ရှမ်းပြည်နယ်၊ တောင်ကြီးမြို့နယ်၌ ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံး

ရှမ်းပြည်နယ်၊ တောင်ကြီးမြို့နယ်၌ ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံး

     ရှမ်းပြည်နယ်၊ တောင်ကြီးမြို့နယ်၌ ၂၀၂၅ ခုနှစ်၊ နိုဝင်ဘာ ၈ ရက်က ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံးခဲ့ကြောင်း သိရသည်။

     ဖြစ်စဉ်မှာ နိုဝင်ဘာ ၈ ရက် နံနက် ၅ နာရီတွင် တောင်ကြီးမြို့နယ်၊ ရွှေညောင်မြို့၊ ရွှေညောင်-တောင်ကြီးသွားကားလမ်း ပြည်ထောင်စုလမ်းမကြီးပေါ်ရှိ မိုင်တိုင်အမှတ် ၁၀၆ မိုင် ၄ ဖာလုံနှင့် ၅ ဖာလုံကြား၌ ယာဉ်တိုက်မှုဖြစ်ပွားကြောင်းသတင်းအရ အေးသာယာယာဉ်ထိန်းရဲတပ်ဖွဲ့စုမှ တပ်ဖွဲ့ဝင်များက သွားရောက်စစ်ဆေးခဲ့ရာ တောင်ကြီးမြို့မှ ရွှေညောင်မြို့သို့ ကလောမြို့နယ်၊ ရွာသစ်ကျေးရွာနေ အောင်ခိုင်(၃၀)နှစ် မောင်းနှင်ပြီး  ဆန်းထွေး(၂၈)နှစ် လိုက်ပါလာသည့် နံပါတ်မပါ Honda Wave ဆိုင်ကယ်သည် အခင်းဖြစ်နေရာသို့အရောက်၌ အရှိန်မထိန်းနိုင်ဘဲ တစ်ဖက်ယာဉ်ကြောသို့ ရောက်ရှိကာ မျက်နှာချင်းဆိုင်မှ သင်္ဃန်းကျွန်းမြို့နယ်၊ ပေါင်းကူးရပ်ကွက်နေ ဝင်းဇော်နိုင်(၃၃)နှစ် မောင်းနှင်လာသည့် YGN-3 4Q/XXXX SCANIA ခရီးသည်တင်မော်တော်ယာဉ်အား ဝင်ရောက်တိုက်မိ ခဲ့သဖြင့် အောင်ခိုင်နှင့် ဆန်းထွေး တို့တွင် ထိခိုက်ဒဏ်ရာများရရှိကာ သေဆုံးသွားခဲ့သောကြောင့် ၎င်းတို့ နှစ်ဦးအား ရွှေညောင်နယ်မြေရဲစခန်း ယာဉ်(ပ)၁၈/၂၀၂၅၊ ရာဇသတ်ကြီးပုဒ်မ ၃၀၄-က/၂၇၉ ဖြင့် အမှုဖွင့်အရေးယူထားကြောင်း သတင်းရရှိပါသည်။