ရွှေသွေးဂျာနယ်ထွက်ရှိ

ရွှေသွေးဂျာနယ်ထွက်ရှိ

နေပြည်တော် ဇူလိုင် ၂၆

ပြန်ကြားရေးဝန်ကြီးဌာန ပုံနှိပ်ရေးနှင့်ထုတ်ဝေရေးဦးစီးဌာန စာပေဗိမာန်ရုံးက အပတ်စဉ်စနေနေ့တိုင်း ရွှေသွေးဂျာနယ်ကို ထုတ်ဝေဖြန့်ချိလျက်ရှိသည်။

၂၇ - ၇ - ၂၀၂၄ ရက် (စနေနေ့) တွင် ထွက်ရှိမည့် ရွှေသွေးဂျာနယ် အတွဲ(၅၆)၊ အမှတ်(၃၀)တွင် မုန်လာဥကို အလွန်ကြိုက်သော ဖိုးနီသည် မုန်လာဥများကို ကိုယ်တိုင်စိုက်ပျိုး စားသောက်ခြင်းက ရရှိနိုင်သည့် အကျိုးကျေးဇူးများကို ကောင်းစွာနားလည်သဘောပေါက်သွားပုံအကြောင်း တင်ဆက်ထားသည့် “ဖိုးဖြူနှင့် ဖိုးနီ”မျက်နှာဖုံးကာတွန်း၊ အက်ဇတက်လူမျိုးတို့သည် စိုက်ပျိုးရေးလုပ်ငန်းကို တစ်စိုက်မတ်မတ် ကြိုးစားလုပ်ကိုင်ရာမှ အင်ပါယာတစ်ခုကို တည်ထောင်နိုင်သည်အထိ စီးပွားရေးဖွံ့ဖြိုးတိုးတက်ခဲ့ပုံအကြောင်း ဗဟုသုတဖြစ်ဖွယ် ဖတ်ရှုရမည့် “အက်ဇတက်လူမျိုးနဲ့ စိုက်ပျိုးရေးလုပ်ငန်း” သုတဆောင်းပါးကဏ္ဍ၊ ကလေးတို့ကိုယ်တိုင်ရေးဆွဲထားသည့် ပန်းချီလက်ရာများကို တင်ဆက်ထားသည့် “ရွှေသွေးတို့လက်ရာ” ကဏ္ဍ၊ မိဘချင်းက မသင့်မြတ်ကြသော်လည်း အချင်းချင်းသင့်မြတ်အောင် နေကြမည်ဆိုသော ဖားကလေးနှင့် မြွေကလေးတို့အကြောင်း ရေးဖွဲ့ထားသည့် “သူငယ်ချင်း” နှစ်မျက်နှာကာတွန်း၊ ခြင်္သေ့ကလေးစွမ်းစွမ်းသည် တောစောင့်နတ်မင်းကြီး၏ ကူညီစောင့်ရှောက်မှုဖြင့် ဖခင်ခြင်္သေ့ မင်းကြီးထံမှ ခြင်္သေ့တို့တတ်အပ်သော ပညာများကို အချိန်တိုအတွင်း သင်ကြားတတ်မြောက်ခဲ့ပုံအကြောင်း တင်ဆက်ထားသည့် “ခြင်္သေ့လေး ငပျင်း” ပုံပြင်ကဏ္ဍ၊ သူတစ်ပါးအပေါ် အနိုင်ကျင့်ရာက မိမိကိုလည်း အနိုင်ကျင့်မည့်သူ ပေါ်ပေါက်လာတတ်ပုံအကြောင်း သရုပ်ဖော်ထားသည့် “အလှည့်”တစ်မျက်နှာကာတွန်း၊ မြန်မာ့ရိုးရာ ယဉ်ကျေးမှုအမွေအနှစ်တစ်ခုဖြစ်သည့် သနပ်ခါးအကြောင်း ရေးဖွဲ့ထားသည့် ဆရာဌေးကြည် (စလင်း)၏ “ပန်းလိုမွှေးတဲ့ပါး” ကဗျာကဏ္ဍ၊ ဉာဏ်စမ်းကဏ္ဍနှင့် အင်္ဂလိပ်စကားဝိုင်းကဏ္ဍစုံလင်စွာဖြင့် ထွက်ရှိပြီဖြစ်ရာ တစ်စောင်လျှင် ငွေကျပ် ၄၀၀ ဖြင့် စာပေဗိမာန် စာအုပ်အရောင်းဆိုင်များတွင် ဝယ်ယူနိုင်ကြောင်း သိရသည်။

သတင်းစဉ်