မွန်ပြည်နယ်၊ ရေးမြို့နယ်၌ KNU အကြမ်းဖက်အဖွဲ့နှင့် PDF အမည်ခံ အကြမ်းဖက်သမားများ ပူးပေါင်းအဖွဲ့က ကျေးရွာအတွင်း ဝင်ရောက်၍ အကြမ်းဖက်ပစ်ခတ်တိုက်ခိုက်မှုကြောင့် ကျေးရွာ ပြည်သူ့စစ်အဖွဲ့ဝင် သုံးဦး သေဆုံးကာ လေးဦး ထိခိုက်ဒဏ်ရာရရှိ

မွန်ပြည်နယ်၊ ရေးမြို့နယ်၌ KNU အကြမ်းဖက်အဖွဲ့နှင့် PDF အမည်ခံ အကြမ်းဖက်သမားများ ပူးပေါင်းအဖွဲ့က ကျေးရွာအတွင်း ဝင်ရောက်၍ အကြမ်းဖက်ပစ်ခတ်တိုက်ခိုက်မှုကြောင့် ကျေးရွာ ပြည်သူ့စစ်အဖွဲ့ဝင် သုံးဦး သေဆုံးကာ လေးဦး ထိခိုက်ဒဏ်ရာရရှိ

     တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန် လည်း ကောင်း၊ ၎င်းတို့နှင့် အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍ လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက် ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။

     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဒီဇင်ဘာ ၇ ရက် မွန်းတည့် ၁၂ နာရီတွင် မွန်ပြည်နယ်၊ ရေးမြို့နယ်၊ အာယုတောင်ကျေးရွာအုပ်စု အုပ်ချုပ်ရေးမှူးရုံးသို့ KNU အကြမ်းဖက်အဖွဲ့နှင့် PDF အမည်ခံ အကြမ်းဖက်သမားများ ပူးပေါင်းအဖွဲ့ အင်အား(စိစစ်ဆဲ)က မော်တော်ယာဉ် နှစ်စီး၊ ဆိုင်ကယ် ငါးစီးတို့ဖြင့် ရောက်ရှိလာပြီး လက်နက်ငယ်များဖြင့် ပစ်ခတ်တိုက်ခိုက်ခဲ့သဖြင့် အာယုတောင်ကျေးရွာအုပ်စု အုပ်ချုပ်ရေးမှူး ဦးလင်းဦး(၅၉)နှစ် ဦးဆောင်သည့် ကျေးရွာပြည်သူ့စစ်အဖွဲ့က ပြန်လည်ခုခံပစ်ခတ်ခဲ့ရာ ၁၅ မိနစ်အကြာတွင် အကြမ်းဖက်သမားများ ပြန်လည်ဆုတ်ခွာ ထွက်ပြေးသွားခဲ့ကြောင်း၊ ဖြစ်စဉ်အတွင်း ကျေးရွာပြည်သူ့စစ်အဖွဲ့ဝင်များဖြစ်ကြသည့် ဦးရန်ပိုင်ဖြိုး(၃၆)နှစ်၊ မောင်ထွန်းအောင်(၁၉)နှစ်နှင့် ကိုသာအောင်(၂၃)နှစ်တို့တွင် ကျည်ထိမှန်ဒဏ်ရာများဖြင့် သေဆုံးခဲ့ပြီး ဦးလင်းဦး၊ ဦးခိုင်ငြိမ်းအောင်(၅၄)နှစ်၊ ဦးရဲမင်းသိန်း(၄၃)နှစ်နှင့် ကိုထက်မျိုး(၂၃)နှစ်တို့တွင် ကျည်ထိမှန်ဒဏ်ရာများရရှိခဲ့၍ ဆေးကုသနိုင်ရေးအတွက် ဦးခိုင်ငြိမ်းအောင်နှင့် ဦးရဲမင်းသိန်းတို့ နှစ်ဦးအား ရေးမြို့နယ်ပြည်သူ့ဆေးရုံသို့လည်းကောင်း၊ ဦးလင်းဦးနှင့် ကိုထက်မျိုးတို့ နှစ်ဦးအား နယ်မြေခံတပ်မတော်ဆေးခန်းသို့လည်းကောင်း အသီးသီးပို့ဆောင်ထားရှိကြောင်း သိရသည်။

     ထိုသို့ စစ်ရေးပစ်မှတ်မဟုတ်သည့် အပြစ်မဲ့ အရပ်သားပြည်သူများ နေထိုင်ရာ ကျေးရွာများအား ဝင်ရောက်၍ အကြမ်းဖက်ပစ်ခတ်တိုက်ခိုက်မှုများ လုပ်ဆောင်ခဲ့သည့် အကြမ်းဖက်သမားများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။