မြန်မာနိုင်ငံနှင့် အီဂျစ်နိုင်ငံတို့အကြား လယ်ယာကဏ္ဍပူးပေါင်းဆောင်ရွက်ရေးနားလည်မှုစာချွန်လွှာ လက်မှတ်ရေးထိုး

မြန်မာနိုင်ငံနှင့် အီဂျစ်နိုင်ငံတို့အကြား လယ်ယာကဏ္ဍပူးပေါင်းဆောင်ရွက်ရေးနားလည်မှုစာချွန်လွှာ လက်မှတ်ရေးထိုး

နေပြည်တော် နိုဝင်ဘာ ၃

မြန်မာနိုင်ငံနှင့် အီဂျစ်နိုင်ငံတို့အကြား လယ်ယာကဏ္ဍပူးပေါင်းဆောင်ရွက်ရေးနားလည်မှုစာချွန်လွှာကို အီဂျစ်နိုင်ငံကိုင်ရိုမြို့ရှိ လယ်ယာစိုက်ပျိုးရေးနှင့်မြေယာပြုပြင်ပြောင်းလဲရေးဝန်ကြီးဌာန၌ အောက်တိုဘာ ၂၈ ရက်က လက်မှတ်ရေးထိုးခဲ့သည်။

အဆိုပါနားလည်မှုစာချွန်လွှာကို အီဂျစ်လယ်ယာစိုက်ပျိုးရေးနှင့် မြေယာပြုပြင်ပြောင်းလဲရေးဝန်ကြီးဌာန ဒုတိယဝန်ကြီး မစ္စတာ မိုစတာဖာအယ်လ်ဆာယက်နှင့် စိုက်ပျိုးရေးဦးစီးဌာန ညွှန်ကြားရေးမှူးချုပ် ဒေါက်တာရဲတင့်ထွန်းတို့က အီဂျစ်စိုက်ပျိုးရေးနှင့် မြေယာပြုပြင်ပြောင်းလဲရေးဝန်ကြီး မစ္စတာအလာဖာရော့နှင့် အီဂျစ်နိုင်ငံဆိုင်ရာ မြန်မာသံအမတ်ကြီး ဦးကျော်တင်ရှိန်တို့ရှေ့မှောက်၌ လက်မှတ်ရေးထိုးခဲ့ခြင်းဖြစ်သည်။

နားလည်မှုစာချွန်လွှာ လက်မှတ်ရေးထိုးခြင်းသည် မြန်မာ-အီဂျစ်ဆက်ဆံရေးအတွက်အရေးကြီးသော သမိုင်းမှတ်တိုင်တစ်ခုဖြစ်ပြီး ၁၉၉၄ ခုနှစ်တွင် မြန်မာနှင့်အီဂျစ်တို့ ပထမဆုံးလက်မှတ်ရေးထိုးခဲ့သောစိုက်ပျိုးရေးပူးပေါင်းဆောင်ရွက်မှုနားလည်မှု စာချွန်လွှာ(MoU)၏ ဒုတိယမြောက်လက်မှတ် ရေးထိုးမှုဖြစ်သည်။

နားလည်မှုစာချွန်လွှာတွင် စိုက်ပျိုးရေးနည်းပညာဖလှယ်ရေး၊ စွမ်းရည်မြှင့်တင်ရေး၊ သုတေသနပူးပေါင်းဆောင်ရွက်မှုနှင့် ရေရှည်တည်တံ့သောစိုက်ပျိုးရေးဆိုင်ရာ အလေ့အကျင့်ကဲ့သို့ နယ်ပယ်များ၌နှစ်နိုင်ငံ ပူးပေါင်းဆောင်ရွက်မှုတိုးမြှင့်ရေး၊ လယ်ယာထွက်ကုန်များ ကုန်သွယ်မှုမြှင့်တင်ကာ နှစ်နိုင်ငံအကြားရေရှည်လက်တွဲဆောင်ရွက်ရေးကို အထောက်အကူပြုစေမည်ဖြစ်ကြောင်းသိရသည်။

ထို့ပြင် အီဂျစ်နိုင်ငံမှ မြန်မာနိုင်ငံသို့ဓာတ်မြေသြဇာ၊ ပိုးသတ်ဆေးစသည့် စိုက်ပျိုးရေးသွင်းအားစုများတင်ပို့ရန်နှင့် မြန်မာနိုင်ငံမှ အီဂျစ်သို့ပဲမျိုးစုံ၊ ဆန်နှင့်ပင်လယ်စာအပါအဝင် အခြားထုတ်ကုန်များတင်ပို့ရန် ဆွေးနွေးမှုများလည်း ဆောင်ရွက်ခဲ့ပြီးမြန်မာနိုင်ငံ စိုက်ပျိုးရေးဦးစီးဌာနနှင့် အီဂျစ်နိုင်ငံစိုက်ပျိုးရေးဗဟိုသုတေသနဌာနတို့ ပူးပေါင်း၍ ချည်မျှင်အလွန်ရှည်ဝါ၊ အာလူးအပါအဝင် အရည်အသွေးကောင်းသီးနှံများ စိုက်ပျိုးထုတ်လုပ်ရန် သင်တန်းသားများစေလွှတ်ရေး၊ စိုက်ပျိုးရေးပညာရှင်များ အပြန်အလှန်စေလွှတ်ရေးနှင့် EICA သင်တန်းများ တက်ရောက်နိုင်ရေးတို့ကို ဆောင်ရွက်သွားမည်ဖြစ်သည်။        

သတင်းစဉ်