ရန်ကုန်တိုင်းဒေသကြီး၊ မင်္ဂလာဒုံမြို့နယ်၌ ယာဉ်ဆင့်တိုက်မှုဖြစ်ပွား၍ အမျိုးသား တစ်ဦး သေဆုံးကာ နှစ်ဦး ထိခိုက်ဒဏ်ရာရရှိ

ရန်ကုန်တိုင်းဒေသကြီး၊ မင်္ဂလာဒုံမြို့နယ်၌ ယာဉ်ဆင့်တိုက်မှုဖြစ်ပွား၍ အမျိုးသား တစ်ဦး သေဆုံးကာ နှစ်ဦး ထိခိုက်ဒဏ်ရာရရှိ

     ၂၀၂၆ ခုနှစ်၊ မတ် ၁၆ ရက်က ရန်ကုန်တိုင်းဒေသကြီး၊ မင်္ဂလာဒုံမြို့နယ်၌ ယာဉ်ဆင့်တိုက်မှုဖြစ်ပွား၍ အမျိုးသား တစ်ဦး သေဆုံးကာ နှစ်ဦး ထိခိုက်ဒဏ်ရာရရှိခဲ့ကြောင်း သိရသည်။

     ဖြစ်စဉ်မှာ မတ် ၁၆ ရက် ည ၉ နာရီ ၄၀ မိနစ်တွင် ရန်ကုန်တိုင်းဒေသကြီး၊ မင်္ဂလာဒုံမြို့နယ်၊ အမှတ်(၃)လမ်းမကြီး၊ ရုံးရှေ့မှတ်တိုင်အနီး၌ ယာဉ်တိုက်မှုဖြစ်ပွားကြောင်း သတင်းအရ အမှတ်(၉)ယာဉ်ထိန်းရဲဒုတပ်ဖွဲ့ခွဲမှူးရုံးမှ တပ်ဖွဲ့ဝင်များက သွားရောက်စစ်ဆေးခဲ့ရာ မြောက်ဥက္ကလာပမြို့နယ်၊ (ည)ရပ်ကွက်နေ ဦးချစ်မင်းဆက်(၃၆)နှစ်သည် YGN-3/5L-XXXX TOYOTA PROBOX မော်တော်ယာဉ်သည် အမှတ်(၃)လမ်းမကြီးအတိုင်း တောင်မှ မြောက်သို့ မောင်းနှင်လာစဉ် ရုံးရှေ့ မှတ်တိုင်ကျော်အရောက်၌ အရှိန်မထိန်းနိုင်ဘဲ လားရာတူ ၎င်းအရှေ့မှ ထောက်ကြန့်မြို့၊ ရွာမရပ်ကွက်နေ ဦးစိုးသူ(၃၈)နှစ် မောင်းနှင်နေသည့် ၁၁ ဟ-XXXX စည်ပင်အမှိုက်သိမ်း သုံးဘီးဆိုင်ကယ်အား ဝင်ရောက်တိုက်မိပြီးနောက် တစ်ဖက်ယာဉ်ကြောသို့ ရောက်ရှိကာ မျက်နှာချင်းဆိုင်ယာဉ်ကြောမှ မင်္ဂလာဒုံမြို့နယ်၊ ချစ်တီးကုန်းရပ်ကွက်နေ ဦးကျော်ဇင်မင်းထွန်း(၄၇)နှစ် မောင်းနှင်လာသည့် YGN-21/8G-XXXX LIGHT TRUCK မော်တော်ယာဉ်အား ထပ်မံတိုက်မိခဲ့သဖြင့် ဦးကျော်ဇင်မင်းထွန်းတွင် ထိခိုက်ဒဏ်ရာများရရှိကာ သေဆုံးသွားခဲ့ပြီး သုံးဘီးဆိုင်ကယ် ယာဉ်ပေါ်ပါ ဦးစိုးသူနှင့် ရွာမရပ်ကွက်နေ မောင်သူရအောင်(၁၆)နှစ်တို့တွင် ထိခိုက်ဒဏ်ရာများ အသီးသီးရရှိခဲ့သောကြောင့် ချစ်မင်းဆက်အား မင်္ဂလာဒုံမြို့မရဲစခန်း ယာဉ်(ပ)၈/၂၀၂၆၊ ရာဇသတ်ကြီးပုဒ်မ ၃၀၄-က/၃၃၈/၂၇၉ ဖြင့် အမှုဖွင့်အရေးယူထားကြောင်း  သတင်းရရှိပါသည်။