ချင်းပြည်နယ်၊ ဖလမ်းမြို့နယ်၌ CDF အကြမ်းဖက်အဖွဲ့က ပစ်ချထားခဲ့သည့် ဗုံးသီးဟောင်း တစ်လုံး ပေါက်ကွဲခဲ့မှုကြောင့် ကလေးငယ် တစ်ဦး သေဆုံးကာ တစ်ဦး ထိခိုက်ဒဏ်ရာရရှိ

ချင်းပြည်နယ်၊ ဖလမ်းမြို့နယ်၌ CDF အကြမ်းဖက်အဖွဲ့က ပစ်ချထားခဲ့သည့် ဗုံးသီးဟောင်း တစ်လုံး ပေါက်ကွဲခဲ့မှုကြောင့် ကလေးငယ် တစ်ဦး သေဆုံးကာ တစ်ဦး ထိခိုက်ဒဏ်ရာရရှိ

     အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများ ထိခိုက်ဒဏ်ရာ ရရှိစေရန်နှင့် အကြောက်တရားများ လွှမ်းမိုးစေရန် ရည်ရွယ်ချက်များဖြင့် ဖမ်းဆီးသတ်ဖြတ်ခြင်း၊ ရပ်ကွက်၊ ကျေးရွာများအတွင်းသို့ လက်နက်ကြီး၊ လက်နက်ငယ်များ၊ ရှော့တိုက်ဒုံးများ၊ Drone ဖြင့် Drop Bomb များ ပစ်ချတိုက်ခိုက်ခြင်းများအား ဆင်ခြင်တုံတရားကင်းမဲ့စွာ ပြုလုပ်လျက်ရှိသည်။

     ထိုသို့ လုပ်ဆောင်လျက်ရှိရာ ၂၀၂၆ ခုနှစ်၊ မတ် ၁၁ ရက် နံနက် ၁၀ နာရီ ၃၀ မိနစ်တွင် ချင်းပြည်နယ်၊ ဖလမ်းမြို့နယ်၊ ရမ်ထလိုကျေးရွာနေ မောင်ယောဟန်ထောင်ထာထန်(၁၂)နှစ်နှင့် မောင်အာဂွန်ချန်ထှာရွှေ(၈)နှစ်တို့သည် ကျေးရွာအနောက်ဘက်ရှိ ငါးကန်သို့ ရေကူးရန် သွားရောက်စဉ် ငါးကန်အနီးအရောက်၌ CDF အကြမ်းဖက်အဖွဲ့က အများပြည်သူထိခိုက်စေရန် ရည်ရွယ်၍ ပစ်ချထားခဲ့သည့် ဗုံးသီးဟောင်း တစ်လုံးအား တွေ့ရှိရသဖြင့် မောင်ယောဟန်ထောင်ထာထန်မှ ခဲဖြင့် ထုရိုက်ခဲ့သဖြင့် ပေါက်ကွဲခဲ့မှုကြောင့် ၎င်းတွင် ဗုံးသီးပေါက်ကွဲစ ထိမှန်ဒဏ်ရာများရရှိကာ သေဆုံးသွားခဲ့ပြီး အနီးတွင်ရှိနေသည့် မောင်အာဂွန်ချန်ထှာရွှေတွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့၍ ဆေးကုသနိုင်ရေး ဟားခါးမြို့နယ်ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။

     အထက်ပါဖြစ်စဉ်မှ အကြမ်းဖက်မှု ကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိပါသည်။