လူတိုင်းသတိပြုကြရမည့်လေဖြတ်ရောဂါ ကြိုတင်ကာကွယ်မှုဖြင့် ရှောင်ရှားပါ

လူတိုင်းသတိပြုကြရမည့်လေဖြတ်ရောဂါ ကြိုတင်ကာကွယ်မှုဖြင့် ရှောင်ရှားပါ

အချိန်အခါနေရာမရွေး လူတိုင်းလေဖြတ်နိုင်ခြေရှိသည်။ လေဖြတ်ခြင်းသည် သေဆုံးမှုကို ဖြစ်စေသောအကြောင်းရင်းများအနက် ဒုတိယအများဆုံးဖြစ်ပြီး မသန်စွမ်းမှုဖြစ်စေသည့်အကြောင်းများတွင် အဖြစ်အများဆုံးအဖြစ် အဓိကအကျဆုံးရောဂါဖြစ်သည်။ လူလေးဦးတွင် တစ်ဦးသည်ဘဝသက်တမ်းတစ်လျှောက် လေဖြတ်ခြင်းနှင့် ကြုံတွေ့နိုင်ခြေရှိသည့်အလျောက် ဤရောဂါနှင့်ပတ်သက်၍ လူတိုင်းသိနားလည်ထားကြရန်လိုအပ်သည်။

ကမ္ဘာတစ်ဝန်းနှစ်စဉ်လေဖြတ်ရောဂါဖြစ်ပွားနေသူ ၁၄ ဒသမ ၅ သန်းခန့်ရှိနေပြီး ၎င်းတို့အနက် ၅ ဒသမ ၅ သန်းခန့်မှာ အသက် ဆုံးရှုံးသွားသည်။ လက်ရှိကမ္ဘာပေါ်တွင် လေဖြတ်ရောဂါခံစားရပြီး အသက်ရှင်ကျန်ရစ်နေသူ စုစုပေါင်း သန်း ၈၀ ခန့်ရှိနေရာ ၎င်းတို့မှာ အကောင်းပကတိရှိနေခြင်းမဟုတ်ဘဲ ခန္ဓာကိုယ်မသန်စွမ်းခြင်း၊ စကားပြောရန်ခက်ခဲခြင်း၊ မှတ်ဉာဏ်နှင့် စိတ်ခံစားမှုတို့ ထိခိုက်ပြောင်းလဲသွားခြင်း၊ ၎င်းတို့၏ လူမှုစီးပွားဘဝများဆုံးရှုံးခြင်း စသည့်အခက်အခဲများနှင့် ရင်ဆိုင်ကြုံတွေ့နေကြရသည်။ ဝင်ငွေနည်းတိုင်းပြည်များမှ ပြည်သူများမှာ လေဖြတ်ရောဂါကို ပိုမိုခံစားနေကြရခြင်းဖြစ်ရာ လေဖြတ်ရောဂါကို မဖြစ်ခင်က ကြိုတင်ကာကွယ်နိုင်ကြရန်လိုသည်။

စင်စစ်အားဖြင့် လေဖြတ်ခြင်း၏ ၉၀ ရာခိုင်နှုန်းမှာ ကြိုတင်ကာကွယ်၍ ရနိုင်သည်ဟု ကမ္ဘာ့ကျန်းမာရေးအဖွဲ့က ထုတ်ပြန်ထားသည်။ လေဖြတ်ခြင်းကို ဖြစ်စေနိုင်သည့်အကြောင်းရင်းများကို ကြိုတင်ကာကွယ်ထိန်းချုပ်နိုင်ခြင်းအားဖြင့် လေဖြတ်ခြင်းကို ထိထိရောက်ရောက် လျှော့ချနိုင်သည်။ လေဖြတ်ခြင်းသည် ဦးနှောက်သွေး ကြောပိတ်ခြင်း သို့မဟုတ် ပေါက်ခြင်းတို့ကြောင့် ဦးနှောက်သို့သွေးစီးဆင်းမှု ပြတ်တောက်ခြင်း သို့မဟုတ် လျော့နည်းသွားခြင်း ဖြစ်ပေါ်သည့် အရေးပေါ်အခြေအနေတစ်ရပ်ဖြစ်သည်။ ဦးနှောက်သွေးကြောပိတ်ခြင်းသည် အဖြစ်များဆုံးဖြစ်ပြီး ၈၅ ရာခိုင်နှုန်းသော လေဖြတ်ခြင်းများမှာ ဦးနှောက်သွေးကြောပိတ်ခြင်းကြောင့် ဖြစ်သည်။ ကျန် ၁၅ ရာခိုင်နှုန်းမှာ ဦးနှောက်သွေးကြောပေါက်ခြင်း ကြောင့် ဖြစ်သည်။

လေဖြတ်ရောဂါဖြစ်စေသည့်အကြောင်းရင်းများတွင် ပြုပြင် ပြောင်းလဲ၍မရနိုင်သော အကြောင်းရင်းများနှင့် ပြုပြင်ပြောင်းလဲ၍ ရနိုင်သောအကြောင်းရင်းများဟူ၍ နှစ်မျိုးရှိရာ အသက်ကြီးလာခြင်း၊ အမျိုးသားဖြစ်ခြင်း၊ လေဖြတ်နှင့် နှလုံးရောဂါမျိုးရိုးရှိခြင်း၊ ယခင်ဖြစ် ဖူးခြင်းတို့သည် ပြုပြင်ပြောင်းလဲ၍မရနိုင်သောအကြောင်းရင်းများဖြစ်သည်။ ပြုပြင်ပြောင်းလဲ၍ရနိုင်သောအကြောင်းများမှာ သွေးတိုး၊ နှလုံးရောဂါရှိခြင်း၊ လည်ပင်းရှိ သွေးလွှတ်ကြောမကြီးထူခြင်း၊ ကျဉ်းခြင်း၊ ဆေးလိပ်သောက်ခြင်း၊ အရက်အလွန်အကျွံသောက်ခြင်း၊ သွေးချိုဆီးချိုရှိခြင်း၊ အဝလွန်ခြင်း၊ သွေးတွင်းအဆီဓာတ်များခြင်း၊ ကိုယ်လက်လှုပ်ရှားမှုနည်းခြင်းတို့ဖြစ်သည်။

လေဖြတ်ရောဂါကာကွယ်ရန်အတွက် သွေးပေါင်ချိန်ပုံမှန်ရှိရန်၊ သွေးတွင်းအဆီဓာတ်မတက်ရန်နှင့် ကိုယ်အလေးချိန်မတက်ရန် ထိန်းကြရမည်ဖြစ်သည်။ သွေးချိုဆီးချိုရှိပါက စနစ်တကျကုသရန် နှင့်ဆေးလိပ်၊ အရက်၊ အချို၊ အငန်၊ အဆီလွန်ကဲသောအစားအစာများကို ရှောင်ကြဉ်ရန်လည်း လိုအပ်သည်။ အမျှင်ဓာတ်များသော ဟင်းသီးဟင်းရွက်၊ သစ်သီးဝလံများ နေ့စဉ်စားသုံးရန်နှင့် ကိုယ် လက်လေ့ကျင့်ခန်းများ တစ်ပတ်လျှင် ငါးရက်၊ တစ်ရက်လျှင် နာရီဝက်ခန့် ပြုလုပ်ကြရမည်လည်းဖြစ်သည်။ ထို့အပြင် စိတ်ဖိစီးမှုများကို ဖြေဖျောက်ရန်နှင့် လေဖြတ်ခြင်း ရှေ့ပြေးလက္ခဏာများ တွေ့ရှိပါက အချိန်မဆိုင်းဘဲ ချက်ချင်းကုသမှုခံယူရန် ဆောင်ရွက်ကြရမည် ဖြစ်သည်။

လေဖြတ်ခြင်းလက္ခဏာကို F.A.S.T ဟူ၍ အတိုကောက်မှတ်သားနိုင်ပြီး F-Facial dropping (မျက်နှာရွဲ့ခြင်း)၊ A-Arm Weakness (လက်မောင်းအားလျော့နည်းခြင်း)၊ S-Speech Difficulty (စကား ဗလုံးဗထွေးဖြစ်ခြင်း)၊ T-Time to call emergency (အရေးပေါ် ကုသမှုချက်ချင်းခံယူခြင်း)ဖြစ်သည်။ လေဖြတ်ပြီးနောက် ပထမမိနစ် ၆၀ ကို ရွှေနာရီအဖြစ် သတ်မှတ်ထားပြီး အမြန်ကုသမှုခံယူပါက ဦးနှောက်ပျက်စီးမှုကို သိသိသာသာလျှော့ချပေးနိုင်ကာ ပြန်လည် ကောင်းမွန်သည့်ရလဒ်များကို ပိုမိုရရှိစေနိုင်သည်။

သို့ဖြစ်ရာ အသက်ကြီးသူ၊ မျိုးရိုးရှိသူ၊ လေဖြတ်ဖူးသူများ လေဖြတ်ရောဂါကို သတိပြုကြရန်နှင့် လေဖြတ်ရောဂါဖြစ်နိုင်သည့် အကြောင်းရင်းများကို ရှောင်ကြဉ်ရန်၊ လေဖြတ်ရောဂါဖြစ်လာပါက လည်း တစ်မိနစ်မျှပင် အချိန်မဆိုင်းဘဲ အမြန်ဆုံးကုသမှုခံယူကြရန် နှိုးဆော်တိုက်တွန်းအပ်ပါကြောင်း။ ။