးနိုင်ရေးနှင့် မိမိဒေသ သို့ လာရောက်လည်ပတ်သည့်ခရီးသွားဧည့်သည်များ စိတ်ချမ်းမြေ့မှုရှိစေရေး ခရီးစဉ်ဒေသစီမံခန့်ခွဲရေးအဖွဲ့များမှ ကြိုးပမ်းဆောင်ရွက်ပေးကြရန် ပြည်နယ်ဝန်ကြီးချုပ်က ဆက်လက်တိုက်တွန်းပြောကြားသည်။

ထို့နောက် ပြည်နယ်ဒေသဆိုင်ရာခရီးသွားလုပ်ငန်းကော်မတီဒုတိယဥက္ကဋ္ဌ ပြည်နယ်စီးပွားရေးရာဝန်ကြီး ဦးစောခင်မောင်မြင့်က ဒေသဆိုင်ရာခရီးသွားလုပ်ငန်းဖွံ့ဖြိုးတိုးတက်ရေး တက်ရောက်လာသူများမှ လိုအပ်သည့်အကြံ ဉာဏ်များကို ဝိုင်းဝန်းဆွေးနွေးတင်ပြပေးကြရန် ပြောကြားပြီး ပြည်နယ်ဒေသဆိုင်ရာခရီးသွားလုပ်ငန်းကော်မတီ အတွင်းရေးမှူး ဟိုတယ်နှင့်ခရီးသွားညွှန်ကြားမှုဦးစီးဌာနညွှန်ကြားရေးမှူးဦးသက်လင်းက ယခင်အပတ်အစည်းအဝေး ဆုံးဖြတ်ချက်များအပေါ် လိုက်နာဆောင်ရွက်ပြီးစီးမှု၊ ကော်မတီမှလုပ်ကိုင်ဆောင်ရွက်နေမှုများနှင့် ဆုံးဖြတ်အတည်ပြု ရမည့်ကိစ္စရပ်များကို ရှင်းလင်းတင်ပြသည်။

ယင်းနောက် အစည်းအဝေးသို့တက်ရောက်လာသော ဟိုတယ်လုပ်ငန်းရှင်များ၊ ကော်မတီဝင်များနှင့် ဌာနဆိုင် ရာတာဝန်ရှိသူများက ဒေသတွင်းခရီးသွားလုပ်ငန်းပိုမိုဖွံ့ဖြိုးတိုးတက်ရေးဆိုင်ရာကိစ္စရပ်များကို ဆွေးနွေးတင်ပြကြပြီး ဘားအံခရိုင်ခရီးစဉ်ဒေသစီမံခန့်ခွဲမှုကော်မတီဥက္ကဋ္ဌ ဘားအံခရိုင်အုပ်ချုပ်ရေးမှူးဦးအောင်လွင်က ဒေသတွင်းခရီးစဉ် ဒေသများသန့်ရှင်းသပ်ရပ်မှုရှိစေရေးလုပ်ငန်းဆောင်ရွက်မှုနှင့် လိုအပ်ချက်များကိုဆွေးနွေးတင်ပြကာ ဆဒ္ဒန်ဂူ၊ ကော့ဂွန်းဂူ၊ ရသေ့ပျံဂူ၊ ကော့ကသောင်ဂူ၊ လွန်းညရေပြာအိုင်ဂူ၊ ပဒုမ္မာဂူ၊ ဘုရင့်ညီနောင်ဂူ၊ လင်းနို့ဂူ၊ ကျောက်ကလပ်၊ တောင်ဝိုင်း၊ ကျုံထော်ရေတံခွန်၊ ဖောင်တော်ဦး၊ ဇွဲကပင်တောင် ခရီးစဉ်ဒေသစီမံခန့်ခွဲရေးအဖွဲ့များမှ သက်ဆိုင်ရာ ဒေသများအလိုက် လုပ်ငန်းဆောင်ရွက်မှုနှင့်လိုအပ်ချက်များကို ဆွေးနွေးတင်ပြကြသည်။

ထိုသို့ဆွေးနွေးတင်ပြမှုများအပေါ် ပြည်နယ်ဒေသဆိုင်ရာခရီးသွားလုပ်ငန်းကော်မတီဥက္ကဋ္ဌ ပြည်နယ်ဝန်ကြီး ချုပ်က သက်ဆိုင်ရာဌာနဆိုင်ရာတာဝန်ရှိသူများနှင့် ပေါင်းစပ်ညှိနှိုင်းဖြည့်ဆည်းဆောင်ရွက်ပေးခဲ့ပြီး နိဂုံးချုပ်အမှာ စကားပြောကြားခဲ့ပါသည်။