မန္တလေးတိုင်းဒေသကြီး၊ မိတ္ထီလာမြို့နယ်၊ စက်မှုဇုန်(၂)လမ်း၌ ဆီကြိတ်စက်ရုံ မီးလောင်မှု

မန္တလေးတိုင်းဒေသကြီး၊ မိတ္ထီလာမြို့နယ်၊ စက်မှုဇုန်(၂)လမ်း၌ ဆီကြိတ်စက်ရုံ မီးလောင်မှု

    ၂၀၂၆ ခုနှစ်၊ မတ် ၂၆ ရက် နံနက် ၄ နာရီ ၅၅ မိနစ်ခန့်က မန္တလေးတိုင်းဒေသကြီး၊ မိတ္ထီလာမြို့နယ်၊ စက်မှုဇုန်(၂)လမ်းရှိ ပိုင်ရှင် ဦးတိုးတိုး(၅၉)နှစ်၏ “အောင်ဇဗ္ဗူဟိန်း” ဆီကြိတ်စက်ရုံအား ငှားရမ်းလုပ်ကိုင်သူ ဒေါ်ချိုဇင်ဝင်း၏ ၅၀ x ၃၀ ပေ၊ သွပ်မိုး၊ နံကပ်၊ ကွန်ကရစ်ခင်း တစ်ထပ် အဆောက်အအုံအတွင်း နှမ်းဖတ်မှော်များစုထားရာမှ အောင်းပူဖြစ်၍ အပူလွန်ကဲပြီး အနီးရှိ နှမ်းချ ဇကာခုံသို့ မီးကူးစက်လောင်ကျွမ်းမှုဖြစ်ပွားကြောင်း သတင်းရရှိသဖြင့် မိတ္ထီလာခရိုင်၊ မြို့နယ်မီးသတ်စခန်းတို့မှ မီးသတ်တပ်ဖွဲ့ဝင်များသည် မီးသတ်ယာဉ် ၁၀ စီးဖြင့် မီးငြှိမ်းသတ်ခဲ့ရာ နံနက် ၅ နာရီ ၃၁ မိနစ်တွင် မီးငြိမ်းခဲ့ပါသည်။
    အဆိုပါ မီးလောင်မှုကြောင့် ၅၀ x ၃၀ ပေ၊ သွပ်မိုး၊ နံကပ်၊ ကွန်ကရစ်ခင်း တစ်ထပ် အဆောက်အအုံ တစ်လုံး၊ နှမ်းဆီ သုံးပိဿာ၊ တရုတ်နိုင်ငံထုတ် ဆီကြိတ်စက်အဟောင်း နှစ်လုံး၊ နှမ်းချဇကာခုံ တစ်လုံး မီးလောင်ဆုံးရှုံးခဲ့ကြောင်းနှင့် စက်ရုံငှားရမ်းလုပ်ကိုင်သူ ချိုဇင်ဝင်း အား မိတ္ထီလာမြို့နယ်၊ အမှတ်(၃)နယ်မြေရဲစခန်းမှ အမှုဖွင့်အရေးယူထားကြောင်း သတင်းရရှိပါသည်။