ပြည်ထောင်စုဝန်ကြီး ဒေါက်တာချာလီသန်း ဝန်ထမ်းများ ထားရှိမည့် ယာယီအဆောက်အအုံများ တည်ဆောက်နေမှုကြည့်ရှုစစ်ဆေး

ပြည်ထောင်စုဝန်ကြီး ဒေါက်တာချာလီသန်း ဝန်ထမ်းများ ထားရှိမည့် ယာယီအဆောက်အအုံများ တည်ဆောက်နေမှုကြည့်ရှုစစ်ဆေး

နေပြည်တော် ဇွန် ၃

စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းသည် ညွှန်ကြားရေးမှူးချုပ်၊ ဦးဆောင်ညွှန်ကြားရေးမှူးတို့နှင့်အတူ ယနေ့မွန်းလွဲပိုင်းတွင် စက်မှုဝန်ကြီးဌာန ရုံးအမှတ် (၃၇) ရှိ ယာဉ်ရပ်နားဝင်းအတွင်း၌ ဝန်ထမ်းများနှင့် ဝန်ထမ်းမိသားစုများ နေရာချထားပေးနိုင်ရေးအတွက် ယာယီအဆောက်အအုံများ တည်ဆောက်ပြီးစီးမှု၊ ရေ၊ မီး၊ မိလ္လာလုပ်ငန်းများ စီမံဆောင်ရွက်ထားရှိမှုအခြေအနေတို့ကို လှည့်လည်ကြည့်ရှုစစ်ဆေးသည်။

ကြည့်ရှုစစ်ဆေးစဉ် ပြည်ထောင်စုဝန်ကြီးက ယာယီအဆောက်အအုံများ အမြန်ဆုံး ပြီးစီးမှသာ ဝန်ထမ်းများနှင့် ဝန်ထမ်းမိသားစုများ ယာယီနေထိုင်လျက်ရှိသည့် ရွက်ဖျင်တဲများမှ ပြောင်းရွှေ့နေရာချထားပေးနိုင်မည်ဖြစ်၍ တည်ဆောက်ရေးနှင့်ပတ်သက်သည့် အပြီးသတ်လုပ်ငန်းများ အမြန်ဆုံးပြီးစီးအောင် ဆောင်ရွက်ရန်၊ ဝန်ထမ်းများနှင့် ဝန်ထမ်းမိသားစုများ ရေ၊ မီး၊ မိလ္လာတို့ကို အဆင်ပြေချောမွေ့စွာ အသုံးပြုနိုင်ရေး စီမံဆောင်ရွက်ရန်၊ ယာယီအဆောက်အအုံများတွင် နေထိုင်မည့် ဝန်ထမ်းများနှင့် ဝန်ထမ်းမိသားစုများ လိုက်နာရမည့် စည်းမျဉ်းစည်းကမ်းများကို သတ်မှတ်ရေးဆွဲ ထုတ်ပြန်သွားရန်၊ ယာယီအဆောက်အအုံပတ်ဝန်းကျင် သန့်ရှင်းသပ်ရပ်မှု ရှိစေရေး၊ ယာယီအဆောက်အအုံများတွင် လျှပ်စစ်သွယ်တန်းတပ်ဆင်ခြင်းလုပ်ငန်းများ ပြီးစီးပါက ဝန်ထမ်းများ ဘေးအန္တရာယ်ကင်းရှင်းစွာ အသုံးပြုနိုင်ရေးအတွက် စက်မှုကြီးကြပ်ရေးနှင့် စစ်ဆေးရေးဦးစီးဌာနရှိ လျှပ်စစ်စစ်ဆေးရေးဌာနမှ စစ်ဆေးသွားရန် မှာကြားသည်။

ထို့နောက် ပြည်ထောင်စုဝန်ကြီးသည် အမှတ် (၃) အကြီးစား စက်မှုလုပ်ငန်းနှင့် မြန်မာ့ဆေးဝါးလုပ်ငန်းတို့တွင် ဝန်ထမ်းများ ရုံးလုပ်ငန်းများ ဆောင်ရွက်နေမှုအခြေအနေတို့ကို လှည့်လည်ကြည့်ရှုစစ်ဆေးပြီး ရုံးဝင်းနှင့် ရုံးခန်းများအတွင်း သန့်ရှင်းသာယာလှပမှုရှိစေရေး ဆောင်ရွက်ရန်နှင့် ငလျင်ကြောင့် ပျက်စီးခဲ့မှုဖြစ်ပေါ်ခဲ့သည့် ပစ္စည်းများအနက် ဆယ်တင်ရရှိခဲ့သည့်ပစ္စည်းများကို အကျိုးရှိ ထိရောက်စွာ ပြန်လည်အသုံးပြုသွားရန် မှာကြားခဲ့ကြောင်း သိရသည်။

သတင်းစဉ်