မြန်မာတစ်မျိုးသားလုံးက လှိုက်လှဲစွာ ဂုဏ်ပြုထောက်ခံအားပေး

မြန်မာတစ်မျိုးသားလုံးက လှိုက်လှဲစွာ ဂုဏ်ပြုထောက်ခံအားပေး

နယ်သာလန်နိုင်ငံသည် ဟိတ်ဂ်မြို့ အပြည်ပြည်ဆိုင်ရာတရားရုံးတွင် ဇန်နဝါရီလ ၁၂ ရက်မှ ၂၉ ရက်နေ့အထိ ပြုလုပ်သည့် မြန်မာနိုင်ငံအပေါ် ဂမ်ဘီယာနိုင်ငံက စွဲဆိုသည့်အမှုနှင့် ပတ်သက်သည့် ကြားနာပွဲသို့ မြန်မာနိုင်ငံကိုယ်စား သွားရောက်ဖြေရှင်းနေသည့် ပြည်ထောင်စုဝန်ကြီး ဦးကိုကိုလှိုင် ဦးဆောင်သော မြန်မာကိုယ်စားလှယ်အဖွဲ့အား မြန်မာပြည်သူတစ်ရပ်လုံးက ထောက်ခံအားပေးလျက်ရှိသည်။ ကြားနာမှုစတင်သည့်နေ့မှပင်စကာ ကြားနာမှုကာလတစ်လျှောက်လုံး အမှုသွားအမှုလာအပေါ် မြန်မာနိုင်ငံသူ နိုင်ငံသားအားလုံးတို့က စိတ်ဝင်တစားစောင့်ကြည့်ခဲ့ကြခြင်းလည်းဖြစ်သည်။ အမှုနှင့်ပတ်သက်သည့် ကြားနာပွဲမှာ မြန်မာနိုင်ငံက ဒုတိယအကျော့ လျှောက်လဲမှုပြီးစီးသည့် နောက်ဆုံးရက် ဇန်နဝါရီလ ၂၉ ရက်တွင် ပြီးဆုံးသွားခဲ့ပြီဖြစ်သည်။

မြန်မာနိုင်ငံနှင့် မြန်မာပြည်သူတို့အပေါ် ကြီးလေးသည့် စွပ်စွဲချက်ဖြင့် အပြည်ပြည်ဆိုင်ရာတရားရုံးသို့ ရောက်ရှိသည်အထိ ဖြစ်လာစေရန် ပြည်ပအင်အားစုတို့က ကြိုတင်ကြံစည်မှု၊ လုပ်ကြံလီဆယ်မှုများစွာနှင့် နက်နက်ရှိုင်းရှိုင်း၊ ရှုပ်ရှုပ်ထွေးထွေး အမှုဆင်ခဲ့ကြခြင်းဖြစ်သည်။ ဒုတိယကမ္ဘာစစ်အတွင်း ဖြစ်ပေါ်ခဲ့သည့် လူသားတို့၏ ဒုက္ခများနှင့် အနိဋ္ဌာရုံများ ကမ္ဘာတွင် နောက်ထပ်ဖြစ်ပေါ်မလာစေရန်ဟူသော ရည်ရွယ်ချက်ဖြင့် ဖွဲ့စည်းတည်ထောင်ခဲ့သည့် ကုလသမဂ္ဂနိုင်ငံတကာစင်မြင့်ထက်တွင် နိုင်ငံငယ်တစ်နိုင်ငံကို ဗီလိန်အဖြစ် ပုံဖော်နိုင်ရန် လူ့အခွင့်အရေးချိုးဖောက်မှု၊ စစ်ရာဇဝတ်ကျူးလွန်မှု၊ လူမျိုးသုဉ်းသတ်ဖြတ်မှု စသည့်စွပ်စွဲချက်များနှင့် စွပ်စွဲနိုင်ရန်အတွက် မီဒီယာနည်းလမ်း၊ သံတမန်နည်းလမ်း၊ အကြမ်းဖက်နည်းလမ်းစသည်ဖြင့် ဘက်ပေါင်းစုံမှ ပြုလုပ်ခဲ့ကြခြင်းလည်း ဖြစ်သည်။ ၎င်းတို့၏ တစ်ဖက်သတ်ဆောင်ရွက်ချက်များကြောင့် မြန်မာနိုင်ငံတွင် ဖြစ်ခဲ့သည့် ဖြစ်စဉ်ဖြစ်ရပ်များနှင့် စပ်လျဉ်း၍ ကမ္ဘာက အမှန်အတိုင်းမသိရှိရဘဲ တစ်ဖက်တည်းကိုသာ သိမြင်ကြရကာ မြန်မာနိုင်ငံအပေါ်တွင် အပြစ်ဆိုစရာသဖွယ်ဖြစ်ရသည်။ အနောက်အုပ်စုက လွှမ်းမိုးထားသည့် မီဒီယာများတွင် မြန်မာနိုင်ငံနှင့် ပတ်သက်သည့်သတင်းတို့မှာ မည်သည့်ကာလတွင်မဆိုကောင်းသည့်အချက်အလက်မပါသည့် သတင်းများသာဖြစ်သည်။

မြန်မာနိုင်ငံ ရခိုင်ပြည်နယ် မြောက်ပိုင်းတွင် ဖြစ်ပေါ်ခဲ့သည့်ဖြစ်စဉ်နှင့် စပ်လျဉ်း၍ မြန်မာနိုင်ငံနှင့် လွန်စွာဝေးကွာပြီး ဖြစ်စဉ်အမှန်ကိုလည်းမသိ၊ နစ်နာဆုံးရှုံးမှုလည်းမရှိသည့် ဂမ်ဘီယာနိုင်ငံက တိုက်ချင်းဖြတ်ကျော် တရားစွဲဆိုမှုမှာ ရိုးရှင်းသည်ဟု မဆိုနိုင်။ ၎င်း၏စွပ်စွဲမှုများနှင့်ပတ်သက်၍လည်း ခိုင်မာသည့် သက်သေအထောက်အထားကို ပြသနိုင်ခြင်းမရှိ။ ထိုသို့မရှိရုံမျှမက ၎င်းတို့ စွပ်စွဲချင်သလို စွပ်စွဲမှုများအတွက် မြန်မာနိုင်ငံက မဟုတ်မမှန်ကြောင်း ပြန်လည်ချေပမှုများကို သက်သေအထောက်အထားပြခိုင်းသည်။ ထို့အပြင် ၎င်း၏လျှောက်လဲချက်တို့မှာလည်း တစ်ကြိမ်နှင့် တစ်ကြိမ်ပြောင်းလဲမှုများ၊ အရေအတွက်အသစ်၊ စကားလုံးအသစ် ပြောင်းလဲပြောဆိုမှုများနှင့် တစ်သမတ်တည်းမရှိသည်ကို တွေ့ရ သည်။

ပြည်ထောင်စုသမ္မတမြန်မာနိုင်ငံတော်၏ ကိုယ်စားလှယ်ပြည်ထောင်စုဝန်ကြီး ဦးကိုကိုလှိုင်၏ ကြားနာပွဲပြီးဆုံးသည့် မိန့်ခွန်းတွင် - (က) လူမျိုးသုဉ်းစေမှုတားဆီးရေးနှင့် ပြစ်ဒဏ်ပေးရေး သဘောတူစာချုပ်ကို ဖောက်ဖျက်ကြောင်း ဂမ်ဘီယာသမ္မတနိုင်ငံက တရားရုံးသို့ အဆိုပြုသည့် စွပ်စွဲချက်များမှာ ဥပဒေကြောင်းအရနှင့် အချက်အလက်ပိုင်းအရ ခိုင်မာမှုမရှိသည့်အတွက် ပယ်ချပေးပါရန်၊ (ခ) တရားရုံးက ၂၀၂၀ ပြည့်နှစ်၊ ဇန်နဝါရီလ ၂၃ ရက်တွင် ချမှတ်ခဲ့သော ကြားဖြတ်စီမံဆောင်ရွက်ချက်ကို ဖောက်ဖျက်ကြောင်း ဂမ်ဘီယာသမ္မတနိုင်ငံက တရားရုံးသို့ အဆိုပြုသည့် စွပ်စွဲချက်များမှာ ဥပဒေကြောင်းအရနှင့် အချက်အလက်ပိုင်းအရ ခိုင်မာမှုမရှိသည့်အတွက် ပယ်ချပေးပါရန်နှင့် (ဂ) ဂမ်ဘီယာက အဆိုပြုသည့် နစ်နာကြေးပေးရန်အပြင် အခြားအဆိုပြုချက်အားလုံးမှာ ဥပဒေကြောင်းအရနှင့် အချက်အလက်ပိုင်းအရ ခိုင်မာမှုမရှိသည့်အတွက် ပယ်ချပေးပါရန် ပြည်ထောင်စုသမ္မတ မြန်မာနိုင်ငံတော်ကိုယ်စား အပြည်ပြည်ဆိုင်ရာတရားရုံးသို့ လျှောက်တင်ခဲ့သည်။

ဂမ်ဘီယာနိုင်ငံသည် မှန်ကန်ခိုင်မာမှုမရှိသော သက်သေအထောက်အထားများကို အသုံးပြု၍ အမှန်တကယ်ဖြစ်ပေါ်ခဲ့ခြင်း မရှိသောအမှုဖြင့် မြန်မာနိုင်ငံကို တရားစွဲဆိုခဲ့ခြင်းက ၎င်းအတွက် အကျိုးစီးပွား တစ်စုံတစ်ရာ ရကောင်းရနိုင်သော်လည်း မိမိတို့နိုင်ငံအနေဖြင့်မူ နိုင်ငံနှင့်ပြည်သူအတွက်ရော နောင်လာမည့်မျိုးဆက်သစ်များအတွက်ပါ အရေးပါသည့်အမှုကို ရင်ဆိုင်နေရခြင်းဖြစ်ရာ အမှန်တရားနှင့် မိမိနိုင်ငံ၊ မိမိလူမျိုးအတွက် နိုင်ငံတကာမျက်နှာစာတွင် ရှေ့တန်းကျကျရပ်တည်ဆောင်ရွက်ခဲ့ကြသော မြန်မာကိုယ်စားလှယ်အဖွဲ့ Agent of Myanmar အား မြန်မာတစ်မျိုးသားလုံးက လှိုက်လှိုက်လှဲလှဲ ဂုဏ်ပြုထောက်ခံအားပေးအပ်ပါကြောင်း။ ။