နေပြည်တော်စည်ပင်သာယာရေးကော်မတီ ဒုတိယဥက္ကဋ္ဌ၊ ဒုတိယမြို့တော်ဝန် ဦးဝင်းမိုးခိုင် ဒက္ခိဏသီရိမြို့နယ်ရှိ ရန်အောင်မြင်ဆည် ကြံ့ခိုင်မှု၊ ဓနသိဒ္ဓိရေပေးဝေရေးစက်ရုံမှ ရေဖြန့်ဝေပေးမည့်အခြေအနေ ကြည့်ရှုစစ်ဆေး
နေပြည်တော်စည်ပင်သာယာရေးကော်မတီ ဒုတိယဥက္ကဋ္ဌ၊ ဒုတိယမြို့တော်ဝန် ဦးဝင်းမိုးခိုင် ဒက္ခိဏသီရိမြို့နယ်ရှိ ရန်အောင်မြင်ဆည် ကြံ့ခိုင်မှု၊ ဓနသိဒ္ဓိရေပေးဝေရေးစက်ရုံမှ ရေဖြန့်ဝေပေးမည့်အခြေအနေ ကြည့်ရှုစစ်ဆေး
Ministry of Information/ Naypyitaw / April 23, 2026
နေပြည်တော် ဧပြီ ၂၂
နေပြည်တော်စည်ပင်သာယာရေးကော်မတီ ဒုတိယဥက္ကဋ္ဌ၊ ဒုတိယမြို့တော်ဝန် ဦးဝင်းမိုးခိုင်သည် ကော်မတီဝင် ဦးကျော်ကျော်အောင်၊ သက်ဆိုင်ရာတာဝန်ရှိသူများနှင့်အတူ ယနေ့နံနက်ပိုင်းက ဒက္ခိဏသီရိမြို့နယ်ရှိ ရန်အောင်မြင်ဆည်နှင့် ဇမ္ဗူသီရိမြို့နယ် ဓနသိဒ္ဓိရေပေးဝေရေး စက်ရုံတို့သို့ သွားရောက်ကြည့်ရှုစစ်ဆေးသည်။
ဦးစွာ ဒုတိယမြို့တော်ဝန်နှင့် တာဝန်ရှိသူများသည် ဒက္ခိဏသီရိမြို့နယ်ရှိ ရန်အောင်မြင် ရေသန့်စင်စက်ရုံသို့ သွားရောက်ကြည့်ရှုရာ အင်ဂျင်နီယာဌာန (ရေနှင့်သန့်ရှင်းမှု) ဌာနမှူးက ရန်အောင်မြင် ရေသန့်စင်စက်ရုံမှ တစ်ရက်လျှင် ရေဂါလန် ၁ ဒသမ ၂၅ သန်း သန့်စင်ပေးနိုင်သည့် အနှေးနှုန်း ရေသန့်စင်ကန်သုံးခုဖြင့် စုစုပေါင်း ၃ ဒသမ ၇၅သန်း စစ်ထုတ်နေမှု၊ စစ်ထုတ်ပြီးရေများကို ပိတောက်ရေပေးရေးဝင်းနှင့် (၅၃၅) ရေပေးရေးဝင်းတို့သို့ပေးပို့ပြီး သုံးစွဲသူများထံသို့ သောက်သုံးရေပေးဝေနေမှုများကို ရှင်းလင်းတင်ပြရာ ဒုတိယမြို့တော်ဝန်က ရေအရည်အသွေးကောင်းမွန်စေရေး၊ သန့်စင်ပြီး ရေပမာဏလုံလောက်စွာ ထွက်ရှိရေးတို့ကို ဂရုတစိုက်ဆောင်ရွက်ရန်မှာကြားသည်။
ထို့နောက် ရန်အောင်မြင်ဆည် ရေယူအဆောက်အအုံ (Intake Tower) သို့ရောက်ရှိပြီး ယာယီတပ်ဆင်ထားသော ပန့်မော်တာခြောက်လုံးကို အလှည့်ကျမောင်းနှင်နိုင်ရေးအတွက် စနစ်တကျ စီမံဆောင်ရွက်ရန်၊ မိုးရာသီမတိုင်မီ သောက်သုံးရေပြတ်လပ်မှု မရှိစေရေးအတွက် ဆင်အုံကန်မှ ရေကူတွန်းပို့မှုလုပ်ငန်းကိုလည်း စဉ်ဆက်မပြတ် ဆောင်ရွက်ရန်မှာကြားသည်။
ယင်းနောက် ငလျင်ဒဏ်ကြောင့် ပျက်စီးမှုရှိခဲ့သော ရန်အောင်မြင်တမံ ပြုပြင်ပြီးစီးမှု အခြေအနေနှင့် ချောင်းမငယ်ဆည်မှရေကို ဆင်အုံကန်မှတစ်ဆင့် တစ်နေ့ရေဂါလန် ခြောက်သန်းရယူပြီး အမြန်နှုန်းရေသန့်စင်စက်ရုံလေးခုဖြင့် စစ်ထုတ်၍ ရပ်ကွက်များသို့ ဖြန့်ဝေမည့်စနစ်တည်ရှိသည့် ဓနသိဒ္ဓိရေစက်ရုံသို့ ရောက်ရှိစစ်ဆေးပြီး ရေအရည်အသွေး ကောင်းမွန်စေရေးအတွက် အမြဲမပြတ်ကြည့်ရှုဆောင်ရွက်ရန်တို့ကို မှာကြားသည်။
ထို့နောက် သုခသိဒ္ဓိရပ်ကွက် အကွက်အမှတ် (၈-က) သို့သွားရောက်၍ စတုရန်းပေ ၆၀၀ ရှိသော လေးခန်းတွဲ၊ လေးထပ် အမှုထမ်းအိမ်ရာများ အသစ်ဆောက်လုပ်နေမှု အခြေအနေများကို လှည့်လည်ကြည့်ရှုစစ်ဆေးကာ ဒုတိယမြို့တော်ဝန်ကလုပ်ငန်းများ စံချိန်စံညွှန်းနှင့်အညီ သတ်မှတ်ချိန်အတွင်း အမြန်ပြီးစီးအောင် ဆောင်ရွက်ရန် မှာကြားခဲ့ကြောင်း သိရသည်။
သတင်းစဉ်
သတင်းအေဂျင်စီလုပ်ငန်း ပိတ်သိမ်းကြောင်း အသိပေးကြေညာချက်
Posted on Apr 24, 2026ပုံနှိပ်ခြင်းနှင့်ထုတ်ဝေခြင်းလုပ်ငန်း ဥပဒေပုဒ်မ ၆၊ ပုဒ်မခွဲ(ခ)အရ ပြန်ကြားရေးဝန်ကြီးဌာနသည် ပုံနှိပ်ခြင်းနှင့်ထုတ်ဝေခြင်းလုပ်ငန်းဥပဒေ ပုဒ်မ ၈ ပါ စည်းကမ်းချက်တစ်ရပ်ရပ်နှင့် ငြိစွန်းသည်ဟု သံသယရှိသော ထုတ်ဝေစာကို ပုံနှိပ်၊ ထုတ်ဝေခဲ့ကြောင်း ခိုင်လုံသောအထောက်အထားဖြင့် သတင်းပေးပို့ခြင်းကို လက်ခံရရှိလျှင် သော်လည်းကောင်း၊ ကိုယ်တိုင်သိရှိလျှင်သော်လည်းကောင်း သတ်မှတ်ချက်နှင့်အညီ စစ်ဆေးပြီး ငြိစွန်းကြောင်းတွေ့ရှိပါက လုပ်ငန်းအသိအမှတ်ပြုလက်မှတ်ကို ပြန်လည်ရုပ်သိမ်းခြင်း သို့မဟုတ် ကာလအကန့်အသတ်ဖြင့် ရပ်ဆိုင်းခြင်း ပြုနိုင်ပါသည်။ သတင်းအေဂျင်စီလုပ်ငန်း အသိအမှတ်ပြုလက်မှတ် ရယူထားသူဆလိုင်းရန်လင်းမာန်၏ Chin World သတင်းအေဂျင်စီ၊ ဦးဂျေမှိန်း ထန်းစန်းငါ၏ KHONUMTHUNG MEDIA GROUP သတင်းအေဂျင်စီနှင့် ဦးမင်းထက်အောင်၏ မျက်မှောက်ခေတ်(Nowadays News) သတင်းအေဂျင်စီတို့သည် ပုံနှိပ်ခြင်းနှင့်ထုတ်ဝေခြင်း လုပ်ငန်းဥပဒေ ပုဒ်မ ၈၊ ပုဒ်မခွဲ(ခ)ပါ စည်းကမ်းချက်ကိုလိုက်နာခြင်းမရှိဘဲ နိုင်ငံတော်လုံခြုံရေး၊ တရားဥပဒေစိုးမိုးရေး၊ အများပြည်သူအေးချမ်းသာယာရေးတို့ကို ထိခိုက်စေသည့် အကြောင်းအရာများကိုရေးသားလွှင့်တင် ဖော်ပြခဲ့သည့်အတွက် ၎င်းတို့အား ထုတ်ပေးထားသည့် သတင်းအေဂျင်စီလုပ်ငန်းများကို ၂၀၂၆ ခုနှစ်၊ ဧပြီလ ၉ ရက်နေ့မှစ၍ ပိတ်သိမ်း လိုက်ကြောင်းနှင့် ၎င်းသတင်းအေဂျင်စီများအနေဖြင့် မီဒီယာအမျိုးအစားတစ်ခုခုကို အသုံးပြု၍ဖြစ်စေ၊ နည်းပညာတစ်ရပ်ရပ်ကို အသုံးပြု၍ဖြစ်စေ ရေးသားထုတ်လွှင့်ဖော်ပြခြင်းမပြုရန် ကြေညာအပ်ပါသည်။