ရုရှားဖက်ဒရေးရှင်းနိုင်ငံ နိုဗိုစီဗစ်ဒေသအုပ်ချုပ်ရေးမှူး ဦးဆောင်သောကိုယ်စားလှယ်အဖွဲ့ Naypyitaw State Academy သို့ သွားရောက်လေ့လာ ပြည်ထောင်စုဝန်ကြီး ဒေါက်တာ ချောချောစိန်နှင့် တွေ့ဆုံ၊ ပြည်ထောင်စုဝန်ကြီး ဦးတင်ဦးလွင်က ဂုဏ်ပြုညစာဖြင့် တည်ခင်းဧည့်ခံ

ရုရှားဖက်ဒရေးရှင်းနိုင်ငံ နိုဗိုစီဗစ်ဒေသအုပ်ချုပ်ရေးမှူး ဦးဆောင်သောကိုယ်စားလှယ်အဖွဲ့ Naypyitaw State Academy သို့ သွားရောက်လေ့လာ ပြည်ထောင်စုဝန်ကြီး ဒေါက်တာ ချောချောစိန်နှင့် တွေ့ဆုံ၊ ပြည်ထောင်စုဝန်ကြီး ဦးတင်ဦးလွင်က ဂုဏ်ပြုညစာဖြင့် တည်ခင်းဧည့်ခံ

နေပြည်တော် နိုဝင်ဘာ ၃

နေပြည်တော်၌ ရောက်ရှိနေကြသည့် ရုရှားဖက်ဒရေးရှင်းနိုင်ငံ နိုဗိုစီဗစ်ဒေသအုပ်ချုပ်ရေးမှူး H.E.Mr. Andrey Travnikov ဦးဆောင်သော ကိုယ်စားလှယ်အဖွဲ့သည် ယနေ့နံနက်ပိုင်းတွင် Naypyitaw State Academy သို့ သွားရောက်လေ့လာကြသည်၊၊

ရှင်းလင်းပြသ

ဦးစွာနိုဗိုစီဗစ်ဒေသအုပ်ချုပ်ရေးမှူးနှင့် ကိုယ်စားလှယ်အဖွဲ့သည် Naypyitaw State Academy သို့ ရောက်ရှိကြရာ Naypyitaw State Academy ပါမောက္ခချုပ် ဒေါက်တာနုနုလွင်နှင့် တာဝန်ရှိသူများကကြိုဆိုကြပြီး အစည်းအဝေးခန်းမ၌ Naypyitaw State Academy ဖွင့်လှစ်ရခြင်းရည်ရွယ်ချက်၊ နိုင်ငံတော်တည်ဆောက်ရေးလုပ်ငန်းများအတွက်လိုအပ်သည့် ပညာတတ်လူငယ်များ မွေးထုတ်ပေးနိုင်ရေးအတွက် သက်ဆိုင်ရာဘာသာရပ်များအလိုက် အရည်အသွေးမြင့်သည့် သင်ကြားသင်ယူမှုစနစ်များဖြင့် နိုင်ငံတကာအဆင့်မီ သင်ရိုးညွှန်းတမ်းများကို ထိရောက်စွာသင်ကြားနိုင်ရေး အထောက်အကူပြုပစ္စည်းများ၊ သုတေသနဓာတ်ခွဲခန်းများနှင့် ခေတ်မီလက်တွေ့ခန်းသုံး ပစ္စည်းများအသုံးပြု၍ ဆရာဆရာမများက ကျောင်းသား ကျောင်းသူများအား စာတွေ့လက်တွေ့သင်ကြားပို့ချနေမှု၊ အခမ်းအနားများနှင့်ဆွေးနွေးဟောပြောပွဲများ ကျင်းပဆောင်ရွက်ခဲ့မှုအခြေအနေများကို မှတ်တမ်းဗီဒီယိုဖြင့် ရှင်းလင်းပြသသည်၊၊

ထို့နောက် နိုဗိုစီဗစ်ဒေသအုပ်ချုပ်ရေးမှူးနှင့် နိုဗိုစီဗစ်ပညာရေးဝန်ကြီးတို့က နိုဗိုစီဗစ်မြို့သည် ရုရှားနိုင်ငံရှိသိပ္ပံပညာနှင့် ပညာရေးစင်တာအကြီးဆုံးမြို့များထဲမှ တစ်ခုအပါအဝင်ဖြစ်မှု၊ နိုဗို စီဗစ်ဒေသတွင် သိပ္ပံပညာနှင့်အသုံးချသိပ္ပံပညာရပ်များကို လေ့လာသင်ကြားနေသည့်တက္ကသိုလ်ပေါင်း ၅၀ ရှိမှု၊ နိုဗိုစီဗစ်ဒေသရှိ အကြီးဆုံးတက္ကသိုလ်တစ်ခုဖြစ်သည့် နိုဗိုစီဗစ်တက္ကသိုလ်တွင် နယ်ပယ်အသီးသီး၌ အလုပ်လုပ်ကိုင်နေသည့်ကျွမ်းကျင်သူများ၊ စီးပွားရေးဆိုင်ရာ နယ်ပယ်များတွင် ဦးစီးဦးဆောင် အလုပ်လုပ်ကိုင်နိုင်သည့် ပညာရပ်များကိုလည်း သင်ကြားပေးလျက်ရှိမှု၊ တေးဂီတအနုပညာဆိုင်ရာ ကျွမ်းကျင်သူများအား မွေးထုတ်ပေးသည့် နိုဗိုစီဗစ်အနုပညာတက္ကသိုလ်တစ်ခုတည်ရှိမှု၊ နိုင်ငံခြားသား ကျောင်းသားများအား ပညာသင်ကြားနေသည့် အတွေ့အကြုံများရှိရုံသာမက နိုင်ငံတကာနှင့်ပူးပေါင်း ဆောင်ရွက်မှုနယ်ပယ်များတွင်လည်း ပုံစံအမျိုးမျိုးနှင့် ပူးပေါင်းဆောင်ရွက်နိုင်သည့် အတွေ့အကြုံများစွာကိုလည်း သင်ကြားပေးလျက်ရှိမှုနှင့်စပ်လျဉ်း၍ ရှင်းလင်းပြောကြားကြသည်၊၊

ရှင်းလင်းဆွေးနွေးမှုများအပြီးတွင် သိလိုသည်များကို အပြန်အလှန်ဆွေးနွေးဖြေကြားကြပြီး Naypyitaw State Academy အတွင်းရှိ စာကြည့်တိုက်နှင့် ဓာတုဗေဒလက်တွေ့ခန်းတို့ကို ကြည့်ရှု လေ့လာကြသည်၊၊

ယင်းနောက် ဧည့်သည်တော်အဖွဲ့သည် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာချောချောစိန်နှင့် Naypyitaw State Academy ရှိ အစည်းအဝေးခန်းမ၌ တွေ့ဆုံသည်။

အမြင်ချင်းဖလှယ်ဆွေးနွေး

တွေ့ဆုံစဉ် မြန်မာတက္ကသိုလ်များနှင့် နိုဗိုစီဗစ်ဒေသရှိ တက္ကသိုလ်များ ပူးပေါင်းဆောင်ရွက်ရေး၊ ပူးပေါင်းဆောင်ရွက်မှုများ ဖြစ်နိုင်ခြေလေ့လာရေးအတွက် နိုဗိုစီဗစ်ဒေသရှိ တက္ကသိုလ်များမှ ပါမောက္ခချုပ်များနှင့် ပညာရေးဆိုင်ရာ တာဝန်ရှိသူများအား မြန်မာနိုင်ငံသို့စေလွှတ်ရေး၊ တွေ့ဆုံဆွေးနွေးမှုများမှ တစ်ဆင့်အေအိုင်နှင့် MSME ဆိုင်ရာ သုတေသနလုပ်ငန်းများပူးပေါင်းဆောင်ရွက်ရေး၊ မြန်မာ-ရုရှား ကျောင်းသား ကျောင်းသူများ အပြန်အလှန်လည်ပတ်ရေး၊ ပုဂ္ဂလိကကျောင်းများ ကြီးကြပ်ရေးအဖွဲ့ကို နိုဗိုစီဗစ်ဒေသသို့ လေ့လာရေးခရီးစေလွှတ်ရေး၊ ရန်ကုန်နိုင်ငံခြား ဘာသာတက္ကသိုလ်၊ မန္တလေးနိုင်ငံခြား ဘာသာတက္ကသိုလ် ကျောင်းသား ကျောင်းသူများနှင့် ပူးပေါင်းဆောင်ရွက်ရေး တို့အပြင် အနာဂတ်တွင် နှစ်နိုင်ငံပညာရေးကဏ္ဍ ပူးပေါင်းဆောင်ရွက်မှု မြှင့်တင်ရေးဆိုင်ရာကိစ္စရပ်များကို ရင်းနှီးပွင့်လင်းစွာ အမြင်ချင်းဖလှယ်ဆွေးနွေးကြပြီး အမှတ်တရလက်ဆောင် ပစ္စည်းများအပြန်အလှန်ပေးအပ်ကြသည်။

တွေ့ဆုံပွဲသို့ ဒုတိယဝန်ကြီး ဒေါက်တာဇော်မြင့်နှင့် ညွှန်ကြားရေးမှူးချုပ်များ တက်ရောက်ကြကြောင်း သိရသည်။

ဂုဏ်ပြုညစာဖြင့် တည်ခင်း

ညပိုင်းတွင် သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးတင်ဦးလွင်က ရုရှားဖက်ဒရေးရှင်းနိုင်ငံ နိုဗိုစီဗစ်ဒေသအုပ်ချုပ်ရေးမှူး ဦးဆောင်သောကိုယ်စားလှယ်အဖွဲ့အား Jasmine Naypyitaw Hotel ၌ ဂုဏ်ပြုညစာဖြင့် တည်ခင်းဧည့်ခံသည်။

ညစာစားပွဲသို့ ပို့ဆောင်ရေးနှင့်ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးမြထွန်းဦး၊ ဒုတိယဝန်ကြီးများ၊ တာဝန်ရှိသူများနှင့် ဖိတ်ကြားထားသူများ တက်ရောက်ကြသည်။

ဦးစွာ ပြည်ထောင်စုဝန်ကြီး ဦးတင်ဦးလွင်က ကြိုဆိုနှုတ်ခွန်းဆက်စကားပြောကြားပြီး နိုဗိုစီဗစ် ဒေသအုပ်ချုပ်ရေးမှူးက ကျေးဇူးတင်စကား ပြောကြားကာအခမ်းအနားသို့ တက်ရောက်လာကြသူများနှင့် အတူတကွ ညစာသုံးဆောင်ကြသည်။

ညစာသုံးဆောင်နေစဉ်အတွင်း သာသနာရေးနှင့်ယဉ်ကျေးမှုဝန်ကြီးဌာန အနုပညာဦးစီးဌာနမှအနုပညာရှင်များက တေးသံသာများဖြင့် သီဆို၊ ကပြ ဖျော်ဖြေတင်ဆက်ကြပြီး ပြည်ထောင်စုဝန်ကြီးနှင့် နိုဗိုစီဗစ်ဒေသအုပ်ချုပ်ရေးမှူးတို့က ဖျော်ဖြေတင်ဆက်ခဲ့ကြသည့် အနုပညာရှင်များအား ဂုဏ်ပြုပန်းခြင်းပေးအပ်ခဲ့ကြကြောင်း သိရသည်။

 သတင်းစဉ်