စစ်ကိုင်းတိုင်းဒေသကြီး၊ ကန့်ဘလူမြို့နယ်၌ PDF အမည်ခံ အကြမ်းဖက်သမားများ ထောင်ထားသည့် လက်လုပ်တိုက်မိုင်း တစ်လုံးအား တိုက်မိပေါက်ကွဲခဲ့မှုကြောင့် အမျိုးသမီး သုံးဦး ထိခိုက်ဒဏ်ရာရရှိ

စစ်ကိုင်းတိုင်းဒေသကြီး၊ ကန့်ဘလူမြို့နယ်၌ PDF အမည်ခံ အကြမ်းဖက်သမားများ ထောင်ထားသည့် လက်လုပ်တိုက်မိုင်း တစ်လုံးအား တိုက်မိပေါက်ကွဲခဲ့မှုကြောင့် အမျိုးသမီး သုံးဦး ထိခိုက်ဒဏ်ရာရရှိ

     အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိ သူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူ သွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။

     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ နိုဝင်ဘာ ၂၀ ရက် နံနက် ၈ နာရီ ၃၀ မိနစ်တွင် စစ်ကိုင်းတိုင်းဒေသကြီး၊ ကန့်ဘလူမြို့နယ်၊ အမှတ်(၄)ရပ်ကွက်နေ ဦးမြင့်လွင်(၆၂)နှစ် မောင်းနှင်သည့် AD VAN အမျိုးအစား အဖြူရောင်အငှားမော်တော်ယာဉ်ဖြင့် တစ်ရပ်ကွက်တည်းနေ ဒေါ်သူဇာဝင်း(၄၈)နှစ်၊ အမှတ်(၂)ရပ်ကွက်နေသူများဖြစ်ကြသည့် မခင်ငြိမ်းချမ်းအောင်(၂၀)နှစ်၊ မအိသန္တာထွန်း(၂၀)နှစ်နှင့် မောင်ဇေယျာမင်းသန့်(၂၁)နှစ်တို့သည် ကန့်ဘလူမြို့မှ မန္တလေးမြို့ဘက်သို့ ထွက်ခွာလာစဉ် ရေကြည်ဦးကျေးရွာတောင်ဘက် တစ်မိုင်ခန့်အကွာအရောက်၌ မော်တော်ယာဉ်အား ခေတ္တရပ်နားကာ ယာဉ်ပေါ်တွင် လိုက်ပါလာသူများအနက် ဒေါ်သူဇာဝင်း၊ မခင်ငြိမ်းချမ်းအောင်နှင့် မအိသန္တာထွန်းတို့မှ ကားလမ်းဘေး၌ အပေါ့ဆင်းသွားခဲ့ရာ PDF အမည်ခံ အကြမ်းဖက်သမား ထောင်ထားသည့် လက်လုပ်တိုက်မိုင်း တစ်လုံးအား ဒေါ်သူဇာဝင်းမှ တိုက်မိပေါက်ကွဲခဲ့သဖြင့် ဒေါ်သူဇာဝင်းပါ အမျိုးသမီး သုံးဦးတို့တွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့၍ ဒဏ်ရာရရှိ သူများအား မန္တလေးပြည်သူ့ဆေးရုံကြီးသို့ ပို့ဆောင်ဆေးကုသပေးလျက်ရှိကြောင်း သိရသည်။

     အထက်ပါဖြစ်စဉ်မှ အကြမ်းဖက်မှု ကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိသည်။