မွန်ပြည်နယ်၊ ကျိုက်ထိုမြို့နယ်၌ PDF အမည်ခံ အကြမ်းဖက်သမားများက ကျောင်းဆရာမ ကိုးဦးနှင့် အမျိုးသား တစ်ဦးတို့အား မော်တော်ယာဉ် တစ်စီးနှင့်အတူ ဖမ်းဆီးခေါ်ဆောင်၍ အကြမ်းဖက် ခြိမ်းခြောက်ကာ ပြန်လည်စေလွှတ်

မွန်ပြည်နယ်၊ ကျိုက်ထိုမြို့နယ်၌ PDF အမည်ခံ အကြမ်းဖက်သမားများက ကျောင်းဆရာမ ကိုးဦးနှင့် အမျိုးသား တစ်ဦးတို့အား မော်တော်ယာဉ် တစ်စီးနှင့်အတူ ဖမ်းဆီးခေါ်ဆောင်၍ အကြမ်းဖက် ခြိမ်းခြောက်ကာ ပြန်လည်စေလွှတ်

   လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲတိုက်ခိုက်ခြင်းများအား လုပ်ဆောင်လျက်ရှိသည့်အပြင် နိုင်ငံ့ဝန်ထမ်းများကို ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှု များအား ကျူးလွန်လုပ်ဆောင်လျက်ရှိသည်။

   ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ နိုဝင်ဘာ ၁၆ ရက် နံနက် ၈ နာရီ ၁၅ မိနစ်တွင် မွန်ပြည်နယ်၊ ကျိုက်ထိုမြို့နယ်၊ သိမ်ဇရပ်မြို့ အခြေခံပညာအထက်တန်းကျောင်းမှ အထက်တန်းပြကျောင်းဆရာမ ဒေါ်ရီရီဝင်း(၅၃)နှစ်ပါ သိမ်ဇရပ်မြို့ပေါ်ရှိ အခြေခံပညာစာသင်ကျောင်းများမှ ကျောင်းဆရာမ ကိုးဦးတို့သည် သိမ်ဇရပ်မြို့၊ အမှတ်(၂)ရပ်ကွက်နေ ဦးလင်းမင်းထွန်း(၃၅)နှစ် မောင်းနှင်သည့် မော်တော်ယာဉ် တစ်စီးဖြင့် ကျိုက်ထိုမြို့ အမှတ်(၁)အခြေခံပညာအထက်တန်းကျောင်း၌ ဖွင့်လှစ်မည့် ဘာသာရပ်ဆိုင်ရာမွမ်းမံသင်တန်းသို့ တက်ရောက်ရန် သိမ်ဇရပ်မြို့မှ ကျိုက်ထိုမြို့သို့ ထွက်ခွာလာစဉ် ကျိုက်ထိုမြို့နယ်၊ ကမ်းနီကျေးရွာအနီးအရောက်၌ PDF အမည်ခံ အကြမ်းဖက်သမား ၂၀ ဦးခန့်က မော်တော်ယာဉ်အား တားဆီးကာ ၎င်းတို့အား ဖမ်းဆီးခေါ်ဆောင်သွားခဲ့ပြီး “ရွေးကောက်ပွဲ မဲသင်တန်း တက်ရောက်ခြင်းမပြုရန်” ခြိမ်းခြောက်ပြောဆို၍ ပြန်လည်စေလွှတ်ပေးခဲ့ကြောင်း သိရသည်။

   အထက်ပါဖြစ်စဉ်မှ နိုင်ငံ့ဝန်ထမ်းများနှင့် အရပ်သားပြည်သူ တစ်ဦးအား ဖမ်းဆီး၍ ခြိမ်းခြောက် ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေးနှင့် ဖမ်းဆီးခံထားရသူများအား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။