ပြည်ထောင်စုဝန်ကြီး ဒေါက်တာစိုးဝင်း လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနအောက်ရှိ ဦးစီးဌာနများ၏ လုပ်ငန်းလည်ပတ်ဆောင်ရွက်နေမှု ကြည့်ရှုစစ်ဆေး

ပြည်ထောင်စုဝန်ကြီး ဒေါက်တာစိုးဝင်း လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနအောက်ရှိ ဦးစီးဌာနများ၏ လုပ်ငန်းလည်ပတ်ဆောင်ရွက်နေမှု ကြည့်ရှုစစ်ဆေး

မော်လမြိုင် မတ် ၁၈

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာစိုးဝင်းသည် မွန်ပြည်နယ်လူမှုရေးရာဝန်ကြီး ဦးတင်ဇော်ထွန်း၊ တာဝန်ရှိသူများနှင့်အတူ ယနေ့နံနက်ပိုင်းတွင် လူမှုဝန်ထမ်းဦးစီးဌာန မော်လမြိုင်လူငယ်သင်တန်းကျောင်း၌ အဆိုပါသင်တန်းမှ လူငယ်များနှင့်တွေ့ဆုံအားပေးစကားပြောကြားပြီး စားရိပ်သာဆောင်နှင့် လူငယ်များ အားကစားလေ့ကျင့်နေမှု၊ ဆံပင်ညှပ်သင်တန်းများ ဖွင့်လှစ်သင်ကြားနေမှုတို့ကို လှည့်လည်ကြည့်ရှုကာ သင်တန်းကျောင်း ကျောင်းအုပ်၏ တင်ပြချက်များအပေါ် လိုအပ်သည်များကို မှာကြားဖြည့်ဆည်း ဆောင်ရွက်ပေးသည်။

ထို့နောက် ပြည်ထောင်စုဝန်ကြီးသည် အမှတ် (၂) မူလတန်းကြိုကျောင်း၌ မူကြိုအရွယ်ကလေးများအား အာဟာရမုန့်ကျွေးမွေးနေမှု၊ ကလေးငယ်များ ကဗျာရွတ်ဆိုနေမှုနှင့် ကလေးပြုစုရေးဌာန၌ ရင်ခွင်ပိုက်ကလေးများအား ကျွေးမွေးပြုစုစောင့်ရှောက်ထားမှုတို့ကိုလည်းကောင်း၊ အမှတ် (၁) မူလတန်းကြိုကျောင်း ကျောင်းဥပဓိရုပ်နှင့် ကြံ့ခိုင်မှုအခြေအနေများကိုလည်းကောင်း လှည့်လည်ကြည့်ရှုပြီး ကလေးငယ်များ၏ ဉာဏ်ရည်ဖွံ့ဖြိုးရေးအတွက် မိဘ၊ ဆရာများက ပူးပေါင်းပါဝင်ဆောင်ရွက်ပေးရန် လိုအပ်ကြောင်း ဆွေးနွေးမှာကြားသည်။

ယင်းနောက် ပြည်ထောင်စုဝန်ကြီးသည် မွန်ပြည်နယ်လူမှုဝန်ထမ်းဦးစီးဌာနရုံး၌ လူမှုဝန်ထမ်းဦးစီးဌာနနှင့် ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနများမှ အရာထမ်း၊ အမှုထမ်းများနှင့် ရင်းရင်းနှီးနှီး တွေ့ဆုံပြီး လိုအပ်သည်များ မှာကြားခဲ့ကြောင်း သတင်းရရှိသည်။                  

 သတင်းစဉ်