နေပြည်တော်ကောင်စီနယ်မြေ၏ မွေးမြူရေးကဏ္ဍဖွံ့ဖြိုးရေးနှင့် အသားထုတ်လုပ်မှုတိုးချဲ့ရေး ကြိုးပမ်း

နေပြည်တော်ကောင်စီနယ်မြေ၏ မွေးမြူရေးကဏ္ဍဖွံ့ဖြိုးရေးနှင့် အသားထုတ်လုပ်မှုတိုးချဲ့ရေး ကြိုးပမ်း

နေပြည်တော် ဧပြီ ၂၄

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာအောင်ကြီးသည် ယမန်နေ့နံနက်ပိုင်းက နေပြည်တော်၊ တပ်ကုန်းမြို့နယ် ပေတောကျေးရွာရှိ ပုဂ္ဂလိကဥစား ကြက်မွေးမြူရေးခြံ၌ ဥစားကြက်ကောင်ရေ ၅၀၀၀၀ မွေးမြူထားရှိမှုကိုကြည့်ရှုပြီး ပုဂ္ဂလိကမွေးမြူရေးလုပ်ငန်းရှင်များနှင့်တွေ့ဆုံ၍ ဥနှင့်အသား တိုးတက်ထုတ်လုပ် နိုင်ရေးဆိုင်ရာများကို အကြံပြုဆွေးနွေးမှာကြားသည်။

ထို့နောက် ဒုတိယဝန်ကြီးသည် ကန်ကြီးမွေးမြူရေးဇုန်၊ ဖန်ဟွ (Fun Hwa) နို့စားနွားမွေးမြူရေးခြံ၌ ကံကြီးမွေးမြူရေးဇုန်နှင့် ရွှေမြို့မွေးမြူရေးဇုန်တို့မှ မွေးမြူရေးလုပ်ငန်းရှင်များနှင့်တွေ့ဆုံ၍ ခေတ်မီနည်းစနစ်ဖြင့် တိုးချဲ့မွေးမြူရေးဆိုင်ရာကိစ္စရပ်များကို ဆွေးနွေးမှာကြားပြီး ကင်းသာကျေးရွာရှိ ပုဂ္ဂလိကအသားတိုးဝက်မွေးမြူရေးခြံ၌ အသားတိုးဝက် ၁၀၀၀ ကျော် မွေးမြူထားရှိမှုနှင့် မွေးမြူရေးသုတေသနစခန်း(ရွှေမြို့)၏ ပျားမျိုးစိတ်သုတေသနလုပ်ငန်း ဆောင်ရွက်နေမှုတို့ကို ကြည့်ရှုစစ်ဆေးကာ လိုအပ်သည်များကို ဆွေးနွေးမှာကြားသည်။

မွန်းလွဲပိုင်းတွင် ဒုတိယဝန်ကြီးသည် မွေးမြူရေးနှင့်ကုသရေးဦးစီးဌာန ရွှေမြို့မွေးမြူရေးဇုန် ဥဖောက်စက်သို့ရောက်ရှိပြီး နေပြည်တော်၊ တပ်ကုန်းမြို့နယ်နှင့် ဧရာဝတီတိုင်းဒေသကြီး ပုသိမ်မြို့သို့ တင်ပို့ရောင်းချမည့် ဘဲသားပေါက်အမကောင်ရေ ၁၄၀၀ သားဖောက်ထားရှိမှု၊ ဥစားဘဲများမွေးမြူထားရှိမှုနှင့် ဒေသနွားများ မွေးမြူထားရှိမှုတို့ကို ကြည့်ရှုစစ်ဆေးခဲ့ကြောင်း သတင်းရရှိသည်။

သတင်းစဉ်