စေတနာမှန်သောကံတရား အားလုံးပါဝင်မျှဝေယူ

စေတနာမှန်သောကံတရား အားလုံးပါဝင်မျှဝေယူ

ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် ဘယ်လာရုစ်သမ္မတနိုင်ငံ သမ္မတ H.E Mr. Aleksandr Lukashenko တို့ မီဒီယာများအား နှစ်နိုင်ငံပူးတွဲကြေညာချက်ကို နိုဝင်ဘာ ၂၈ ရက်နေ့က ရှင်းလင်းပြောကြားခဲ့သည်။ အဆိုပါကြေညာချက်တွင် ဘယ်လာရုစ်သမ္မတနိုင်ငံ သမ္မတကြီးက မြန်မာနိုင်ငံနှင့် ပတ်သက်သည့် ဖြစ်ပေါ်တိုးတက်နေသော ပကတိအရှိတရားကို ပွင့်ပွင့်လင်းလင်းပြောကြားခဲ့သည်။

ဘယ်လာရုစ်သမ္မတနိုင်ငံ သမ္မတကြီးက “ကျွန်တော့်အနေနဲ့ ထပ်မံပြောကြားလိုတာကတော့ ကျွန်တော့်ရဲ့ နိုင်ငံရေးသက်တမ်းတစ်လျှောက်မှာ အဆွေတော်ဦးဆောင်တဲ့ အစိုးရအဖွဲ့လိုမျိုး မိမိနိုင်ငံနဲ့ မိမိပြည်သူပြည်သားတွေအတွက် နေ့စဉ်နေ့တိုင်း အားသွန်ခွန်စိုက်အလုပ်လုပ်တဲ့ အစိုးရနဲ့ နိုင်ငံခေါင်းဆောင်မျိုး မတွေ့ဖူးပါဘူး။ တော်တော်လေးကို ရှားရှားပါးပါးတွေ့ဖူးတာဖြစ်ပါတယ်။ ဒါကြောင့်မို့လို့ ကျွန်တော်တို့နိုင်ငံအနေနဲ့လည်း နှစ်နိုင်ငံပြည်သူ ပြည်သားအားလုံး အကျိုးအမြတ်ရစေဖို့။ နှစ်နိုင်ငံပြည်သူ ပြည်သားတွေအားလုံး စိတ်ချမ်းသာစေဖို့၊ ပူးပေါင်းဆောင်ရွက်ဖို့အတွက် ဘယ်လာရုစ်နိုင်ငံအနေနဲ့ အဆင်သင့်ရှိကြောင်း ပြောကြားလိုပါတယ်။ မြန်မာနိုင်ငံကနေပြီးတော့ Specialist တွေ ဘယ်လာရုစ်နိုင်ငံကိုလာခဲ့ပါ။ ဖိတ်ခေါ်ပါတယ်။ မြန်မာနိုင်ငံအတွက် ဘာတွေလိုအပ်နေတယ်ဆိုတာကိုလည်းဆွေးနွေးပါ။ ကျွန်တော်တို့ ဘယ်လာရုစ်နိုင်ငံအနေနဲ့ အမြဲတမ်းကူညီသွားဖို့ အဆင်သင့်ရှိပါတယ်”ဟု ပွင့်ပွင့်လင်းလင်း ပြောကြားခဲ့သည်။

နိုင်ငံတော်အကြီးအကဲ ဗိုလ်ချုပ်မှူးကြီးမင်းအောင်လှိုင် ခေါင်းဆောင်သည့် အစိုးရအဖွဲ့အနေဖြင့် နိုင်ငံတော်ကို တာဝန်ယူဆောင်ရွက်ခဲ့သည့် ငါးနှစ်တာကာလအတွင်း နိုင်ငံတော်တည်ငြိမ်အေးချမ်းရေး၊ တရားဥပဒေစိုးမိုးရေး၊ အေးချမ်းသာယာဝပြောရေး၊ ဖွံ့ဖြိုးတိုးတက်ရေးစသည့် ကဏ္ဍပေါင်းစုံအဘက်ဘက်တို့တွင် တိုးတက်ကောင်းမွန်လာစေရန် စွမ်းအားရှိသမျှ ကိုယ့်ခွန်ကိုယ့်အားဖြင့် ကြိုးပမ်းအားထုတ်ခဲ့ သည်ကို လက်တွေ့ မြင်တွေ့ရမည်ဖြစ်သည်။ နိုင်ငံတော်ကို ဒီမိုကရေစီလမ်းကြောင်းပေါ်၌ တည့်မတ်မှန်ကန်စွာ လျှောက်လှမ်းနိုင်ရေးအတွက် ပြုပြင်ပြောင်းလဲဆောင်ရွက်ခဲ့ရာတွင် တစ်ကမ္ဘာလုံးကြုံတွေ့ခဲ့ရသည့် ကိုဗစ်-၁၉ ကပ်ရောဂါဆိုးကြီးမှ ကျော်ဖြတ်နိုင်ရေး၊ အဖျက်အမှောင့်အတိုက်အခိုက်အမျိုးမျိုး ရင်ဆိုင်ကျော်လွှားနိုင် ရေးတို့ကို ဆောင်ရွက်ရင်း တစ်ဖက်တွင် နိုင်ငံတော်တည်ငြိမ်အေးချမ်းပြီး ဖွံ့ဖြိုးတိုးတက်လာအောင် ကြိုးပမ်းဆောင်ရွက်နိုင်သည့် စွမ်းပကားများကြောင့် နိုင်ငံတကာက အသိအမှတ်ပြုလာခြင်းပင်ဖြစ်သည်။

အထူးသဖြင့် ဒီမိုကရေစီနိုင်ငံတော်အတွက် အထူးအရေးကြီးသည့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးနှင့် ငြိမ်းချမ်းရေးရရှိရေးတို့ကို တည်ကြည်လေးနက် ဖြောင့်ဖြောင့်မှန်မှန်ဆောင်ရွက်နိုင်ခဲ့သည့်အပြင် ပြည်သူတစ်ရပ်လုံးလိုလားသည့် စစ်မှန်စည်းကမ်းပြည့်ဝသော ပါတီစုံဒီမိုကရေစီစနစ်ကို အကောင်အထည်ဖော်နိုင်အောင် ကြိုးပမ်းဆောင်ရွက်လျက်ရှိသည်။

ထိုသို့ နိုင်ငံတော်တည်ငြိမ်အေးချမ်းပြီး ဒီမိုကရေစီစနစ်ကို တက်လှမ်းနိုင်အောင် ကြိုးပမ်းဆောင်ရွက်နိုင်မှုများကြောင့် နိုင်ငံတကာအသိုင်းအဝိုင်းအနေဖြင့် နားလည်လက်ခံ အသိအမှတ်ပြုမှုများရှိခဲ့သောကြောင့် နိုင်ငံတကာမှ ဖွံ့ဖြိုးပြီးနိုင်ငံများ အပါအဝင်နိုင်ငံအများစုက အပြုသဘောဆောင်အကောင်းမြင်စိတ်ထားများဖြင့် အားပေးကူညီဆောင်ရွက်မှုများရှိလာသည်ကို တွေ့ရသည်။ ယခုအခါ နိုင်ငံတည်ငြိမ်အေးချမ်းမှု တိုးတက်ရရှိလာပြီး အထွေထွေရွေးကောက်ပွဲကိုပင် ကျင်းပနိုင်တော့မည်ကို တွေ့ရမည်ဖြစ်သည်။ မြန်မာနိုင်ငံ ဖြစ်ပေါ်တိုးတက်မှုများကို ဘယ်လာရုစ်နိုင်ငံအပါအဝင် မိတ်ဆွေနိုင်ငံများက အသိအမှတ်ပြု အားပေးကူညီမှုများ ထဲထဲဝင်ဝင် ဆောင်ရွက်ပေးလာမှုများရှိသလို အမေရိကန်ကဲ့သို့ ကမ္ဘာ့နိုင်ငံကြီးသည်ပင် ၎င်းတို့ နိုင်ငံ၏အကျိုးစီးပွား၊ မြန်မာနိုင်ငံ၏အကျိုးစီးပွားကိုရှေးရှု၍ ကောင်းမွန်သောအရွေ့များပြုလုပ်လာသည်ကို တွေ့ရသည်။

ဘယ်လာရုစ်နိုင်ငံအနေဖြင့် မြန်မာနိုင်ငံ၏ ရွေးကောက်ပွဲအောင်မြင်ရေး၊ နိုင်ငံဖွံ့ဖြိုးတိုးတက်ရေးအတွက် လက်ရှိပကတိအခြေအနေမှန်ကို ထုတ်ဖော်ပြောကြားခဲ့ပြီး ကဏ္ဍစုံတွင်ပူးပေါင်းပါဝင်ဆောင်ရွက်နိုင်အောင် ကတိကဝတ်ပြုခဲ့သည်။ နိုဝင်ဘာလ ၂၅ ရက်နေ့က အမေရိကန်နိုင်ငံ အမိမြေလုံခြုံရေးဝန်ကြီးဌာနက ကြေညာချက်တစ်ရပ်ထုတ်ပြန်ရာတွင် အမေရိကန်နိုင်ငံတွင် အကြောင်းအမျိုးမျိုးဖြင့် ရောက်ရှိနေကြသော မြန်မာနိုင်ငံသား ၄၀၀၀ ခန့်ကို ယာယီခိုလှုံခွင့်ရုပ်သိမ်းပြီး မိခင်နိုင်ငံပြန်ရန်ကိစ္စသည်လည်း အပြုသဘောဆောင်သည့် ဆောင်ရွက်ချက်ဖြစ်သည်။ ထိုသို့ မြန်မာနိုင်ငံ၏ စေတနာမှန်သော ကံတရားကြောင့် ဖြစ်ပေါ်တိုးတက်မှုများကို နိုင်ငံတကာက အသိအမှတ်ပြုလျက်ရှိသလို မြန်မာနိုင်ငံသားများအနေဖြင့်လည်း ဒီမိုကရေစီရေး၊ ငြိမ်းချမ်းရေး၊ ဖွံ့ဖြိုးတိုးတက်ရေးတွင် အားလုံးမျှဝေယူနိုင်ကြပါရန် တိုက်တွန်းအပ်ပါကြောင်း။ ။