သူနာပြုတက္ကသိုလ်ရန်ကုန်၏ အကြိမ် (၃၀) မြောက်နှင့် (၃၁)ကြိမ်မြောက် ဘွဲ့နှင်းသဘင်အခမ်းအနားများ ကျင်းပ

သူနာပြုတက္ကသိုလ်ရန်ကုန်၏ အကြိမ် (၃၀) မြောက်နှင့် (၃၁)ကြိမ်မြောက် ဘွဲ့နှင်းသဘင်အခမ်းအနားများ ကျင်းပ

ရန်ကုန် မတ် ၂၉

ကျန်းမာရေးဝန်ကြီးဌာန၊ ကျန်းမာ ရေးလူ့စွမ်းအားအရင်းအမြစ်ဦးစီးဌာန၊ သူနာပြုတက္ကသိုလ် ရန်ကုန်၏ အကြိမ်(၃၀)မြောက်နှင့် (၃၁) ကြိမ်မြောက် ဘွဲ့နှင်းသဘင်အခမ်းအနားများကို ယနေ့နံနက် ၈ နာရီခွဲတွင် ရန်ကုန်တက္ကသိုလ် ဘွဲ့နှင်းသဘင်ခန်းမ၌ ကျင်းပသည်။

စင်မြင့်ပေါ်တွင်နေရာယူ

ဦးစွာသူနာပြုတက္ကသိုလ် ရန်ကုန်ပါမောက္ခချုပ် ဒေါက်တာကျော်ရွှေနှင့် ပညာရေးအဖွဲ့ဝင်များ၊ စီမံခန့်ခွဲရေးအဖွဲ့ဝင်များက ဘွဲ့နှင်းသဘင် စင်မြင့်ပေါ်တွင် နေရာယူကြသည်။

ထို့နောက် ဘွဲ့ရကျောင်းသား ကျောင်းသူများက သူနာပြုသစ္စာ အဓိဋ္ဌာန်ကို ရွတ်ဆိုကြပြီး သူနာပြုပါရဂူဘွဲ့၊ သူနာပြုမဟာသိပ္ပံဘွဲ့၊ အထူးသူနာပြု ဒီပလိုမာဘွဲ့နှင့် သူနာပြုသိပ္ပံဘွဲ့များအတွက် ကောင်းစွာအောင်မြင် ပေါက်မြောက်ခဲ့ပြီဟု ပညာရေးအဖွဲ့က ကြေညာခြင်းခံကြရသူများအား သူနာပြုတက္ကသိုလ် ရန်ကုန်ပါမောက္ခချုပ်က ဘွဲ့များအပ်နှင်းကာအမှာ စကားပြောကြားသည်။

ယနေ့ကျင်းပသည့် သူနာပြုတက္ကသိုလ် ရန်ကုန်၏အကြိမ်(၃၀)ဘွဲ့နှင်းသဘင်၌ သူနာပြုပါရဂူ သင်တန်းအောင်မြင်သူတစ်ဦး၊ သူနာပြုမဟာသိပ္ပံသင်တန်း အောင်မြင်သူ ၂၀၊ သူနာပြု သိပ္ပံ(ပေါင်းကူး) (အဝေးသင်)သင်တန်းအောင်မြင်သူ ၇၆ ဦး၊ သူနာပြုသိပ္ပံ (ပေါင်းကူး) (On-Campus)သင်တန်းအောင်မြင်သူ ၁၅၂ ဦး၊ သူနာပြုသိပ္ပံ(ပုံမှန်) (၁/၂၀၂၅) သင်တန်းအောင်မြင်သူ ၈၄ ဦး၊ အထူးပြုသူနာပြုဒီပလိုမာ သင်တန်းအောင်မြင်သူ ၂၃ ဦးရှိပြီး (၃၁)ကြိမ်မြောက် ဘွဲ့နှင်းသဘင်၌ အရေးပေါ်သူနာပြုစုပညာ ဒီပလိုမာသင်တန်းအောင်မြင်သူ တစ်ဦး၊ သူနာပြုသိပ္ပံ(ပုံမှန်) (၅/၂၀၂၅) သင်တန်းအောင်မြင်သူ ၂၅၃ ဦး တို့အား ဘွဲ့များအပ်နှင်းသည်။

ယခုနှစ်ဘွဲ့နှင်းသဘင် အပါအဝင်သူနာပြုတက္ကသိုလ် ရန်ကုန်က မွေးထုတ်ပေးခဲ့သည့်သူနာပြုဘွဲ့ရဦးရေမှာ သူနာပြုပါရဂူဘွဲ့ လေးဦး၊ သူနာပြုမဟာသိပ္ပံဘွဲ့ ၂၇၉ ဦး၊ အထူးသူနာပြု ဒီပလိုမာ ဘွဲ့ရရှိသူ ၉၅၆ ဦး၊ သူနာပြုသိပ္ပံဘွဲ့ ၆၁၁၃ ဦးတို့ဖြစ်ပြီး အောင်မြင်စွာ လေ့ကျင့်ပျိုးထောင် ဘွဲ့အပ်နှင်းပေးနိုင်ခဲ့ကြောင်း သိရသည်။

သတင်းစဉ်