တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA)(၁ဝ)နှစ်ပြည့် နှစ်ပတ်လည်နေ့အခမ်းအနားတွင် မြန်မာနိုင်ငံဆိုင်ရာ အိန္ဒိယသံအမတ်ကြီး H.E. Mr. Abhay Thakur ပြောကြားသည့် ဂုဏ်ပြုစကား

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA)(၁ဝ)နှစ်ပြည့် နှစ်ပတ်လည်နေ့အခမ်းအနားတွင် မြန်မာနိုင်ငံဆိုင်ရာ အိန္ဒိယသံအမတ်ကြီး H.E. Mr. Abhay Thakur ပြောကြားသည့် ဂုဏ်ပြုစကား

နေပြည်တော် အောက်တိုဘာလ ၁၅

ပြည်ထောင်စုသမ္မတမြန်မာနိုင်ငံတော် ယာယီသမ္မတ ဗိုလ်ချုပ်မှူးကြီး မင်းအောင်လှိုင်နဲ့ ဂုဏ်သရေရှိလူကြီးမင်းများ၊ နိုင်ငံရေးပါတီများ၊ တိုင်းရင်းသားလက်နက်ကိုင်အဖွဲ့အစည်းများရဲ့ ကိုယ်စားလှယ်တော်များ၊ ဧည့်သည်တော်များ ခင်ဗျာ

ဒီနေ့ဟာ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ကို ၂၀၁၅ ခုနှစ်မှာ လက်မှတ်ရေးထိုးခဲ့တဲ့ ဆယ်နှစ်ပြည့် နှစ်ပတ်လည်နေ့ဖြစ်ပါတယ်။ ဒီစာချုပ်ကို ပင်လုံစိတ်ဓာတ်နဲ့ နိုင်ငံရေးဆွေးနွေးပွဲတွေရဲ့ ရလဒ်တွေအတိုင်း ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ ပြည်ထောင်စုတစ်ခု တည်ထောင်ဖို့ဆိုတဲ့ ရည်ရွယ်ချက်နဲ့ ရေးထိုးခဲ့ကြတာ ဖြစ်ပါတယ်။ မြန်မာနိုင်ငံမှာ ရေရှည်ငြိမ်းချမ်းရေးရဖို့အတွက် NCA ဟာ မြန်မာအစိုးရနဲ့ တိုင်းရင်းသားလက်နက်ကိုင်အဖွဲ့အစည်းတွေ (EAOs) အကြား တွေ့ဆုံဆွေးနွေးမှုတွေ ပြုလုပ်နိုင်ဖို့ အဓိကကျတဲ့ အင်စတီကျူးရှင်းမူဘောင်တစ်ခုအဖြစ် ရှိနေခဲ့ပါတယ်။

NCA လက်မှတ်ရေးထိုးနိုင်ခဲ့တာဟာ မြန်မာ့သမိုင်းမှာ အင်မတန်အရေးကြီးတဲ့ အလှည့်အပြောင်းတစ်ခု ဖြစ်ခဲ့ပါတယ်။ မတူကွဲပြားတဲ့ တိုင်းရင်းသားလူမျိုးစုတွေအနေနဲ့ ပဋိပက္ခတွေကို ဘေးဖယ်ထားပြီး ရေရှည်တည်တံ့တဲ့ ငြိမ်းချမ်းရေးအတွက် နှစ်ဖက်လုံးလက်ခံနိုင်မယ့် ဖက်ဒရယ်ဒီမိုကရေစီအစီအစဉ်တွေကို ပူးပေါင်းလုပ်ဆောင်သွားကြမယ်ဆိုတဲ့ တူညီတဲ့သန္နိဋ္ဌာန်ကို ဒီ NCA စာချုပ်က ကိုယ်စားပြုပါတယ်။ NCA ရဲ့ ဒီလိုအနှစ်သာရကို ပိုပြီးအားကောင်းအောင် ဆောင်ရွက်သွားရမှာ ဖြစ်ပါတယ်။

ဒါကြောင့် NCA (၁၀)နှစ်ပြည့် အထိမ်းအမှတ်မှာ ‘‘NCA မှသည် ရေရှည်တည်တံ့ခိုင်မြဲသော ငြိမ်းချမ်းရေးဖြင့် အနာဂတ်ကိုပုံဖော်မည်’’ ဆိုတဲ့ ဆောင်ပုဒ်ကို အိန္ဒိယနိုင်ငံက ကြိုဆိုကြောင်း ပြောကြားလိုပါတယ်။ NCA ဟာ မြန်မာနိုင်ငံရဲ့ ကြာညောင်းလှပြီဖြစ်တဲ့ ပြည်တွင်းပြဿနာတွေကို ဖြေရှင်းဖို့ရာ လက်ရှိမှာရှိနေတဲ့ တစ်ခုတည်းသော မူဘောင်ဖြစ်တဲ့အတွက် လက်မှတ်ရေးထိုးထားတဲ့ အဖွဲ့အစည်းအားလုံးအနေနဲ့ NCA ယန္တရားကို အပြည့်အဝအသုံးချပြီး အနှစ်သာရရှိတဲ့ ဆွေးနွေးမှုတွေလုပ်ကြဖို့နဲ့ ဒီမိုကရေစီနဲ့ ဖက်ဒရယ်စနစ်အပေါ်အခြေခံတဲ့ ထင်သာမြင်သာရှိပြီး ရေရှည်ခိုင်မြဲမယ့် ဆွေးနွေးညှိနှိုင်းမှုရလဒ်တွေရအောင် ကြိုးပမ်းကြဖို့ ကျွန်တော်တို့ အလေးအနက်တိုက်တွန်းလိုပါတယ်။ မြန်မာနိုင်ငံရဲ့အနာဂတ်ဟာ NCA လုပ်ငန်းစဉ်ရဲ့ အောင်မြင်မှုအပေါ်မှာ တကယ်ပဲမူတည်နေပါတယ်။

ကမ္ဘာပေါ်မှာ လူဦးရေ ၁.၄ ဘီလီယံကျော်ရှိပြီး တရားဝင်ဘာသာစကား ၂၂ မျိုးနဲ့ ငြိမ်းချမ်းစွာ အတူနေထိုင်နေတဲ့ အကြီးဆုံးဒီမိုကရေစီနိုင်ငံလည်းဖြစ်၊ ကမ္ဘာပေါ်မှာ စတုတ္ထအကြီးဆုံးနဲ့ အလျင်မြန်ဆုံးတိုးတက်နေတဲ့ စီးပွားရေးနိုင်ငံကြီးလည်းဖြစ်၊ အခွန်ကောက်ခံမှုပုံစံတစ်ခုတည်းနဲ့ ဒစ်ဂျစ်တယ်အခြေခံအဆောက်အအုံတစ်ခုတည်းရှိတဲ့ နိုင်ငံလည်းဖြစ်တဲ့ အိန္ဒိယနိုင်ငံဟာ ပြီးခဲ့တဲ့ ၂ နှစ်အတွင်း ဖွဲ့စည်းပုံအခြေခံဥပဒေရေးရာနဲ့ ဖက်ဒရယ်စနစ်ဆိုင်ရာ အတွေ့အကြုံတွေကို မြန်မာနိုင်ငံနဲ့ ဝေမျှခွင့်ရတဲ့အတွက် ဂုဏ်ယူကြောင်း ပြောကြားလိုပါတယ်။ ကျွန်တော်တို့ဟာ ဟောပြောပွဲနှစ်ခုနဲ့ အလုပ်ရုံဆွေးနွေးပွဲနှစ်ခု ကျင်းပခဲ့ပါတယ်။ အိန္ဒိယနိုင်ငံရဲ့ ဗဟိုနဲ့ ပြည်နယ်တွေအကြား ဥပဒေပြုရေး၊ အုပ်ချုပ်ရေးအာဏာခွဲဝေပုံ၊ အခွန်ကောက်ခံမှုနဲ့ ဝင်ငွေခွဲဝေမှု အသေးစိတ်တွေကိုလည်း ပါဝင်သူတွေနဲ့အတူ ဆွေးနွေးဝေမျှခဲ့ကြပါတယ်။ ဒီလိုလုပ်ဆောင်တဲ့အခါမှာ ကျွန်တော်တို့ဟာ မြန်မာနိုင်ငံကဦးဆောင်ပြီး မြန်မာနိုင်ငံကပိုင်ဆိုင်တဲ့၊ နိုင်ငံအတွက် အသင့်တော်ဆုံးဖြစ်တဲ့ ဖြေရှင်းနည်းတစ်ခုရရှိလာရေးကို အမြဲတမ်း ထောက်ခံရပ်တည်ခဲ့ပါတယ်။

မြန်မာနိုင်ငံဟာ အိန္ဒိယရဲ့ အရေးပါတဲ့ နိုင်ငံခြားရေးမူဝါဒဦးစားပေးမှုတွေဖြစ်တဲ့ အိမ်နီးချင်း ဦးစားပေးမူဝါဒ (Neighbourhood First)၊ အရှေ့မျှော်မူဝါဒ (Act East) MAHASAGAR (လုံခြုံရေးနဲ့ ဖွံ့ဖြိုးမှုတို့ ညီညီမျှမျှနဲ့ ဘက်စုံတိုးတက်ရေးမူဝါဒ)စတဲ့ မူဝါဒတွေရဲ့ဆုံမှတ်မှာ ရှိပါတယ်။ အိန္ဒိယနိုင်ငံဟာ နှစ်ပေါင်းများစွာကတည်းက ယဉ်ကျေးမှု၊ ဘာသာရေးနဲ့ ပြည်သူချင်းဆက်ဆံရေးတွေရှိခဲ့တဲ့ ယုံကြည်ရတဲ့ အိမ်နီးချင်းမိတ်ဖက်နိုင်ငံအဖြစ် မြန်မာနိုင်ငံဘက်က အမြဲတမ်းရပ်တည်ခဲ့ပါတယ်။ မြန်မာနိုင်ငံနဲ့ ကျွန်တော်တို့ဟာ ကုန်းမြေနယ်နိမိတ် ၁၆၄၃ ကီလိုမီတာ၊ ရေကြောင်းနယ်နိမိတ် ၁၀၆၀ ကီလိုမီတာ ထိစပ်နေတဲ့အတွက် မြန်မာနိုင်ငံကပဋိပက္ခဟာ ကျွန်တော်တို့ကို တိုက်ရိုက်သက်ရောက်မှု ရှိပါတယ်။ ဒါကြောင့် မြန်မာနိုင်ငံမှာ အကြမ်းဖက်မှုတွေရပ်စဲပြီး ငြိမ်းချမ်းတည်ငြိမ်မှု ထိန်းသိမ်းထားနိုင်ရေးဟာ ကျွန်တော်တို့အတွက် အင်မတန်မှကို အရေးပါပါတယ်။

နိဂုံးချုပ်အနေနဲ့ ပြောရရင်တော့ လက်တွေ့မကျတဲ့ ကြိုတင်သတ်မှတ်ချက်တွေမထားဘဲ NCA ကနေတစ်ဆင့် သက်ဆိုင်သူအားလုံး ပါဝင်ဆွေးနွေးမှုတွေ၊ အမြင်ချင်းဖလှယ်မှုတွေကို မြှင့်တင်ပေးနိုင်မယ်လို့ ကျွန်တော်တို့ မျှော်လင့်ပါတယ်။ မြန်မာနိုင်ငံလို မတူကွဲပြားပြီး အရင်းအမြစ်ပေါကြွယ်ဝတဲ့ နိုင်ငံတစ်နိုင်ငံမှာ သက်ဆိုင်သူအားလုံးက အလျှော့အတင်းတွေလုပ်၊ အပေးအယူတွေလုပ်မှသာ ငြိမ်းချမ်းရေးနဲ့ တည်ငြိမ်မှုရရှိနိုင်မှာဖြစ်ပါတယ်။ စည်းလုံးတဲ့ မြန်မာနိုင်ငံအဖြစ် အတူတကွ ကြိုးပမ်းကြရမှာ ဖြစ်ပါတယ်။ ငြိမ်းချမ်းရေးလုပ်ငန်းစဉ်မှာ သက်ဆိုင်သူအားလုံး ပါဝင်ရမှာဖြစ်ပြီး ဆွေးနွေးပွဲမှာ လူတိုင်းအတွက် နေရာရှိရပါမယ်။ ဖက်ဒရယ် ဒီမိုကရေစီသမ္မတနိုင်ငံဆိုတဲ့ပန်းတိုင်ဟာ လွတ်လပ်မျှတပြီး ဖက်ဒရယ်စနစ်နဲ့ အားလုံးပါဝင်ကာ ယုံကြည်ရတဲ့ ဒီမိုကရေစီလုပ်ငန်းစဉ်အပေါ် အခြေခံပြီး အပေးအယူစိတ်ဓာတ်နဲ့ နိုင်ငံရေးဆွေးနွေးပွဲတွေ၊ ညှိနှိုင်းမှုတွေကနေတစ်ဆင့်မှ အကောင်အထည်ပေါ်လာနိုင်မှာဖြစ်ကြောင်း ပြောကြားလိုပါတယ်။

ကျေးဇူးတင်ပါတယ်။ မြန်မာနိုင်ငံနဲ့ ကျွန်တော်တို့ရဲ့ ဒေသအတွင်းမှာ ငြိမ်းချမ်းမှုနဲ့ စည်းလုံးညီညွတ်မှုတွေ အားကောင်းလာပါစေလို့ ဆုမွန်ကောင်း တောင်းအပ်ပါတယ်။