ကျေးရွာချင်းဆက်လမ်း အဆင့်မြှင့်တင်ခြင်းလုပ်ငန်းဆောင်ရွက်

ကျေးရွာချင်းဆက်လမ်း အဆင့်မြှင့်တင်ခြင်းလုပ်ငန်းဆောင်ရွက်

ပဲခူး မတ် ၃

       ပဲခူးတိုင်းဒေသကြီး၊ ပြည်ခရိုင်၊ သဲကုန်းမြို့နယ် ကျေးလက်လမ်းဖွံ့ဖြိုးရေးဦးစီးဌာနက ကျေးရွာချင်းဆက်လမ်းများ အဆင့်မြှင့်တင်ခြင်းလုပ်ငန်းများ ဆောင်ရွက်ပြီးစီးမှုကို ယမန်နေ့က တာဝန်ရှိသူများ ကွင်းဆင်းစစ်ဆေးသည်။

     ထိုသို့ကွင်းဆင်းစစ်ဆေးရာတွင် ကျေးလက်လမ်းဖွံ့ဖြိုးရေးဦးစီးဌာန အင်ဂျင်နီယာချုပ် ဦးထွန်းဝေ(ပဲခူးတိုင်းတာဝန်ခံ)၊ ပြည်ခရိုင် ကျေးလက်လမ်းဖွံ့ဖြိုးရေး ဦးစီးဌာန လက်ထောက်ညွှန်ကြားရေးမှူး(မြို့ပြ) ဦးဝဏ္ဏ၊ မြို့နယ်တာဝန်ခံအင်ဂျင်နီယာ၊ လုပ်ငန်းအရည်အသွေးထိန်းသိမ်းရေးအဖွဲ့ တာဝန်ရှိသူများသည် သဲကုန်း မြို့နယ် တောင်ကြို့ကုန်း- သီရိမင်္ဂလာလမ်း အနိမ့်အမြင့်မြေညှိ၍ အရှည် ၆ ဖာလုံ၊ အကျယ် ၁၄ ပေ၊ ထု ၆လက်မရှိ မြေနီကျောက်စရစ်ခင်းခြင်းလုပ်ငန်း ဆောင်ရွက် ပြီးစီးမှုကို ကြည့်ရှုစစ်ဆေးသည်။

      ထို့နောက် တာဝန်ရှိသူများသည် ချားလျားကုန် - ပြကြီး- ချောင်းကမ်းကြီးကျေးရွာတို့ကို ဆက်သွယ်ထားသော အရှည် ၃ ဖာလုံ၊ အကျယ် ၂၀ ပေ၊ ထု ၈ လက်မရှိ မြေသားတာဘောင်ချဲ့တင်၍ မြေန်ခင်းခြင်းလုပ်ငန်းဆောင်ရွက်ပြီးစီးမှုကို ကြည့်ရှုစစ်ဆေးပြီး အင်ဂျင်နီယာချုပ်က တာဝန်ရှိသူများနှင့် တွေ့ဆုံကာ အဆိုပါလမ်းများ အဆင့်မြှင့်တင်ဆောင်ရွက်မည်ဆိုပါက လိုက်နာဆောင်ရွက်ရန် အချက်များကို မှာကြားသည်။

       အဆိုပါလုပ်ငန်းများကို ၂၀၂၅-၂၀၂၆ ဘဏ္ဍာနှစ် ပြည်ထောင်စု အထွေထွေပိုလျှံရန်ပုံငွေဖြင့် မြို့နယ်ကျေးလက်လမ်းဖွံ့ဖြိုးရေးဦစီးဌာန အင်ဂျင်နီယာ ဝန်ထမ်းများ၏ နည်းပညာအကူအညီဖြင့် ဆောင်ရွက် ခဲ့ရာ ယခုအခါလုပ်ငန်းများအားလုံး ရာနှုန်းပြည့်ဆောင်ရွက်ပြီးစီးပြီဖြစ်ကြောင်း သိရသည်။

ချိုသန်းညွန့်(ကျေးလက်)